Rúgbrauð

Það hefur lítið verið um nýjar uppskriftir á þennan vef vegna mikilla anna, ekki það að ég sé ekki að elda fyrir fjölskylduna á hverju kvöldi, eða sona næstum því heldur er það frekar að ekki hafi gefist tími til að setja þær allar inn.
Þar sem ég bý ekki á Íslandi þessa stundina þá er ég ekki svo heppin að geta gengið út í búð og keypt mér rúgbrauð. Ég fékk síðan tilboð frá veitingastað hér í Mílanó um að sjá um íslenskan kvöldverð á kynningu sem er á vegum ferðaskrifstofu hér í borg. Ég þáði það en svo kom babb í bátinn, allt sem er íslenskt fæst bara á Íslandi, eða hvað? Ég fór því á stúfana á netinu og fann rúgbrauðsuppskrift sem ég svo prófaði að gera. Þessi uppskrift tók mig bókstaflega engan tíma að undirbúa en hins vegar á það að vera inni í ofni í 12-13 tíma, en ég tók hins vegar lítið eftir því því að ég setti brauðið inn rétt eftir kvöldmatinn og það var svo inni yfir nóttina og kom rjúkandi heitt og unaðslegt úr ofninum tilbúið í morgunverðinn.
Ég vil taka það fram að þessi uppskrift kemur ekki frá mér beint en ég hins vegar skoðaði þær svo margar á netinu að ég man ekki hvaðan þessi kemur, ég bara varð að setja þetta hérna inn fyrir ykkur vinkonur mínar sem eru búsettar erlendis eins og ég. Við toppuðum svo alveg reynsluna með því að fara í IKEA og kaupa síld...
Uppskriftin er svohljóðandi:

Rúgbrauð
6 bollar rúgmjöl(enska: rye, ítalska: farina di segale, fæst í náttúruverslunum)
6 bollar heilhveiti/hveiti/gróft spelt
7 bollar sojamjólk/AB-mjólk/súrmjólk
5 tsk natron(baking powder, fæst í ethnic búðunum)
3 tsk salt
500 g algave sýróp/maple sýróp

AÐFERÐ:
Fyrst er þurrefnunum blandað saman og þá er blautu efnunum bætt saman við, hrært vel. Sett í mjólkurfernur, eða kalkúnapott(fylltar aðeins til hálfs eða 3/4) og sett í ofn við 100°C-120°C í 12-12 tíma.
ATHS: Þar sem það fæst ekki hér á Ítalíu hvorki súrmjólk né AB-mjólk notaði ég sojamjólkina og ég fann engan mun, ég notaði einnig heilhveiti sem var mjög gott og ég notaði maple sýróp þar sem annað sýróp er ekki til hér í Mílanó. Ég helmingaði uppskriftina og fékk 2 brauð úr því. Annars er alltaf hægt að frysta..
Ofninn minn er ekki alveg það besta á markaðnum og hafði ég hann á 100°C en brauðin voru ekki tilbúin eftir 13 tíma þannig að ég mæli með að fyrsta skipti sem þetta er prófað að hafa ofninn í 120°C, nema um sé að ræða flotta, nýja ofna.
Njótið vel.

Steikt fennika með parmesanhúð og linsubaunasalati

Þessi réttur fannst mér alveg rosalega góður og ekkert kjöt kemur nálægt honum. Linsubaunir eru vítamnríkar, járninnihald er hátt og mér finnst þær kærkominn staðgengill hrísgrjóna og kartaflna. Ég er nefnilega komin með smávegis nóg af kartöflum og hrísgrjónum og er að vinna í því að finna eitthvað gott í staðinn. Ef þið viljið er þó einnig mjög gott að bæta litlum kartöfluteningum saman við í þessari uppskrift. Það getur verið örlítið subbulegt að steikja fennikuna á þennan hátt en það er svo sannarlega þess virði, það er líka hægt að nota ýmislegt annað grænmeti í staðinn, eins og t.d. gulrætur, eggaldin, kúrbít, kartöflur og fleira sem ykkur dettur í hug eða það sem er girnilegast í búðinni.

Linsubaunasalat

Handa 4

150 g grænar linsubaunir
1 meðalstór gulrót
1 meðalstór blaðlaukur, bara hvíti hlutinn
1/2 laukur
4 msk tómatpassata(sem er tómatsósa úr dós með engum tómatbitum í)
10 basilíkulauf(hægt að sleppa)
vinaigrette(2-3 msk ólífuolía og 1 msk balsamedik)
1 fennikuhaus
50-100 g parmesanostur, rifinn mjög smátt
3 msk mjólk(ég notaði léttmjólk en það má vera hvað sem er)
extra virgin ólífuolía

Aðferð:
Sjóðið linsubaunirnar í söltu vatni í u.þ.b. 15 mín.(smakkið til að athuga hvort tilbúnar), látið þá renna af þeim og setjið til hliðar. Skerið grænmetið á meðan fyrir utan fennikuna. Skerið allt grænmetið í litla teninga og steikið á pönnu með olíu við meðal-lágan hita, ef þið eigið húðaða pönnu er hægt að sleppa olíunni, þar til grænmetið er meyrt, ca. 20-25 mín. Bætið þá tómatsósunni saman við, saltið og piprið og rífið basilíkuna út í. Látið malla við lægsta hita á meðan þið skerið fennikuna og steikið. Skerið fennikuna fyrst í tvennt, þá skerið þið kjarnann úr og síðan skerið þið hvert fenniku,,lauf" í tvennt og skrælið ystu ,,laufin". Sjóðið fennikuna í sjóðandi, söltu vatni í ca 5 mín þar til hann er meyr en með smá biti í, takið hann þá upp úr og haldið undir ísköldu rennandi vatni í 2-3 mínútur, þerrið hann þá á eldhúspappír. Hellið mjólkinni í grunna skál og rífið ostinn í aðra grunna skál. Hitið ólífuolíu á pönnu og hafið á meðal-háum hita. Dýfið hverju laufi ofan í mjólkina fyrst og veltið svo upp úr parmesan ostinum og setjið á heita pönnuna. Steikið þar til hann er gullinbrúnn á báðum hliðum. Á meðan hann steikist blandið þá linsubaununum saman við grænmetið og hitið þar til heitt í gegn, setjið á diska og fennikuna yfir þegar hún er tilbúin. Dreypið smá vinaigrette yfir og berið fram.
Ath. hægt er að sleppa tómatsósunni og blanda grænmetinu, linsubaununum og vinaigrette saman og hafa það þannig.

Blómkálsklattar með eggaldinlasagna

Ég var beðin um grænmetisrétti og hér kemur einn alveg geggjaður. Melanzane alla parmigiana hefur verið minn uppáhaldsréttur síðan ég smakkaði hann fyrst á Sardiníu árið 1995, þetta fullkomna hjónaband eggaldins, mozzarella og tómatsósu heillaði mig alveg upp úr skónum. Hins vegar þegar ég prófaði að gera þetta heima á Íslandi komst ég að því að þessi réttur er jafn dýr og nautalund með bernaise. Í dag ákvað ég að prófa að gera hann aðeins ódýrari og hann var ekki síðri, langt í frá, hann var geggjaður. Blómkálsklattarnir eru að litlu leiti stolnir af michelin staðnum sem ég var að vinna á nema færðir í annan búning og aðeins fljótlegri.

Blómkálsklattar

Handa 4
400 g blómkálsknúpar
1/2 kartafla
1 egg, þeytt lítillega með smá salti
brauðmylsna
hveiti til að velta upp úr
ólífuolía

Setjið blómkálið og kartöfluna í sjóðandi, saltað vatn og sjóðið í 4-5 mín. Þegar þeir eru mjúkir eru þeir teknir upp úr vatninu og settir strax undir rennandi kalt vatn og kældir alveg niður. Þegar þeir eru kaldir eru þeir hakkaðir með töfrasprota eða settir í blandara og hakkað í mauk. Ef blandan er mjög vatnsmikil er gott að setja maukið í pott og hita við háan hita í 4-5 mín til að láta vatnið gufa aðeins upp og þétta blönduna. Setjið eggið í grunna skál, setjið hveitið í aðra grunna skál og brauðmylsnuna í þá þriðju. Takið blómkálsmaukið þegar það hefur kólnað aðeins og mótið klatta í höndunum, veltið hverjum og einum varlega upp úr hveiti og svo í eggið og síðast upp úr brauðmylsnunni, þetta þarfnast varkárni þar sem klattarnir eru mjúkir. Setjið klattana á disk með bökunar pappír og setjið inn í frysti.
Á meðan búið til eggaldinlasagna.

Eggaldinlasagna

Handa 4

3 eggaldin, þunnt skorin
200 g rifin ostur, getur verið mozzarella, gouda eða hvað sem er
200 ml ólífuolía
1 dós hakkaðir tómatar
1/2 laukur, saxaður
100 gr rifinn parmesan ostur
salt og pipar

Hitið ofninn í 180°C. Setjið eggaldinsneiðarnar á pappírsþurrku og saltið lítillega yfir hverja og eina sneið og látið liggja í 15-20 mín. Á meðan setjið 50 ml af ólífuolíu í pott og bætið lauknum saman við og steikið við meðal-lágan hita í 5- 10 mín, bætið þá tómötunum saman við og haldið á lágum hita á meðan eggaldinið er steikt. Þegar á að steikja eggaldinið er best að hafa 2 pönnur í gangi og setja lítið af ólífuolíu í hvora svo þegar hver sneið er sett á pönnuna er henni strokið fyrst einni hliðinni upp úr olíunni og svo steikt á hinni hliðinni. Þegar eggaldinið er brúnt á báðum hliðum er það lagt í lög í ofnfast fat og tómatsósa sett yfir hvert lag ásamt lagi af rifnum osti. Passið að tómatsósan sé efst og þar ofan á kemur rifinn ostur og svo um 100 g af rifnum parmesan osti. Þetta er svo bakað í ofni við 180°C í 30 mín. eða þar til osturinn er fallega gullinbrúnn.

Þegar eggaldinlasagnaið er tilbúið er það tekið úr ofninum og leyft að kólna aðeins. Þá eru blómmkálsklattarnir steiktir upp úr ólífuolíu, u.þ.b. 4 mín á hvorri hlið og svo settir inn í ofn í 4 mín til viðbótar.
Þetta er svo borið fram með ykkar uppáhaldssalati.

Steiktur aspas með beikoni

Enn og aftur aspas. Hér hef ég hann með beikoni. Það sem helst þarf að hafa í huga þegar aspas er eldaður er að sjóða/steikja hann ekki of mikið, þá getur hann orðið seigur. Það þarf líka að steikja hann við lágan hita, frekar en háan. Þetta er einnig líklegast auðveldasti forréttur sem til er.

Fyrir 4

8 aspasstönglar
4 beikonsneiðar

Skrælið aspasinn næstum upp að toppnum, vefjið einni beikonsneið utan um tvo stöngla. Setjið á pönnu við meðal-háan hita steikið í 2 mín á hvorri hlið, lækkið þá hitann í lágan og setjið lok á pönnuna, steikið í 3 mín til viðbótar eða þar til aspasinn er orðinn mjúkur viðkomu og beikonið er stökkt. Berið strax fram.

Aspasrúllur með prociutto, brenndu smjöri og stökku parmesankexi

Nú er aspasinn svo undursamlega fallegur að maður bara ræður ekki við sig í búðunum, ég bara varð að kaupa fullt af honum. Þennan rétt er sérstaklega gott að hafa sem for-forrétt eða hors d'ouvres. Það er vegna smjörsins, því ef maður borðar mikið af honum getur það orðið aðeins of mikið af því góða. En alveg hreint unaðslegur réttur. Aspas saman með smjöri eða eggjum er hið fullkomna hjónaband.

Aspasrúllur með prociutto, brenndu smjöri og stökku parmesankexi

fyrir 4

8 aspasstönglar
4 sneiðar af prociutto
70 gr smjör
40 gr parmesan, nýrifinn og rifinn gróft

Flysjið aspasinn upp að efsta hlutanum og setjið í saltað, sjóðandi vatn í 3-4 mín. Kælið strax undir rennandi köldu vatni. Látið renna af þeim og haldið til hliðar.
Bræðið smjörið í litlum potti og látið það brúnast.
Setjið gróftrifna parmesanostinn í 2 hringi á bökunarpappír og inn í ofn í 4-5 mín við 180°C, eða þar til hann fer að brúnast. Takið hann þá út og látið kólna örlítið, þegar hann hefur rétt kólnað en er enn mjúkur eru hringirnir settir yfir skál og látið kólna alveg þannig. Skálarnar eru síðan annað hvort haldið eða brotnar í stóra bita.
Rétt áður en þetta er borið fram er aspasinn vafinn í prociuttosneiðarnar, þær lagðar fallega á diska og smá af smjörinu sigtað yfir með fínu sigti, skreytt með parmesankexinu og fíntrifnum parmesan

Gratineraðar kartöflur með vorlauk og béchamel sósu

Gratineraðar kartöflur er mjög einfalt að gera og þegar veðrið er eins og það er á Íslandi er alltaf hægt að ylja sér með unaðslega rjómakenndum kartöflum. Það er mjög gott að bera þær fram með fiski-eða kjötfrikadellum, fisk eða bragðlitlu kjöti þar sem kartöflurnar eru mjög bragðmiklar og gætu stolið senunni.

Gratineraðar kartöflur með vorlauk og béchamelsósu
f/4
400 gr kartöflur, skornar í þykkar sneiðar
50 gr vorlaukur, skorinn á ská í sneiðar
500 ml mjólk(má vera nýmjólk eða léttmjólk)
50 gr smjör
40 gr hveiti
hnífsoddur af múskathnetu, nýrifinn
salt og pipar
parmaostur, nýrifinn
Hitið ofninn í 180°C.Bræðið smjör í potti þegar það er bráðið er hveitinu bætt saman við og blandað vel saman þar til það myndar bollu, þá er mjólkinni bætt saman við og pískað stanslaust þar til mjólkin fer að sjóða og mjólkin orðin þykk. Þá er múskatinu bætt útí.
Kartöflurnar eru lagðar í lög ásamt vorlauknum, saltið og piprið og því næst er béchamelsósunni hellt yfir og sett inn í ofn við 180°C í 1 klst. Þá er parmesan osturinn rifinn yfir, ríflegt magn og sett undir grillið í nokkrar mín við 200°C eða þar til það fer að brúnast.
Berið fram .

Ofur einfaldur ofnsteiktur kjúklingur

Í þessari uppskrift er hægt að nota hvaða kjúkling sem er, allt frá hamflettum bringum upp í heilan kjúkling. Það sem þarf að gera er að skera grænmeti og henda í fat og inn í ofn, gæti ekki verið einfaldara og betra..

Ofur einfaldur ofnsteiktur kjúklingur

f/4

1 kjúklingur eða 4 kjúklingabringur eða 8 kjúklingabitar
4 gulrætur, skornar í litla ferninga
1/2 sellerístöngull, skorinn í litla bita
1/2 laukur, saxaður gróft
400 gr litlar kartöflur, skornar í frekar litla bita, ekki þó eins litla og gulrótina
4 salvíulauf
4 timjankvistir, bara laufin
vatn og kjúklingakraftur
ólífuolía

Aðferð:
Hitið ofinn í 190°C. Hitið ólífuolíuna á pönnu eða í pottinum sem verður notaður fyrir kjúklinginn. Setjið allt grænmetið í og steikið létt, bætið kjúklingnum saman við og steikið lítillega hellið þá soðinu saman við(það á að ná upp að helming kjúklingsins, 1 krafteningur er fyrir hverja 500 ml),stráið kryddjurtunum yfir, setijð lok á og inn í ofn. Tíminn fer eftir hvers konar vöðva þið notið; kjúklingabringur eða bitar taka u.þ.b. 30-40 mín og heill kjúklingur tekur 1-1 1 /2 klst, ef þið eruð með leirpott er það 1 1/2 klst ef þynnri pottur er notaður er að 1 klst. Best er að athuga hvort hann sé tilbúinn. Soðið er notað sem sósa.
Afgangurinn af kartöflunum var svo notaður daginn eftir líka, þær eru jafnvel betri þá.