Matseðill fyrir vikuna 16.03-20.03.

Þá er mars hálfnaður og það styttist óðum í utanlandsferð til matarlandsins mikla og ég get ekki beðið eftir því að sitja í leti með fullan munninn af unaðslegum osti!
Ég er þó enn hér á fróni með hugan í bleyti yfir matseðli vikunnar. Kvöldið verður lítilfjörlegt þar sem Hekla fékk grjónagraut og lifrarpylsu hjá ömmu sinni og situr nú sæl og södd og leikur sér og eiginmaðurinn er í fótbolta, þá er það bara samloka handa mér, engar gloríur þar. Vikan er þó framundan og ekki er hægt að bjóða heimilisfólkinu upp á samlokur endalaust, við þurfum næringu. Ég var að blaða í gegnum uppáhaldsuppskriftabókina mína þessa dagana og er núna með svo yfirfullan heilan af hugmyndum að það er frekar erfitt að beisla þetta og komast að niðurstöðu með einn rétt í einu, mig langar í allt! Græðgin er alveg að taka yfirhöndina en ég mun berjast og sigra á endanum að vanda. Ég er eiginlega alveg viss um að gúllaskjöt sé mjög ódýrt og tel það ágætan kost að búa til stroganoff úr því, en athugið að sjóða vel kjötið og ekki bjóða upp á hann án þess að hafa smakkað einn bitann og ef hann er ekki seigur er rétturinn tilbúinn. Það hefur viðgengst hér á Íslandi allt of lengi að fólk er að flýta sér of mikið og lætur kjötið ekki sjóða nægilega lengi og þá er allt saman svo ólseigt að varla er hægt að borða það, ekki er það mjög spennandi fyrir litlar, nýjar tennur. Matarmikil salöt koma sterk inn þessa vikuna og ætla ég að prófa eitthvað nýtt á þeim vettvangi, svo er spurning um fiskrétt.
Best að ljúka þessu með matseðlinum sjálfum.

Þriðjudagur
Ballettsýning hjá Heklu, þannig að það verður lítið um eldamennsku

Miðvikudagur
Salade Nicoise

Fimmtudagur
Svínahnakkar með frönsku kartöflusalati með beikoni

Föstudagur
Nautakjöts eða svínakjötsstroganoff(fer eftir hvort ég finn í búðinni og hvort er ódýrara)

Pulsur og svínalundir með gráðostasósu

Það var svo mikið stress á mér í vinnunni síðustu daga að ég gat bara ekki hreyft mig þegar heim var komið svo að í gær voru pulsur og svo í kvöld verðum við með svínalundir með gráðostasósu og franskar kartöflur, klassi. Sverrir hefur séð um eldamennskuna síðustu tvo daga og stendur sig með prýði að vanda. Hann reyndar sauð kartöflurnar fyrst og steikti svo upp úr mikilli olíu og smá smjöri, við týmdum ekki að kaupa franskar kartöflur, þær voru eitthvað svo dýrar allt í einu, svo erum við í massívum sparnaðaraðgerðum og þá er bara að nýta það sem er til í skápunum.
En nú ætla ég að fara og gæða mér á góðgætinu....

Linsubaunaborgarar með tzaziki sósu

Ég verð nú að segja að uppskriftina að þessu er frekar erfitt að finna út, þar sem ég notaði afgangana frá hinu nokkurs konar ratatuille sem ég gerði um daginn, þannig að kryddið í borgarana kom þaðan. En þeir voru bara helvíti góðir, það hefði kannski mátt krydda þá aðeins betur eða meira, en tzaziki sósan smellpassaði með, mæli sérstaklega með henni. Þetta tók líka enga stund að búa til, ætli ég hafi ekki verið um það bil 30 mínútur að búa allt saman til, en það þarf að taka til greina að linsubaunirnar voru þegar soðnar, venjulega tekur um 30 mínútur að sjóða þær.
Þar sem þetta var mjög svo óljós uppskrift þá ætla ég að slumpa á magnið í borgurunum í þetta skiptið þannig að ekki skammast ef borgararnir eru ekki alveg eins og þið hefðuð ímyndað ykkur, ja eða smakkað áður. Ég hef nefnilega aldrei smakkað linsubaunabuff eða neitt í líkingu við þetta áður og hafði því ekki hugmynd um hvernig þetta átti allt saman að líta út en maður bara klórar sig fram úr hlutunum eins og venjulega.

Linsubaunaborgarar
f/4
ca 200 gr soðnar grænarlinsur(ath þær eru léttari fyrir suðu)
2 kartöflur, soðnar
salt og pipar
krydd eftir smekk
1 egg
3 msk raspur, ég notaði japanska raspið sem maður notar í djúpsteiktar rækjur
meiri raspur til að velta upp úr og eitt egg til að velta upp úr
hveiti til að velta upp úr
Franskar kartöflur
4 hamborgarabrauð
2 tómatar, sneiddir
Icebergsalatblöð
gúrkusneiðar ef vill
Ostsneiðar ef vill
tzaziki sósa-sjá uppskrift neðar

Aðferð:
1. Sjóðið kartöflurnar og linsubaunirnar. Þegar þær eru tilbúnar er þetta stappað saman ásamt kryddi, eggi og raspi.
2. Mótið borgara með höndunum og leggjið á disk og búið til sósuna, setjið frönsku kartöflurnar í ofninn og skerið tómata og salat til að setja á borgarana.
3. Þegar allt er tilbúið og kartöflurnar malla í ofninum er eggið léttþeytt í eina grunna skál, hveiti sett í aðra og raspur í þá þriðju. Hitið stóra pönnu með olíu.
4. Þá er einum borgara í einu velt fyrst upp úr hveiti þá upp úr egginu og síðast raspinu og borgarinn settur á pönnuna, þetta er gert við alla og steiktir við meðal hita á hvorri hlið og osturinn settur á seinni hliðina. Þegar fallega gullinbrún húð hefur myndast á hvorri hlið eru borgararnir settir inn í ofn á meðan hamborgarabrauðin eru hituð og kartöflurnar klárast.
Þegar brauðin eru orðin heit ætti allt að vera tilbúið fyrir alla að setja á sinn hamborgara.

Tzaziki sósa
gerir u.þ.b. 300 ml af sósu

150 ml sýrður rjómi
150 ml majónes
salt og pipar
ca 10 sm biti af gúrku, rifinn með rifjárni
1/4 hvítlauksrif, kramið eða rifið með rifjárni

Aðferð:
1. Hrærið vel saman sýrðum rjóma, majónesi, salti og pipar þar til allir kekkir hafa horfið.
2. Bætið hinu saman við og smakkið til.

Einnig er gott að nota sósuna sem ídýfu með hvers kyns snakki og þá sérstaklega mæli ég með Bugles.

Bjórbrasseraður kjúklingur

Mamma hefur notað bjór ansi mikið síðustu misseri í að grilla kjúkling, hún á til þess gerðar græjur en ég á það hins vegar ekki og ákvað ég því að gera mína útgáfu af þessu. Ég nota leirpottinn minn en ef ég ætti svokallaða(á ensku)roasting pan þá myndi ég frekar vilja nota hana, en maður bara notar það sem maður á.

Bjórbrasseraður kjúklingur með maple-sinnepsgljáa
f/4
1 kjúklingur
3 litlar gulrætur, skornar í bita
2 sellerístönglar, skrældir og skornir í bita
1/2 laukur, sneiddur
1 lítill skallottulaukur, sneiddur
1 tómatur, skorinn í bita
4 -5 kartöflur, skornar í stóra bita
200 ml bjór, tegundin skiptir ekki miklu máli en því meiri bitter bjór því meira bitter verður sósan, ég notaði í þetta skipti Tuborg þar sem það var til í ísskápnum
1 grein rósmarín, bara nálarnar
smá klípa Poultry seasoning
salt og pipar
1 teningur kjúklingakraftur+

Gljái
1 msk Dijon sinnep
1 msk maple sýróp

Aðferð:
1. Skerið grænmetið ásamt kartöflunum og steikið í pottinum sem þið ætlið að nota fyrir kjúklinginn í ofninn. Látið það fá smá lit.
2. Troðið smjöri innundir húð kjúklingsins
3. Færið grænmetið til hliðanna í pottinum og steikið kjúklinginn létt á hvorri hlið og látið svo liggja með bringuna upp. Hellið þá bjórnum yfir og látið sjóða niður í 4 mínútur. Hellið þá 100 ml af vatni yfir ásamt kryddi. Berið helming gljáans yfir kjúklinginn og setjið inn í ofn við 200°C í ca klukkutíma. Takið kjúklinginginn út úr ofninum ca 10 mínútum fyrir áætlaðan eldunartíma og berið afganginn af gljáanum á kjúklinginn og takið lokið af og hafið loklaust afganginn af tímanum.

Matseðill fyrir vikuna 09.03-13.03

Þessa vikuna verður sparað allverulega, því í næsta mánuði er stefnan tekin á Salerno í brúðkaup og svo þar á eftir til Rómar, þannig að það þarf að eiga smá gjaldeyri.
Ég verð því með risotto í kvöld og svo hafragraut það sem eftir er vikunnar, ójá hafragraut í fullt af nýjum útgáfum, með rúsínum, með kanilsykri, með kakó og já bara alls konar. Nei það er ekki alveg hægt. En réttirnir verða einfaldir og góðir að vanda. Ég verð að draga allt úr frystinum sem ég get og nýta, nýta, nýta út í hið óendanlega.
Ég er að spá í linsubaunabuffi úr afgöngunum frá síðustu viku, þó ég viti að eiginmaðurinn verði ekki ánægður með það hann er ekki mikill aðdáandi linsubauna, því miður.
Ég tók út kjúkling áðan þannig að það verður kjúklingur á morgun en ætli sé ekki best að ég setji hér inn matseðilinn.

Mánudagur
Risotto bianco með ofnbökuðu baguette brauði

Þriðjudagur
Brasseraður kjúklingur
Ég á svo mikið af grænmetisafgöngum og þetta er besta leiðin til að nýta þá

Miðvikudagur
Linsubauna hamborgarar með tzaziki, beikoni og grænmeti

Fimmtudagur
Fiskur dagsins, er að spá í einhvers konar ofnrétt

Föstudagur
Svínalundir

Amerískar pönnukökur með unaðslegri eggjahræru og beikoni

Ég vaknaði í morgun með óstjórnlega mikla löngun í amerískar pönnukökur og einfaldlega varð að láta verða af því. Ég gerði líka eggjahræru með sem heppnaðist svo vel að ég ætla að skrifa hér niður uppskriftina, líka svo ég muni hana næst þegar ég geri þetta. Ég fjárfesti í gær í maple sýrópi sem er gjörsamlega ómótstæðilegt, það heitir Spring Tree pure maple syrup, það kostar sitt og passar kannski ekki alveg við tilgang þessarar síðu, þ.e. að vera með ódýra og góða rétti en ég bara varð að fá þetta, það er unaðslegt!
Pönnukökuuppskrift frá Vox mun fylgja aukablaði Fréttablaðsins næsta laugardag og mæli ég með henni en hér er uppskriftin af eggjahrærunni.

Unaðsleg eggjahræra
f/2
4 egg
50 ml mjólk(ég notaði léttmjólk)
1 tsk sojasósa
1 tsk óregano
1/2 tsk poultry seasoning
5 ostsneiðar
salt og pipar
smá smjörklípa til að steikja upp úr

Aðferð:
1. Hrærið öllu vel saman og steikið við meðalhita í smá smjöri og enn minni olíu, hrærið vel í en varlega þar til eggin eru örlítið þurr á að líta og ekki slepjuleg.

Berið fram með stökksteiktu beikoni(sem ég grilla alltaf í ofninum) og amerískum pönnukökum smurðum með smjöri og hellið nóg af sýrópi yfir. Mmmm.... mig langar í svona aftur í kvöld!

Spaghetti með kjötbollum

Ég var frekar súr í gærkvöldi þannig að eiginmaðurinn var svo indæll að taka að sér eldamennskuna. Við vorum búin að taka út kjöthakkið fyrir réttinn svo að það var ekki hægt að snúa frá settum plönum, þó hann hefði feginn viljað panta eldsmiðjupizzu sérstaklega þar sem við vorum ekki komin heim fyrr en um klukkan 19:00 um kvöldið. En hann tók sig saman og eldaði beint upp úr Silfurskeiðinni dýrindis spaghetti með kjötbollum(reyndar í bókinni er það Rigatoni með kjötbollum). Ég var svo stolt af honum og bókinni að sjálfsögðu!
En þar sem uppskriftin er úr bók, væri ekki gott af mér að setja hana hér inn, þannig að endilega kaupið bókina og eldið upp úr henni, ég mæli eindregið með henni!