Mataruppskriftir Sigurrósar

NÝTT!! Námskeið í matreiðslu grænmetis og hollra rétta

2011-02-08T10:10:00.001+01:00

Hollur matur á hagkvæman hátt
Á námskeiðinu fer Sigurrós vel yfir undirstöðuatriðin í matreiðslu grænmetis, grænmetisrétta, hollra rétta og einnig hvernig hægt er að breyta óhollustu í hollustu. Leiðbeint verður um hvernig hægt er að búa til hollan mat á hagkvæman hátt og hvernig gera má sér glaðan dag með lúxushráefni.

Sigurrós er matreiðslumaður að mennt og hefur unnið á fínum grænmetis- og fiskveitingastöðum bæði hér og erlendis og hefur viðað að sér mikilli þekkingu á hollum mat og heilbrigðum lífsstíl. Hún mun ljóstra upp „kokkaleyndarmálum“ og gefa ýmis góð ráð.

Þetta er námskeið sem hentar öllum, bæði fólki sem kann að elda og þeim sem hafa aldrei komið nálægt eldamennsku.

Kennari: Sigurrós Pálsdóttir - Matreiðslumeistari
Tími: Miðvikudaginn 02.mars kl. 18:00 - 20:00
Staður: Fræðslusalur Maður Lifandi Borgartúni 24
Skráning á netfangið: madurlifandi@madurlifandi.is
eða í síma 585 8701
Verð: 4.900 kr.

Hollar kökur- námskeið í Maður lifandi

2010-11-29T22:41:00.002+01:00

Sæl öllsömul
Ég mun vera með námskeið á fimmtudaginn milli klukkan 18-20 og mun ég taka hollar kökur fyrir. Gerð þeirra, hvernig er hægt að breyta óhollum kökum í hollar og tilganginn með þessu öllu saman.
Námskeiðið verður haldið í Maður lifandi í Borgartúni fimmtudaginn 02.12.2010 milli klukkan 18 og 20 og kostar 3900 kr.
Endilega kíkið á þetta mjög svo áhugaverða námskeið og bráðnauðsynlegt svona í jólaundirbúningnum.

Með kveðju
Sigurrós

Hin fullkomna samloka

2010-07-25T22:23:00.005+02:00

Þessi er fyrir þá sem eru til í sukk og svínarí par excelance. Ég fór algerlega í hið svokallaða óverkill svo ég leyfi mér að sletta aðeins. Ef ég hefði átt trufflur eða truffluolíu hefði ég legið í vímu í allt kvöld, þannig að þeir sem hafa efni á eða eiga inni í skáp endilega bæta því ofan á þessa.
Þessi samloka er engan veginn fyrir þá sem eru að hugsa um línurnar heldur fyrir þá sem vilja njóta þess sem þetta líf býður uppá, enda er ég að fara í einkaþjálfun eftir helgina og vildi aðeins smakka á síðasta smjörmatnum í dágóðan tíma. Ójá það er smjör í henni þessari,en þó ekki svo mikið að maður fái klígju heldur ákkúrat rétta magnið,oh það er svo gott...stundum....
Hér kemur hún, hin fullkomna samloka...fyrir þá sem þora!

Hin fullkomna samloka
f/2
4 brauðsneiðar,ég nota heimilisbrauð en auðvitað væri best að vera með glænýtt sveitabrauð,skorið í góðar sneiðar
250 gr sveppir
4 sneiðar beikon
1 skallottulaukur
1 hvítlauksrif
1 msk balsamik edik
2 skinkusneiðar
8 ostsneiðar
4 tómatsneiðar
Dijon sinnep
majónes
smjör og nóg af því
salt og nýmalaður pipar
2 tsk maple sýróp

Aðferð:
1.Skerið sveppina í sneiðar,saxið laukinn,skerið beikonið smátt,skerið tómatana í sneiðar og saxið hvítlaukinn.
2.Setjið góða matskeið af smjöri á pönnu yfir hæsta hita og þegar það fer að krauma er beikoninu bætt saman við og það steikt þar til það fer að brúnast aðeins. Bætið þá hvítlauk,skallottulauk og sveppum saman við og steikið þar til sveppirnir fara að brúnast vel,ca. 5 mín. Bætið þá balsamik edikinu útá pönnuna og látið það sjóða alveg niður og hrærið vel á meðan. Takið þá af hitanum og geymið.
3. Takið nú brauðsneiðarnar og smyrjið allar með dijon sinnepi(örþunnt þó) og svo með majónesi.Leggjið skinkusneiðarnar,ostinn og tómatana ofan á og lokið með brauðsneið.
4.Hitið 3 msk af smjöri á stórri pönnu sem hægt er að loka með loki(eða disk,eða hverju sem þið finnið í eldhúsinu,brauðbretti jafnvel),þegar það er bráðið er samlokan lögð á smjörið og látin drekka í sig smjör þeim megin og svo velt strax aftur á hina hliðina og þar er hún steikt við hæsta hita í 3 mínútur,þá er hitinn lækkaður í meðal háan hita og steikt áfram í 3 mínútur(passið að kíkja undir og athuga hvort hún sé nokkuð að brenna),þegar hún er tilbúin þeim megin er henni snúið við og hún er steikt áfram í 4-5 mínútur, allan tímann er lokið á pönnunni(til þess að osturinn bráðni).Þegar hún er alveg að verða tilbúin er einni tsk af maple sýrópi smurt á hvora samloku. Ef þið notið truffluolíu eða trufflur mæli ég með því að dreypa henni yfir sveppablönduna eða sneiða trufflurnar yfir samlokuna.ohh þvílíkur draumur það væri.
Berið fram samlokuna með steiktu sveppunum til hliðar, og njótið til fulls því maður leyfir sér ekki svona unað oft.

Magnaðir hamborgarar!

2010-04-22T12:25:00.007+02:00

Þar sem ég er í hollustunni alla daga var mig farið að langa verulega í grillaða hamborgara og svona til að friða samviskuna þá ákvað ég að fara með þetta alla leið og bakaði meira að segja brauðið líka! Útkoman var hreint út sagt mögnuð!! Ég reyndi að taka mynd af herlegheitunum en veit ekki alveg hvernig til tókst þar sem það var á símann minn, en vonandi kem ég henni hér inn.
En hér er uppskriftin og ég get alveg lofað ykkur að þessir slá í gegn og verða gerðir aftur í sólinni í sumar(er mjög bjartsýn á gott sumar að sjálfsögðu)

Gleðilegt sumar allir saman og endilega grillið þessa og hafið bjór við höndina, hann passar hrikalega vel við, þá sérstaklega einhver dökkur eða Kaldi.
Til þess að það sé auðveldara fyrir fólk að leita að þessu í framtíðinni þá ætla ég að setja þetta í nokkrar færslur hér inn,þá er hægt að googla þetta auðveldlega, sérstaklega ef þið viljið nota sósuna í eitthvað annað eins og ég ætla svo sannarlega að gera.

Magnaðir hamborgarar með heimatilbúnu brauði og heimatilbúinni BBQ sósu

Hamborgarabrauð
f/8
250 ml nýmjólk
200 ml rjómi
50 ml volgt vatn
7 gr þurrger
50 ml sykur
2 tsk salt
1 kg hveiti (afsakið, þetta kemur soldið seint þessi lagfæring;))

1 egg
2 tsk sesamfræ

Aðferð:
1. Sjóðið létt saman mjólkina og rjómann og kælið niður í 40-50°C(eða þegar putta er stungið í og ykkur þykir blandan aðeins heit)
2. Blandið saman þurrgeri og vatni og bíðið þar til það freyðir, þá getið þið notað hana. ef hún freyðir ekki er ráð að henda og búa til nýja blöndu.
3. Bætið volgri mjólkurblöndunni saman við ásamt sykri,hveiti og salti. Hrærið í hrærivél á lágum hitafyrst(með hnoðaranum)eða hnoðið með sleif, svo á aðeins hraðari og hnoðið í 6 mín.(ef þið gerið í höndunum þá þarf ekki endilega að hnoða í 6 mín.) eða þar til deigið er svolítið klístrað.
4. Færið yfir í skál sem hefur verið smurð með olíu og berið olíu yfir deigið. Setjið viskastykki yfir og látið hefast við stofuhita eða aðeins heitara í 2 tíma.
5.Hnoðið þá aðeins deigið og bætið hveiti saman við og fletjið út í 2 cm þykkan hring og skerið út 8 hringi, ef þið náið ekki alveg 8 hringjum(10 cm í þvermál) er í lagi að hnoða afgangana einu sinni til viðbótar og skera út rest.
6. Setjið á bökunarpappír og setjið olíusmurða plastfilmu yfir látið hefast í 1,5 tíma eða jafnvel 2 ef þið hafið tíma, við stofuhita eða inni í ofni, eins og ég geri. Þegar þau eru tilbúin eru þau smurð með þeyttu egginu og sesamfræjum stráð yfir og brauðin eru bökuð í forhituðum ofni við 190°C í 20-25 mín. Kælið. Svo eru þau skorin í tvennt og sárin smurð með olíu og grilluð í eina mínútu með sárið niður.
Þessi er svakaleg!! Ég mæli með henni á allt BBQ í framtíðinni sem þið munið nokkurn tíman gera, þessi er svona The Ultimate, ekki spurning!

Kaffikryddaðir hamborgarar

2010-04-22T12:12:00.002+02:00

Þetta kom mér svo skemmtilega á óvart að ég bara varð að deila þessu með ykkur. Ég gerði rétt um daginn sem var með kakói í og það kom svo vel út að ég hugsaði að það hlyti að vera það sama með kaffið. Ég notaði koffínlaust þar sem ég get ekki drukkið koffín og það kom ekki að sök. Bragðið verður svo djúpt og mjúkt við kaffið og rífur svo smá í við cayennapiparinn. Hreint æðislegt!

Kaffikryddaðir hamborgarar
f/5

Kaffikryddblanda
1 msk kaffi
2 tsk púðursykur
2 tsk pipar
1/2 tsk kóríanderduft
1/2 tsk oreganóduft
1/2 tsk salt
cayennapipar á hnífsoddi

Öllu blandað saman og stráð yfir hamborgarana áður en þeir fara á grillið og svo einnig á meðan þeir eru á grillinu.

Hamborgarar
f/5
1 kg nautahakk, passið að það sé hreint hakk, ekki með kartöflusterkju og vatni
salt og pipar

10 beikonsneiðar
10 cheddarostsneiðar

Aðferð:
1. Hnoðið hakkinu saman í borgara sem eru um 200 gr hver, ég reyndar gerði fyrir mína fjölskyldu um 160 gr það var alveg nóg fyrir okkur en þetta er smekksatriði
2. Steikið beikonið, ég grilla það í ofni á bökunarpappír, þá er ekki eins mikil bræla sem kemur af því.
3. Grillið borgarana og passið að setja kryddblönduna á meðan og svo þegar þið snúið borgurunum á seinni hliðina þá setjið þið ostsneiðarnar yfir þannig að þær bráðni.
Grillið þá þar til þið sjáið blóð koma upp úr sprungum á seinni hliðinni, fyrir medium borgara.

Setjið saman:
Hafið tómatsneiðar,salat,beikon og sósu til taks fyrir fólk að setja borgarana saman sjáft eftir smekk.
Gott að bera fram með heimatilbúnum frönskum kartöflum.

Texas BBQ sósa

2010-04-22T11:32:00.004+02:00

Texas BBQ sósa
f/8 hamborgara
1 msk smjör
1 hvítlauksrif,kramið
200 ml tómatsósa(ketchup)
70 ml púðursykur
70 ml Worcestershire sósa
50 ml sítrónusafi
1 chillialdin, ég setti bara smá með fræjum en þeir sem vilja hafa hana heita setja heilann
1/4 tsk cayennapipar

Aðferð:
1.Bræðið smjörið í meðalstórum potti við meðalhita,bætið hvítlauk saman við og hrærið í 30 sekúndur. Bætið tómatsósu saman við ásam restinni af hráefninu. Látið sjóða. Lækkið hitann í meðal-lágan og látið malla þar til sósan er þykk og bragðmikil eða kemst í 270 ml glas, ca 15 mín., hrærið af og til á meðan. Saltið og piprið. Kælið.
Athugið að hægt er að geyma sósuna í kæliskáp í lofttæmdum umbúðum í viku.

Bragðmildur karrý-kókosréttur tilvalinn fyrir krakkana

2010-04-13T22:21:00.003+02:00

Ég gerði þennan rétt í kvöld og þegar ég var að elda hann þá grátbað dóttir mín mig um að hafa hann ekki bragðsterkan, svo að ég ákvað að verða við þeirri bón en hann var alveg svakalega góður og allir fengu sér aftur og aftur á diskinn. Málið var nú eins og venjulega hjá mér þessa dagana að það var ekkert til í ískápnum, eða svo fannst mér en fann þetta og hitt og þetta var útkoman. Maður lumar jú alltaf á einhverjum kryddum í skápunum hjá sér og nýtti ég mér það að þessu sinni.

Karrý-kókos grænmetisréttur
f/4
1 lítil sæt kartafla
7-8 litlar gulrætur
1 laukur
1 sellerístöngull
1/4 paprika,rauð
2 hvítlauksrif
1 cm engiferrót
1 cm chillialdin(það er greinilega mjög milt í búðunum núna og þetta var þar engin undantekning,ég smakka það alltaf áður en ég set það út í réttinn)
2 tsk karrý
1 tsk kóríander
1 tsk engifer
1 kjúklinga/grænmetiskraftur
1 dós niðursoðnir tómatar
1 dós kókosmjólk
olía til steikingar

Aðferð:
1. skerið laukinn í sneiðar,saxið selleríið,hvítlaukinn,engiferið og chillialdinið og steikið létt á pönnu í olíu. Bætið kryddunum saman við og brennið létt á pönnunni þar til ilmar vel.
2. skerið restina af grænmetinu í franskar og bætið saman við, steikið létt. Bætið þá tómötunum og kókosmjólkinni saman við þannig að rétt fljóti yfir, bætið kraftinum saman við. Setjið lok á pönnuna og sjóðið við meðal-lágan hita í 40 mínútur eða þar til grænmetið er meyrt. Saltið og piprið eftir smekk.
Berið fram með annað hvort linsubaunum eða hrísgrjónum. Einnig er hægt að bæta baununum saman við.

Afsakið hlé

2010-03-21T21:11:00.002+01:00

Nú hef ég vanrækt þessa síðu ansi lengi því miður en ég hef ágætis afsökun fyrir því get ég sagt ykkur.
Ég var að taka við yfirkokkastöðu á Maður Lifandi og er búin að eyða síðustu tveimur vikum í tilraunastarfsemi heima við fyrir þann stað og hef því ekki getað sett inn neinar uppskriftir fyrir ykkur.
Ég býst við því að næsta vika verði eins en eftir það vona ég að ég geti farið að setja hér inn eitthvað spennandi og ótrúlega gott.
Góðar stundir
Sigurrós

Súkkulaði-og ostaköku-brownies

2010-01-29T00:40:00.005+01:00

Mig langaði til að gera brownies en hafa eitthvað öðruvísi og þá fann ég þessa hugmynd, ég reyndar breytti aðeins uppskriftinni eftir mínum smekk og hún er algjört dúndur, ég bara get ekki hætt að borða þetta, ætli þetta sé ávanabindandi, það er spurning.
Ef þið viljið bombu þá prófið þessa!

Súkkulaði og ostakökubrownies
gerir 16 kökur

Fyrir browniesdeigið

120 gr suðusúkkulaði
110 gr 70% súkkulaði, gróft saxað
3 msk smjör
1 tsk vanilludropar
300 ml sykur
195 ml hveiti
3 egg

Fyrir ostakökudeigið

230 gr rjómaostur,mjúkur
1/4 tsk vanilludropar
70 ml sykur
1 eggjarauða

Aðferð:
1. Hitið ofninn í 180°C og smyrjið 20 cm ferkantað form
2. Bræðið smjörið og suðusúkkulaðið saman í vatnsbaði, þegar það er bráðið er sykrinum, vanillunni og eggjunum hrært saman við, þá er hveitinu bætt saman við og síðast söxuðu 70% súkkulaðinu. Hellið mestu deiginu í formið og geymið eins og 2 msk.
3. Gerið ostakökudeigið: hrærið saman rjómaosti,vanilludropum,sykri og eggjarauðu með sleif og setjið stóra dropa af því jafnt yfir súkkulaðideigið. Setjið svo restina af súkkulaðideiginu í dropum yfir ostakökudeigið og farið svo yfir með beittum hníf þannig að þið búið til skraut úr deiginu. eins og í marmara
4. Bakið við 180°C í 25-35 mínútur, eða þar til jaðarnir á kökunni hafa lyfts og hún hefur rétt sest í miðjunni.

Kjúklingasalat með pasta,rucola,feta,ólífum og dressingu

2010-01-20T22:13:00.004+01:00

Ég átti eina og hálfa kjúklingabringu eftir frá kvöldverðinum í gær og þurfti að nýta það án þess að búa til samlokur, þar sem ég er komin með nóg af þeim í bili. Þá ákvað ég að búa til salat og drygja það með alls konar gúmmulaði.
Salatið er mjög gómsætt og þeim sem þykir beikon gott ættu að bæta því við hér, ég átti það ekki til og það er mjög gott án þess líka.
Ég átti líka afgang af dressingunni sem ég gerði um daginn og passar hún sérstaklega vel við.

Kjúklingasalat með pasta,rucola,feta,ólífum og dressingu
f/4
1,5 kjúklingabringa
1 túnfiskdós,olíunni/vatninu hellt af
2 tómatar, skornir í sneiðar
1/2 krukka ólífur
1/2 krukka fetaostur
1/2 bakki af rucolasalati
200 gr pastaslaufur
1 poki pecanhnetur
1/2 tsk red pepper flakes
2-3 msk teryaki sósa
flögusalt
dressing

Aðferð:
1. Sjóðið pastað og kælið undir rennandi vatni, látið renna vel af
2. Takið fram stóra skál og setjið fetaostinn,ólífurnar,tómatana, salatið, niður brytjaðann kjúklinginn, pastaslaufunum og túnfiskinn.
3. ristið hneturnar með red pepperflakes og hellið svo teryakisósunni yfir og látið sjóða niður þar til hún er orðin þykk, tekur nokkrar sekúndur(passið að anda ekki að ykkur yfir pönnunni þegar piparflögurnar eru að steikjast þær erta soldið hálsinn). Kælið og dreifið yfir salatið.
4. Blandið salatinu saman og saltið með flögusalti og setjið um 3 msk af dressingunni og dreifið hnetunum yfir, svo er gott að bera fram aukadressingu með ef fólk vill hafa meiri dressingu ásamt flögusaltinu.

Dressing:
Dressing:
2 msk balsamico edik
4-5 msk ólífuolía
1 tsk sinnep
1 msk púðursykur

Aðferð:
1.Notið helst töfrasprota til þess að gera hana þykka, þá er olíunni hellt varlega saman við edikið og púðursykurinn og hrært í á meðan svo er sinnepinu bætt saman við.

Saltfiskur miðjarðarhafsstyle

2010-01-14T14:02:00.002+01:00

Ég henti í þennan í gær og hann var þvílíkt lostæti og alveg sérstaklega góð leið til að koma fisk ofan í ungviðið. Fullt af grænmeti og bragði. Tekur kannski smá tíma að skera allt niður og steikja en það er þess virði.

Saltfiskur miðjarðarhafsstyle
f/6
1200 gr saltfiskur, skorinn í stóra skammta/bita
2 dósir af tómötum í dós
1/2 græn paprika, skorin í litla ferninga
1/2 rauð paprika,skorin í litla ferninga
1 rauðlaukur, skorinn í sneiðar
1/2 laukur, skorinn í sneiðar
2 gulrætur, skornar í litla ferninga
1/2 sellerístilkur, saxaður mjög smátt
600 gr kartöflur, skornar í sneiðar ca.1 cm
3 msk balsamic edik
2 tsk sinnep
rifinn ostur
1 krukka svartar ólífur, teknar í tvennt
hveiti til að velta uppúr
3 hvítlauksrif
pipar

Aðferð:
1. Skerið fiskinn og grænmetið eins og sagt er á undan.
2. Hitið pönnu og veltið fisknum uppúr hveiti og dustið allt aukahveiti af og steikið uppúr smá olíu. Takið af pönnunni og setjið í eldfast mót, steikið þá grænmetið og í annarri pönnu kartöflurnar.
3. þegar grænmetið er léttsteikt er edikinu bætt útí og látið sjóða niður þá er tómötunum bætt saman við ásamt sinnepinu og pipar. Látið aðeins malla þar til kartöflurnar eru léttbrúnaðar að utan.
4. Þá eru kartöflunum dreift ofan á og í kringum fiskinn og svo er tómatsósunni bætt ofan á og svo ólífum og síðast rifnum osti dreift yfir og bakað í ofni við 200°C í 25 mínútur.
Berið fram með fersku salati

Matseðill fyrir vikuna 11.01-17.01

2010-01-14T11:07:00.002+01:00

Smá breytingar á matseðli, ég fékk nefnilega óvæntan reikning inn um lúguna og þarf því að nýta allt sem til er í ísskápnum og fæ ekki að fara í búðina fyrr en í næstu viku. Þess vegna verður lítið um grænmeti og ávexti, því miður er þetta bara svo dýrt, ætli maður geti nú ekki endalaust kvartað undan því á þessu skeri, ætla nú samt að halda í vonina um að einhvern daginn muni þetta vera niðurgreitt af ríkinu fyrir neytandann, wishful thinking...
Ég fékk hamborgarahrygg í jólagjöf og vildi ekki láta hann skemmast þannig að ég sauð hann og skar svo í bæði álegg og líka til að hafa kalt með kartöflusalati og setti í skammta og inn í frysti, þannig að það verður nýtt.
Ég verð nú líka aðeins að kvarta undan íslensku skinkunni, ég skil ekki hvers vegna það er ekki hægt að gera þetta eins og Ítalirnir, ég meina svín eru svín ekki satt?
Hvers vegna erum við svona rosalega mötuð af skinkunni, við fáum ekki að ráða þykktinni, ekki stærðinni og ekki hversu mikið við kaupum af henni, af hverju þarf að ákveða þetta fyrir okkur?
En jæja matseðillinn er því á þessa leið

fimmtudagur
pastasalat með hamborgarahryggsskinku, fetaosti og einhverju gúmmulaði sem ég finn

Föstudagur
Við erum svo lukkuleg að vera boðin í mat þetta kvöld

Laugardagur
hamborgarahryggsskinka og kartöflusalat

Sunnudagur
Lasagna tekið úr frystinum er einmitt fyrir svona vikur!

ofnbakaður kjúklingur með sveppum,beikoni og kartöflum

2010-01-13T16:03:00.003+01:00

Ég gerði þennan í miklum flýti og hann heppnaðist ljómandi vel, hentar þeim sem hafa lítinn tíma til að búa til matinn en hafa tíma til að láta hann malla sjálfan inni í ofni.

Kjúklingur með beikoni, sveppum og kartöflum
f/5
1 heill kjúklingur
4-500 gr kartöflur, skornar í fernt
1 rauðlaukur, skorinn í sneiðar
1/2 bakki sveppir, skornir gróft í fernt
3 msk fljótandi kjúklinga eða kalkúnakraftur(bouillon)
salt og pipar
2 tsk poultry seasoning
5 beikonsneiðar
smá vatn

Aðferð:
1. Setjið kraftinn og smá vatn í botninn á roastin pan eða ofnskúffu
2. Leggjið kjúklinginn ofan í og dreifið kartöflum,lauk og sveppum í kring, kryddið kjúklinginn með salti og pipar og poultry seasoning og leggjið síðast beikonsneiðarnar yfir og setjið inn í ofn við 180°C í klukkutíma.
Gott að bera fram með salati.

Matseðill fyrir vikuna 11.01-17.01

2010-01-11T20:43:00.003+01:00

Síðasta vika fór nú eitthvað í rugl svona um kvöldmatartímann sem gerði það að verkum að helmingurinn af því sem ég hafði ákveðið að búa til var ekki búið til en þá var því sem átti að nota bara hent í frystinn og verður notað í þessari viku eða seinna, eins og gengur og gerist bara.
Vonandi verður þessi vika eins og hún er plönuð en mig langaði hins vegar að segja ykkur frá því að ég fór í búðina með innkaupalista fyrir þessa rétti sem ég hafði ákveðið og við fórum ekkert í búðina fyrir utan þetta eina skipti og ég get sagt ykkur það að útgjöld þeirrar viku lækkuðu um helming ef ekki meira!
Það verður eitthvað flakk á okkur áfram í þessari viku þannig að ég ætla að búa til matseðil sem auðvelt er að breyta ef eitthvað kemur uppá.
Ég gerði aftur á móti kjúkling á mánudaginn sem kom mjög vel út og alveg fáránlega fljótlegur. Ég nefnilega hafði engan tíma til að elda og eiginmaðurinn í gamlingjabolta og ég þurfti að vera að skutlast hingað og þangað þannig að þetta endaði svona en sem betur fer var þetta afar gómsætt.

Matseðill fyrir vikuna 11.01-17.01

Mánudagur
kjúklingur og kartöflur með lauk, beikoni og sveppum

Þriðjudagur
samlokur

Miðvikudagur
saltfiskur miðjarðarhafsstyle

Fimmtudagur
pastasalat, ætli það verði ekki bara rifið úr ísskápnum það sem til er!

Föstudagur
Ætla að reyna aftur við lambaskankana, sjáum hvort ekki verði af því þennan daginn

Laugardagur
ætla að hafa allt opið þennan daginn

Sunnudagur
er ekki best að hafa pizzudag?!

Matseðill f.05-01.2010 til 11.01.2010

2010-01-05T21:52:00.002+01:00

Jæja þá hef ég sett saman fyrsta matseðil ársins þar sem maður þarf verulega á því að halda að halda aftur að sér peningalega séð eftir fyllerí jólanna. Þar sem ég er þess fullviss um að ég borði heilbrigðan mat þá ætla ég nú ekki að fara að fylla þessa síðu af endalausum salötum eftir jólahlaðborðið, onei, ég mun halda áfram að setja inn hollar og góðar uppskrftir það er jú ennþá fimbulkuldi úti svo að við þurfum á mat að halda, salötin mega bíða sumarsins. Ég er sumarmanneskja í flestu nema mat, þar finnst mér hreint unaðslegt að verma hjarta mitt og sál með heitri súpu eða hægelduðu lambi og held því áfram að gera eitthvað skemmtilegt í þeim efnum. Ég hef þó tekið eftir auknum áhuga hjá lesendum mínum á bakstri og þar sem ég er í fæðingarorlofi og skemmti mér gríðarlega við að baka eitthvað gómsætt þá verður augljóslega eitthvað af því líka á næstu misserum.

Matseðill 05.01-11.01

Mánudagur
afgangur af kjúklingasúpunni með núðlum

Þriðjudagur
lasagna

Miðvikudagur
Miðjarðarhafssaltfiskur

Fimmtudagur
Brasseraðir lambaskankar með kryddblöndu, sveskjum og bjór

Föstudagur
Pastasalat

Laugardagur
Grísalundir úr Melabúðinni(korngrís fáránlega góður) með gráðostasósu og frönnum(beisik)

Sunnudagur
Pizzadagur!

Karrýlöguð kjúklingasúpa með kókosmjólk, eplum og kóríander

2010-01-03T21:57:00.004+01:00

Þessi er algjört æði! Mér var skipað að tölvunni til þess að skrifa niður uppskriftina þar sem þetta sló í gegn. Hún er einföld eins og flest sem ég geri, ódýr og fljótleg, fyrir utan suðutímann sem er um 30 mínútur. Mann langar til að fá sér meira og meira og meira. Er alveg að spá í að fá mér smá þegar ég hef sett inn uppskrftina.
Nú er flensutíð og þetta á að vera mjög gott til varnar henni og einnig hlýnar manni öllum að innan við að borða heita og unaðslega súpu.

Karrýlöguð kjúklingasúpa með kókosmjólk,eplum og kóríander
f/4-5
1 heill kjúklingur,skorinn í leggi,bringur, vængi og botninn settur í súpuna en svo tekinn úr
2 msk karrý
2 msk smjör, má vera smjörvi
1/2 paprika, rauð, skorin í bita
1/2 epli, skrælt og skorið í bita
1 lítill laukur(1/2 stór), skorinn í sneiðar
2 hvítlauksrif, skorin í sneiðar
örlítill stjörnuanís, má sleppa
2 gulrætur, skornar í bita
5 vorlaukar eða 1/2 púrrulaukur, skorinn í sneiðar
3 msk ferskur kóríander, saxaður(má sleppa, en ég mæli eindregið með honum)
1 dós kókosmjólk
vatn
1 kjúklingakraftur
Salt og pipar

Aðferð:
1. Takið fram stóran,djúpan pott, bræðið smjörið og bætið karrýinu saman við og látið malla aðeins, bætið þá öllu söxuðu grænmetinu saman við og léttsteikið
2. Takið mestu fituna og skinnið af kjúklingnum og léttsteikið hann einnig og hellið svo vatni yfir þannig að rétt fljóti yfir. Bætið svo kókosmjólkinni og sjóðið í 30 mínútur.
Smakkið til með salti og pipar og berið fram með söxuðum kóríander.
Aths. Ég tek kjúklinginn uppúr og sker hann í bita og set aftur ofan í og hendi beinunum til þess að það sé auðveldara fyrir krakkana að borða súpuna og svo er það líka þægilegra fyrir afgangana daginn eftir.

Marengstoppar fylltir með fílakaramellu-súkkulaðimús

2010-01-01T17:11:00.008+01:00

Ég átti að sjá um eftirréttinn á gamlársdag og ákvað að vera með Toblerone ís, fékk uppskrift hjá tengdamömmu og svo kom í ljós að ísinn var meiriháttar auðveldur þannig að mér fannst ég þurfa að gera eitthvað meira og þar að auki átti ég þá 14 eggjahvítur eftir alla ísgerðina um hátíðarnar og ég bara hafði það ekki í mér að henda þeim í ruslið. Ég henti því í marengstoppa og ætlaði að láta það duga en svo bara einhvern veginn byrjaði þetta að gerjast í hausnum á mér og svo varð úr að ég ákvað að fylla þetta með einhverju sem væri fáránlega auðvelt að gera og úr varð súkkulaðimús, ég reyndar notaði afganginn af súkkulaðikaramellunum og bræddi þær og bætti svo meira súkkulaði við til að nota sem massann í súkkulaðimúsina og það var hreint út sagt guðdómlegt! Ég held samt sem áður að það sé líka alveg rosalega gott með einfaldri súkkulaðimús þannig að ég set hér inn uppskrift af því. Þessi marengs sem ég gerði varð holur sjálfkrafa og ég sprautaði þeim mjög nálægt hvor öðrum þannig að þegar ég þurfti að taka þá í sundur þá myndaðist smá gat á hliðinni þar sem ég gat sprautað súkkulaðimúsinni inní. Gestirnir spurðu mig oft að því hvort þetta væri ekki rosalega mikið mál en það lítur nefnilega þannig út en plúsinn er að það er það alls ekki! Þannig að þú getur boðið uppá þetta í matarboði og fólk á eftir að úa og aa og halda að þú hafir staðið sveitt yfir þessu en þá er þetta bara rosalega auðvelt! En ef það myndast ekki gat á þeim er hægt að skera toppana í tvennt og setja músina á milli. Ég gerði súkkulaðimús úr afgangi af súkkulaðikaramellunum sem ég gerði fyrir aðfangadag, en ég hafði gleymt nokkrum inni í ísskáp, en það er auðveldlega hægt að kaupa fílakaramellur og bræða þær ásamt súkkulaði til að setja í músina.

Púðursykursmarengstoppar
(2 ofnplötur) f/10-12 manns
8 eggjahvítur
200 gr sykur
200 gr púðursykur

Aðferð:
1. Hitið ofninn í 120°C
2. Stífþeytið eggjahvíturnar og bætið svo sykrunum saman við og þeytið í 8-12 mínútur.
3. Setjið í sprautupoka og sprautið toppa á bökunarpappír frekar nálægt hvor öðrum.
4. Bakið í 50-60 mínútur og hækkið hitann í 150°C síðustu 10 mínúturnar, kælið í ofninum annað hvort rétt aðeins opnum eða lokuðum.

Fílakaramellu-súkkulaðimús
f/toppa fyrir 10-12 manns
4-5 fílakaramellur
150 gr súkkulaði, má vera hvaða súkkulaði sem er en best væri 56%
200 ml rjómi
400 ml rjómi, léttþeyttur

Aðferð:
1. Bræðið súkkulaðið og 200 ml af rjóma saman í potti, kælið
2. Léttþeytið rjómann og blandið svo saman þegar súkkulaðið er orðið kalt.
3. setjið í sprautupoka með mjóum stút og sprautið inn í toppana.

Pasta með steiktum harricot verte baunum og balsamicdressingu

2009-12-30T15:09:00.002+01:00

Ég er í einhverju pastastuði þessa dagana, kannski vegna þess að það er langt síðan ég hef haft það og hátíðamaturinn þetta árið sem önnur þungur í maga og þarf aðeins að létta á þessu öllu saman.
Ég henti í eitt salat í gær með þessari frábæru dressingu, svo langaði mig að fá smá Ítalíufílíng í kroppinn og steikti því strengjabaunir með extra virgin ólífuolíu og maldonsalti, þar til þær verða léttbrúnar, það er fáránlega gott, soldið eins og snakk.
Venjulega þegar ég geri svona salat með pasta hef ég enga dressingu en í þetta skiptið ákvað ég að breyta til og það heppnaðist svona líka dásamlega.

Pasta með steiktum harricot verte baunum og balsamic dressingu
f/4
400 gr pasta
200 gr strengjabaunir(harricot verte)
6 kirsuberjatómatar eða konfekttómatar, skornir í fernt
3 msk fetaostur
3 msk ólifur, skornar í tvennt
3-4 sneiðar beikon
2 tsk sýrður rjómi
2 tsk majónes
salt og pipar

Dressing:
2 msk balsamico edik
4-5 msk ólífuolía
1 tsk sinnep
1 msk púðursykur

Aðferð:
1. Steikið baunirnar mjög vel í slatta af olíu og smá maldon salti, þar til þær eru létt brúnaðar. Á meðan er beikonið steikt í ofninum(setjið á smjörpappír og grillið) og vatn sett yfir fyrir pasta.
2. Sjóðið pasta og létt kælið það.
3. Setjið allt í skál fyrir utan dressinguna og blandið létt saman
4. Gerið dressinguna: Notið helst töfrasprota til þess að gera hana þykka, þá er olíunni hellt varlega saman við edikið og púðursykurinn og hrært í á meðan svo er sinnepinu bætt saman við.
Blandið saman við pastað eftir smekk. Sumir vilja hafa mikið aðrir lítið, læt ykkur ráða því.

Rjómapasta með fetaosti og beikoni

2009-12-29T16:06:00.005+01:00

Ég verð nú að viðurkenna að ég var eilítið þvinguð til þess að setja hér inn þessa uppskrift, þeim fannst hún svo góð heimilisfólkinu mínu. Þannig er það nú með mig að ég vil helst ekki elda neitt með rjóma, ég er ekki mikið fyrir hann og rjóma pasta þykir mér frekar vera amerískt afbrigði af pastarétti en nokkurn tímann ítalskt, sérstaklega þar sem maður átti verulega erfitt með að finna rjóma í búðum á Ítalíu vegna einmitt þess að þeir nota hann afar sjaldan og enn sjaldnar með pasta. Þess vegna hef ég einbeitt mér að því að búa til pastarétti sem eru ferskari og léttari en rjómapasta en jæja ég átti rjóma inni í ísskáp eftir hátíðarnar, þar sem ég var með ís í eftirrétt og vegna þess að þetta er mjög dýrt hráefni ákvað ég að nota þetta í stað þess að henda í ruslið. Ég reyndar gerði mér grein fyrir því að ísskápurinn var því sem næst tómur en náði þó að henda í þennan rétt og kom svona líka vel út. Hér eru þó engin geimvísindi á ferð en ég set þetta inn samt sem áður.

Rjómapasta með fetaosti og beikoni
Fyrir litla sæta fjölskyldu

200 ml rjómi
1 msk fetaostur
2 tsk sýrður rjómi
2 gulrætur, skornar í 1 cm ferninga
1/2 lítill laukur, saxaður
4 beikonsneiðar, skrornar í litla bita
1/2 nautakraftsteningur
salt og pipar
smá smjörklípa
Spaghetti eða pasta(ég geri ráð fyrir 100 gr á svangan fullorðinn í aðalrétt og 50 gr á litlu músina mína en venjulegt barn borðar um 70 gr)

Aðferð:
1. Skerið og saxið lauk, gulrætur og beikon og léttsteikið upp úr smjörklipu í potti.Bætið þá rjómanum, ostinum og sýrða rjómanum saman við ásamt kraftinum, salti og pipar og látið sjóða vel niður í ca 10-15 mínútur, þar til sósan er þykk og ljúffeng.
2. Sjóðið pastað eða spaghetti á meðan og berið farm með brauði

Það er hægt að segja að þessi sé ein af þessum fljótlegu og einföldu uppskriftum þetta tók mig ekki meira en 15 mínútur að búa til.

Súkkulaðikaramellur hjúpaðar súkkulaði

2009-12-21T18:49:00.003+01:00

Ég prófaði loksins að gera þessar og sem betur fer því þær eru guðdómlegar! Ef ykkur finnast fílakaramellur góðar þá þykir ykkur þessar klikkaðar! Það var líka miklu minna mál að búa þær til heldur en ég hélt, það eina sem maður þarf alveg pottþétt er réttur hitamælir(tékkið á því með því að mæla sjóðandi vatn), en ég komst að því að minn er 2 gráðum of lár. Maður ræður alveg hvort maður hjúpar þær eða ekki en ég var eitthvað stressuð yfir að þær yrðu of harðar og sauð þær aðeins of stutt sem gerði það að verkum að hún varð of mjúk en ég reddaði því bara með því að setja hana inn í kæli og skera kalda í litla bita, bræða súkkulaði og dýfa hverjum og einum þar í. Soldið tímafrekt þar sem ég vildi hafa bitana litla en ekki flókið ferli. Það tók mig 1 klst að hjúpa allt og ætli það hafi ekki tekið mig 45 mínútur að búa til karamelluna og þar fór mesti tíminn í að bíða eftir að karamellan yrði nægilega heit með því að standa yfir pottinum með hitamælinn. Karamella getur brunnið mjög hratt þannig að ég mæli með því að fylgjast vel með og standa yfir pottinum(góður tími til að taka símaspjall við einhvern sem þú hefur ekki heyrt í lengi).
Ég notaði bara suðusúkkulaði og fannst það ekkert verra en hefði ég notað fínna súkkulaði en ég mæli með því að nota aðeins súkkulaði sem er undir 70%.
Saltið í þeim kemur með skemmtilegt surprise í munninum, ég veit ekki með ykkur en alltaf þegar ég borða snakk þá tek ég mér hlé á milli til að borða súkkulaði og hafið þið smakkað popp blandað með Nóa kroppi? Það er svakalega gott. Þetta er svipaður fílingur fyrir utan að ég notaði svakalega lítið salt og það verður að vera milt salt eins og Maldon, þá kemur smávegis hint af salti, æðislegt! Hins vegar ef þið eigið ekki Maldon og notið það ekki að staðaldri verið þá ekkert að kaupa það til að nota aðeins 1 tsk, sleppið því bara, þær eru alveg jafn góðar.

Súkkulaðikaramella með maldonsalti og súkkulaðihjúpaðar

400 ml rjómi
300 gr súkkulaði(suðu)undir 70%, fínt hakkað
350 ml sykur
100 ml ljóst sýróp
50 ml vatn
1/4 tsk salt, maldon
1,5 msk smjör, skorið í bita
2 tsk maldon salt
20,3 cm ferkantað form, 2 lengjur af smjörpappír, leggjið smjörpappírinn þannig að fljóti yfir barmana og svo aðra lengju í hina áttina

Aðferð:
1.Sjóðið rjóma í 1 ltr potti við meðal hita. Minnkið hitann og bætið súkkulaðinu saman við, látið standa í 1 mínútu og hærið svo þar til súkkulaðið er alveg bráðið.Takið af hita.
2. Látið suðuna koma upp á sykrinum,sýrópinu, vatni og salti í 5 ltr potti við meðalhita. Hrærið þar til sykurinn hefur alveg leysts up. Sjóðið án þess að hræra þartil sykurinn er djúp gullinn, ca 10 mín.
3. Hallið pottinum og hellið súkkulaðiblöndunni varlega saman við(blandan bullar mjög mikið). Haldið áfram að sjóða þar til blandan nær 124°C, ca 15 mín.
4. Bætið þá smjöri saman við og hrærið þar til það hefur blandast vel saman við.
5. Hellið strax í form(ekki skrapa botninn á pottinum).
6. Látið standa í 10 mínútur og stráið þá ca 1/2-1 tsk af maldon salti yfir. Kælið alveg í forminu í ca 2 tíma. Snúið karamellunni við á hreint skurðarbretti og takið bökunarpappírinn af, snúið þá karamellunni upp með saltið upp og smyrjið örlítilli olíu á beittan hníf og skerið í 3 cm bita.

Ef þið viljið hjúpa með súkkulaði þá breytti það ekkert rosalega miklu máli hvort ég var með suðusúkkulaði eða 56% þannig að suðu gengur alveg og ég notaði ca. 300 gr til að hjúpa allar.

Þriggja hæða súkkulaði og marengskaka með mokkarjóma og karamellu

2009-12-14T15:18:00.004+01:00

Já þetta er massívur titill enda massív kaka get ég sagt ykkur. Ég hef nú gert hana fyrir tvö afmæli og hún var enn betri í seinna skiptið. Hún lítur líka mjög grand út og fólk heldur að maður hafi verið að baka þetta í heillangan tíma en viti menn það er ekkert mál að vippa þessari saman. Ég bakaði súkkulaðibotninn 2 vikum fyrir afmælið, plastaði hann vel og frysti og marengsinn er einnig hægt að geyma í 2 vikur í lofttæmdum umbúðum, svo að það eina sem þarf að gera á daginn sem hún er borin fram er að gera rjómann og setja hana saman, sem tók mig um 10 mínútur.
Ég mæli svo sannarlega með að þið prófið þessa næst þegar ykkur langar í svakalega köku! eða þurfið að slá fólk út af laginu í einhverju kaffiboðinu eða saumaklúbbnum.
Uppskriftin á eftir að líta út fyrir að vera flókin en þegar þið byrjið þá er hún það alls ekki. Hins vegar má geta þess að marengs tekur langan tíma í ofni, þannig að ef þið ætlið að gera þessa köku á einum degi eða alla í einu þá þarf að byrja snemma, þó svo að vinnan sé lítil er hún kannski tímafrek í ofninum, en þá er bara hægt að taka til á meðan;) já eða fara í vinnuna.

Þriggja hæða súkkulaði-og marengskaka með mokkarjóma og karamellu
(Kakan er samansett þannig að neðsta lagið er súkkulaðibotn,rjómi,marengsbotn,rjómi og karamella,marengsbotn rjómi og karamella)

Súkkulaðibotn
(1 botn)
100 ml sjóðandi vatn
75 ml ósætt kakóduft(ekki hollenskt)
50 ml mjólk(helst nýmjólk)
1/2 tsk vanilludropar
200 ml hveiti
rúmlega hálf teskeið matarsódi
salt á hnífsoddi
113 gr smjör, mjúkt(ég mýkti það með því að kremja það á milli fingranna)
125 ml púðursykur
75 ml sykur
4 stór egg

Aðferð:
1. Hitið ofninn í 180°C. og smyrjið 23 cm hringform og setjið smjörpappír í botninn og dustið með hveiti.
2.Blandið saman kakó og sjóðandi vatni þar til það glansar og bætið þá mjólk og vanillu saman við.
3. Sigtið saman hveiti , matarsóda og salti í annarri skál.
4. Þeytið saman smjör og báðar tegundirnar af sykri með rafmagnsþeytara(eða í vél)þar til það er ljóst og létt og bætið þá eggjum saman við einu í einu og pískið vel saman eftir hvert egg. Þeytið þá saman við hveiti og kakóblöndunum til skiptis og byrjið og endið á hveitiblöndunni(deigið gæti litið út fyrir að hafa skilið).
5. Setjið deigið í formið og bakið í 20-25 mínútur eða þar til prjónn sem stungið er í miðju kökunnar kemur út hreinn. Takið út og kælið á grind og takið svo úr forminu og kælið alveg. Hægt er að geyma botninn vel plastaðann við stofuhita í tvo daga eða í fryst í viku(jafnvel meira en þá gæti hún orðið soldið laus í sér).

Púuðursykurs-og kornflexmarengs
(2 botnar)
4 eggjahvítur
100 gr sykur
100 gr púðursykur
70 gr kornflex
1/2 tsk lyftiduft

Aðferð:
1. Hitið ofninn í 150°C og setjið smjörpappír í hliðarnar á tveimur 23 cm hringsmelluformum og setjið á ofnplötur með smjörpappír(enn betra ef þið eigið sílíkonform, eða sílíkonmottur en passið að það sé í sömu stærð og súkkulaðibotninn)
2. Stífþeytið eggjahvíturnar. Bætið sykrum útí og þeytið í 8-12 mínútur.
3. Myljið kornflexið(gott að setja það í lítinn nestispoka og mylja með kökukefli)
og hrærið varlega saman við eggjahvíturnar ásamt lyftiduftinu.
4. Setjið helminginn í hvort form og sléttið vel úr.

Bakið við 150°C í klukkutíma og látið kólna í ofninum, passið að opna ekki ofninn fyrr en ofninn er orðinn alveg kaldur(annars gæti marengsinn fallið).
Aths. ef hann fellur er það í lagi en setjið þá bara minna af rjómanum þegar kakan er sett saman.

Karamellusósa
150 ml sykur
50 ml vatn
1,5 msk smjör
100 ml rjómi

Aðferð:
1. Setjið sykur og vatn á pönnu og þegar hann er orðinn nokkuð brúnn er smjörinu bætt saman við(blandan mun bulla rosalega) og síðast rjómanum.
Það er einnig hægt að gera þetta í potti en þá tekur það lengri tíma fyrir sykurinn að brúnast.
(ég geri tvöfalda uppskrift og geymi karamelluna til að hafa með ís eða ef einhver vill auka á kökuna, svo er bara svo gott að vera með karamellusósu í ísskápnum, alltaf tilbúna, hún geymist svo rosalega lengi)

Mokkarjómi
500 ml rjómi
2 msk(kúfaðar)vanilluskyr, þetta græna ekki skyr.is það passar ekki(prófaði það)
50 gr(5 msk kúfaðar)flórsykur
1 msk espresso kaffi(sterkt), kalt

Aðferð.
1. Þeytið rjómann vel og blandið öllu hinu mjög varlega saman við með sleikju.

Setjið saman kökuna
Setjið súkkulaðibotninn fyrst á kökudisk og smyrjið með 1/3 af rjómanum, setjið þá marengsbotn ofan á og smyrjið með 1/3 af rjómanum og dreifið karamellu yfir með skeið, passið að setja ekki of mikið(hún á ekki að þekja). Setjið þá seinni marengsbotninn ofan á og smyrjið með afgangnum af rjómanum og dreifið karamellu yfir með skeið eða eins og ég gerði og sést á myndinn með rjómasprautu og gerði fyrst lóðréttar línur,þá láréttar ofan á og svo á ská og aftur á ská í hina áttina og gott að láta hverja línu fara aðeins niður kökuna á hliðunum.

Endilega ef þið hafið einhverjar spurningar eða athugasemdir bara setja í athugasemdakerfið og ég mun svara ykkur um hæl.

Piparkökur

2009-12-04T23:12:00.002+01:00

Nú hef ég gert nokkrar tilraunir með piparkökur og hef hingað til ekki verið nógu ánægð með afraksturinn alltaf eitthvað að en svo ákvað ég að leita að amerískri uppskrift og sjá hvort kanarnir væru ekki bara með þetta og viti menn ég rambaði á eina sem er alveg súper dúper góð ég reyndar breytti aðeins kryddmagninu og sé ekki eftir því, ég vil nefnilega hafa þær soldið sterkar eða bragðmiklar, stökkar en örlítið mjúkar inní og ef ég hef þær þunnar þá eiga þær að vera alveg stökkar en svo ef ég hef þær þykkri þá eiga þær að vera stökkar að utan og mjúkar að innan. Þessi uppskrift uppfyllir allar þessar kröfur mínar svo endilega tékkið á þessum ef þið eruð að leita að rosalega góðri piparkökuuppskrift.

Þessi uppskrift er vel stór og gefur alveg helling af piparkökum í öllum stærðum og gerðum. Það eina sem hægt er að setja út á þessa uppskrift er að maður getur ekki flatt hana út aftur og aftur og aftur, þ.e 3var sinnum er eiginlega það mesta en ég passaði bara að stinga út þannig að formin snertust alveg svo að sem minnst væri af afgöngum. Ég notaði líka mjög gott ráð sem er að fletja út deigið og setja það svo á smjörpappír og stinga út á honum og taka svo utan af formunum deigið en þannig aflagast ekki kökurnar eins og þær geta gert ef maður þarf að taka þær af borðinu og setja á pappírinn, þá geta ýmsar hendur eða hausar teygst.

Piparkökur

130 ml hunang(má skipta á milli hunangs,maple sýróps og Golden sýróps)
130 ml púðursykur
2 msk mulið engifer
3 tsk mulinn kanill
1 tsk stjörnuanís, mulinn
1 tsk negull
2 tsk matarsódi
200 ml smjör, skorið í bita
1 egg léttþeytt
600 ml hveiti
1/2 tsk salt

Aðferð:
1. Setjið í djúpan pott: hunang,púðursykur og krydd og látið suðuna koma upp yfir meðalhita. Takið af hitanum.
2. Hrærið matarsóda saman við(blandan bólgnar öll upp og freyðir sem er eðlilegt)
3.Bætið þá smjöri saman við 3 msk í einu og látið bráðna alveg saman við áður en næstu smjörskeiðum er bætt saman við. Þar til allt er bráðnar saman.+
4. Bætið eggi saman við og hrærið hveiti og salti síðast saman við.
5. Hitið ofninn í 160°C.
6. Takið deigið úr pottinum og setjið á hveitistráð borð og hnoðið þar til það er komið saman og er glansandi fallegt.(30 sek til 1 mínúta)Passið að hnoða ekki of mikið.
7. Skiptið deiginu í tvennt og plastið annan hlutann og geymið við stofuhita. Fletið svo hinn hlutan út í ca 35 cm ferning, setjið á smjörpappír, skerið út fígúrur og bakið í ofni við 160°C í 10-12 mínútur(í mínum ofni voru þær 12 mínútur en hann er ekki blástursofn) Mæli með að fylgjast með þeim.

Hið fullkomna súkkulaðimuffins

2009-11-24T21:50:00.003+01:00

Loksins loksins hef ég fundið það sem ég hef verið að leita að. Ég er búin að prófa um 5 uppskriftir af súkkulaðimuffins í þessari leit minni að mjúkri, fullri af súkkulaðibragði unaðslegri muffins og hér er hún. Ég fékk hana á amerískum uppskriftavef svo að hún er alveg ekta amerísk en viðurkenni þá að hún kemur ekki frá mér persónulega.

Súkkulaðimuffins
12 stórar muffins/ fleiri í pappírsformunum

85 gr 70% súkkulaði, saxað gróft
285 gr 56% súkkulaði, gróft saxað eða súkkulaðidropar
200 ml hveiti
1/2 tsk matarsódi
1/2 tsk salt
1 tsk vanilla
135 ml súrmjólk(má líka vera mjólk en ég mæli frekar með súrmjólkinni)
100 ml smjör,mjúkt
200 ml ljós púðursykur
2 stór egg

Aðferð:
1. Hitið ofninn í 180°C
2. Bræðið 70% súkkulaðið með 95 gr af 56% súkkulaðinu
3. Hrærið saman hveiti,matarsóda og salt
4. Hrærið saman súrmjólk og vanillu í annarri lítilli skál
5. Pískið saman sykur og smjör þar til það er létt og ljóst og bætið svo eggjunum einu í einu og hrærið vel eftir hvert egg. Bætið þá brædda súkkulaðinu saman við.
Bætið þá súrmjólkurblöndunni og hveitiblöndunni saman við sitt á hvað og byrjið á hveitiblöndunni og endið á henni einnig. Hrærið þá varlega afgangnum af súkkulaðibitunum saman við.
6. Bakið í 22-25 mínútur eða þar til prjónn sem er stungið í miðju múffunnar kemur út hreinn. Athugið samt að í hverri múffu eru súkkulaðibitar þannig að ef það er súkkulaði á prjóninum gæti það verið eftir súkkulaði bita þannig að bara að það komi ekki hrátt deig á prjóninn þá er það tilbúið.

Gulrótar-og eplasúpa með chilli og engifer

2009-11-24T20:04:00.002+01:00

Ég er farin að gera súpu í hádeginu þar sem ég borðaði svo mikið af brauði með áleggi á meðgöngunni að ég fékk ógeð af því og er að reyna að fá mér eitthvað annað og þá verður súpa oft fyrir valinu og þessi var bara ansi góð. Það er nefnilega svo þægilegt að skera allt grænmetið bara einhvern veginn ofan í pottinnEplið gerir hana létta og chillíið og engiferið bæta hana á mjög óvenjulegan hátt.
Uppskriftin er fyrir 2 í aðalrétt eða 4 í forrétt eða hádegismat

Gulrótar-og eplasúpa með chilli og engifer
f/2 eða 4
4 gulrætur
1 meðalstór sellerístilkur
1/2 laukur
1 epli
1/4 chilli
1/2 cm engifer
vatn
1/2 grænmetisteningur
smá olía

Aðferð:
1. Allt grænmetið skorið í pott með olíu og léttsteikt svo er vatni hellt yfir þannig að fljóti yfir eins og 1 cm. Látið suðuna koma upp og sjóðið í ca20 mínútur eða þar til gulræturnar eru soðnar. Hakkið svo allt saman með töfrasprota eða í hakkavél. Smakkað til með salti og pipar.

Muffins með kaffinu

2009-11-18T19:33:00.003+01:00

Ég bara get ekki hætt að baka eða hugsa um uppskriftir. Hvað er eiginlega að mér? Nú get ég t.d. ekki hætt að hugsa um hvernig best væri að betrumbæta þessa uppskrift þó svo að hún hafi slegið í gegn og hvort ekki sé hægt að setja eitthvað auðvelt krem ofan á. Nú styttist óðum í afmæli Heklu og ég hugsa um ekkert annað en margra hæða kökur og endalaust mjúkar og örlítið blautar súkkulaði muffins og ætli það verði ekki bráðum piparkökur eða piparkökuhús, það væri nú gaman að gera það aftur. Hef ekki gert svoleiðis síðan ég var krakki en fannst það mjög skemmtilegt. Ég er reyndar farin að gæla við tilhugsunina að búa til konfekt og það ekki með marsipani þar sem ég þoli það ekki, eitt af fáum hlutum sem ég get ekki enn borðað, það kemur kannski með aldrinum, aldrei að vita. En uppskriftin að þessu er í rauninni gulrótarökuuppskriftin bara aðeins breytt, það er eiginlega ekki hægt að segja að þetta sé súkkulaði muffins því það er ekki nægilega mikið af súkkulaði í henni en hún er ansi góð með kaffinu þessi.

muffins með kaffinu
ca 15 muffins(fer eftir hvort þið notið litlu pappírsformin eða stærri sílíkonformin)

400 ml hveiti
2 tsk lyftiduft
1,5 tsk matarsódi
1 tsk kanill
4 tsk kakó
400 ml sykur
300 ml matarolía
4 egg
1,5 appelsína(má sleppa) kemur með skemmtilega tilbreytingu
150 gr súkkulaði
200 ml Cranola cereal
50 ml mjólk
Ég setti líka 3 tsk af fljótandi karamellu sem ég átti inni í ísskáp frá síðustu kökutilraun en það má alveg sleppa því

Aðferð:
1.Hitið ofninn í 180°C
2.Blandið saman sykri,lyftidufti,matarsóda,hveiti,kanil,kakó,matarolíu og eggjum.
3.Hakkið saman í hakkavél, múlínex Cranólainu og súkkulaðinu þar til það er mjög fínt hakkað. og skerið appelsínuna í bita og bætið útí ásamt safanum úr appelsínunni og mjólkinni.
4. Setjið blönduna í muffinsformin og fyllið 3/4 af hverju formi.
5. Bakið í 18-20 mínútur, styttra ef þið notið litlu pappírsmuffins formin. Tékkið á þeim með prjóni og stingið í miðjuna og ef prjónninn kemur hreinn út er muffinsið tilbúið.

Dijon hamborgarar með guacamole og karamelliseruðum lauk

2009-11-16T20:28:00.002+01:00

Þetta var nú bara til að klára það sem var til í ísskápnum hjá mér, bætti aðeins við en þegar fullt af avócadó er að eyðileggjast þá þarf að nýta það, ekki satt?
Mig langaði til að breyta til og gera hamborgara sem ég hef ekki gert áður og útkoman var þessi og hún var rosaleg!

Dijon hamborgarar með guacamole og karamelliseruðum lauk
f/4 hamborgara
ca 500 gr nautahakk
3 msk dijon sinnep
3 msk sýrður rjómi(ég notaði Ab-mjólk)
1 egg
3 msk brauðrasp( ég tók 2 brauðsneiðar, ristaði þær og hakkaði í hakkavél)
1/2 hvítlauksrif, kramið
ostsneiðar til að setja ofan á við steikingu
salt og pipar

Aðferð:
1.Hrærið varlega öllu saman og búið til hamborgara og steikið og þegar borgurunum hefur verið snúið við einu sinni er ostinum bætt ofan á

Karamelliseraður laukur
1 laukur, skorinn í sneiðar(ekki of þunnar)
1/2 chilli, saxaður
1 msk maple sýróp
5 gr smjör
1 cm ferskur engifer, saxaður
salt og pipar

Aðferð:
1. Skerið laukinn, saxið engiferið og chilli.
2. Bræðið smjörið á pönnu, þegar það freyðir er öllu bætt í pönnuna fyrir utan sýrópið og laukurinn er mýktur við meðalhita, þegar hann er orðinn vel mjúkur er hitinn lækkaður í meðallágan, sýrópinu bætt saman við og látið malla í 15 mínútur til viðbótar með loki hálft á. Hann er tilbúnn þegar hann er dökkgullinbrúnn.

Guacamole
4 pínulítil avócadó
2 msk majónes(má vera sýrður, ég bara átti hann ekki til)
salt og pipar
(ég sleppti hvítlauknum þar sem hann getur verið of bragðsterkur svona hrár en það er smekksatriði.
smá sítrónusafi

Aðferð:
1. Avócadóið þarf að vera mjög mjúkt en það er stappað með gaffli og svo er majónesinu hrært saman við og saltað og piprað og bragðbætt með sítrónusafa.

Svo þarf að hafa tómata og salatblöð og franskar kartöflur
Ekki spara laukinn á borgarana hann er æðislega góður. En annars er brauðið smurt með guacamole og smá salsasósu ef vill og lauk, tómötum og salati

Plómu-og rauðvínsbakaður kjúklingur

2009-11-13T19:18:00.004+01:00

Ég rankaði við mér í gær og sá ansi mikið af plómum vera að eyðileggjast í ísskápnum hjá mér og sparigrísinn ég, get nú ekki verið þekkt fyrir að eyðileggja þvílíkan fjársjóð(rándýrt dæmi) og fyrst íhugaði ég að búa til svokallaða upside down cake sem mig hefur langað til að búa til ansi lengi en gerði mér þá grein fyrir að ég yrði sú eina sem myndi borða það þar sem eiginmaðurinn og dóttirin hafa ekki mikinn áhuga á svoleiðis kökum(vonandi fær sonurinn minn matarsmekk!) þannig að ég ákvað að henda þessu í kvöldmatinn og viti menn, algjört dúndur að sjálfsögðu. Allt öðruvísi en ég hef gert hingað til og svo unaðslega gott, örlítið sætt á móti söltu og súru-fullkomið.
Ég bar þetta svo fram með steiktum kartöflum, þurfti ekki meira.

Plómu-og rauðvíns(roasted)bakaður kjúklingur
f/4
2 bakkar kjúklingabitar eða 1 heill kjúklingur bitaður niður
8 plómur
200-300 ml rauðvín(eftir því hversu miklu þið tímið, annars bætið bara upp með vatni)
1 msk rauðvínsedik/balsamik edik
hveiti til að velta upp úr
5 greinar timían, ef þið eigið það annars er hægt að setja estragon(þurrt eða ferskt) og þá eins og 1/2 msk
2 msk rósmarín
1 stjörnuanís
1/2 kanilstöng
3-4 msk sykur
2 hvítlauksrif
3 skallottulaukar
1 teningur kjúklingakraftur
smjörklípa og 1 msk olía
salt og pipar

Aðferð:
1. skerið plómurnar í 6 bita hverja
2. Hitið smjörið og olíuna á stórri pönnu og bætið plómunum útá þegar smjörið byrjar að krauma og eldið í 2 mínútur. Bætið þá ediki saman við og svo rauðvíninu og sjóðið í 4 mínútur. Takið af hitanum. Bætið kryddinu, kraftinum, lauknum, sykrinum saman við.
3.Veltið kjúklingnum uppúr hveiti og dustið allt aukahveiti af hverjum bita og steikið í olíu á heitri pönnu þar til hann er gullinbrúnn(meðalháum hita) og setjið svo í eldfast mót eða roasting pan og hellið plómublöndunni yfir og lokið með álpappír.
4. Bakið við 150°C í 1 klukkustund.
5. Sigtið þá vökvann frá í djúpan pott, setjið kjúklinginn og plómurnar aftur inn í ofn með álpappír yfir og slökkvið á ofninum.
6. Sjóðið vökvann niður, þar til hann þykkist og bragðast unaðslega
7. Berið fram: Setjið eldfasta mótið með plómunum og kjúklingnum á borðið og berið fram með sósunni og steiktum kartöflum.

Bjórbrasserað lamb með kartöflumús og grænmeti

2009-11-09T22:50:00.003+01:00

Fingerlicking good eins og móðir mín komst svo vel að orði. Ég held ekki vatni yfir þessum rétti, hann er gjörsamlega out of this world sérstaklega fyrir þá sem þykir svona vetrarmatur góður(comfort food á ensku). Sósan kom út með smávegis vott karamellu og kjötið féll af beinunum. Ég veit ekki hvernig ég get lýst þessum rétti betur. það er smá verk að búa réttinn til en það er sko vel þess virði. Fyrir útivinnandi þá mæli ég með því að búa réttinn til á sunnudegi(eða laugardegi) og svo er hægt að geyma hann þar til seinna í vikunni, hita upp og gæða sér á. Ég myndi áætla ca. klukkutíma í undirbúning og eftirvinnslu og svo er rétturinn rúma 2,5 klukkutíma inni í ofni.

Bjórbrasserað lamb með kartöflumús og grænmeti
f/5
2 kg súpukjöt, mesta fitan hreinsuð af(ekkert stress þó nokkuð sé af fitu)
2 gulrætur, skornar gróft
1 steinseljurót, skorin gróft
2 sellerístilkar, skornir gróft
1,5 laukur, skorinn górft
handfylli ferskt timían
1 lambakraftur, 1 teningur
1 tsk tómatkraftur
100 ml púðursykur
vatn
1 ltr bjór(eða pilsner til að hafa réttinn ódýrari)ég notaði venjulegan ódýran ljósan bjór en það má til að fá meira bragð hafa bjórinn dekkri eins og t.d. dökkan Kalda eða einhvern þannig.
100 ml rauðvínsedik
3 lárviðarlauf
nýmalaður pipar
sósa ef þið viljið þykkja hana:
hveiti og olían sem er fleytt af sósunni

Aðferð:
1.Skerið grænmetið og hreinsið mestu fituna af kjötinu og steikið á pönnu í smávegis smjöri og olíu(1 tsk af hvoru). Fyrst gærnmetið og hellið í oftsteikingarpott svo kjötið og leggjið yfir grænmetið.
2.Hellið rauðvínsedikinu í heita pönnuna og sjóðið aðeins niður(1 mínúta), hellið þá bjórnum í pönnuna(í tveimur hlutum ef þörf er á) og sjóðið örlítið niður(ca 5 mín), bætið þá púðursykrinum og látið bráðna og hellið svo yfir kjötið.
Hellið svo vatni yfir þannig að rétt fljóti yfir allt.
3. Bætið úti tímíani, lárviðarlaufi, tómatkrafti, nýmalaður pipar og lambakrafti. Setjið lok á og í ofninn á 160°C hita í rúmlega 2,5 tíma, ef lokið er ekki mjög fast á pottinum er gott að setja smjörpappír ofan á kjötið og svo lokið á.
4. Á meðan er kartöflumúsin búin til ég gerði 1200 gr kartöflur(bökunar afhýddar og soðnar í saltvatni)200 gr smjör og salt og pipar
og skerið einnig 1 gulrót og 1 steinseljurót í bita(1x1 cm). Setjið útí sjóðandi vatn í nokkrar mínútur þar til það er soðið.
5. Þegar kjötið hefur soðið í 2,5 tíma(rúman)þá er kjötið tekið uppúr og sett í skál/pott og lok ofan á eða álpappír. Sigtið vökvann í lítinn pott og sjóðið aðeins niður um ca 20%, nokkrar mínútur. Fleytið olíunni af og setjið í lítinn pott og blandið hveiti saman við þar til hún myndar kúlu eða bollu. Þetta er til að þykkja sósuna, en einnig er hægt að sleppa því að þykkja sósuna og sjóða hana þá aðeins lengur niður kannski um 30%. Ef þið þykkjið sósuna er smátt og smátt af hveitibollunni bætt saman við sjóðandi sósuna þar til þeirri þykkt er náð sem ykkur þykir góð(hún á að vera eins og brún sósa á þykkt). Smakkað til með salti og pipar(oft þarf þess ekki). Setjið grænmetið útí sósuna og hitið vel, takið svo uppúr með gataskeið/spaða.Á meðan grænmetið hitnar er kartöflumúsin hituð upp.
Berið fram:
Setjið kjötið á fat og dreifið grænmetinu í kring og berið fram með kartöflumúsinni og sósunni til hliðar.

Pizza með steiktu eggaldini og karamelliseruðum lauk

2009-11-08T14:06:00.002+01:00

Við höfðum pizzu í matinn í staðinn fyrir brasseraða lambið þar sem ég gleymdi enn og aftur að taka það úr frystinum. Þar sem við gerum pizzu u.þ.b. einu sinni í viku og alltaf það sama þá er ég komin með leið á því og ákvað að gera eitthvað spennandi og unaðslega gott. Mín uppáhaldspizza úti á Ítalíu var einmitt með eggaldini en mér finnst það betra steikt upp úr olíu heldur en grillað en það er smekksatriði, það er líka mjög misjafnt hvort maður fær þegar maður pantar þessa pizzu úti, þannig að ef þið eruð á leiðinni út og viljið með Melanzane þarf að spyrja hvort það er steikt eða grillað. Þegar það er grillað verður það þurrt en þá fáið þið grillbragðið en ef þið fáið það steikt þá er það safaríkt og með smá ólífuolíubragði aukalega. Ég er mikill aðdáandi karamelliseraðs(mikil þörf á betra orði fyrir þetta) lauks og ef það er rauðlaukur, enn betra. Ég aftur á móti hafði ekki mikinn tíma þannig að ég var ekkert að flækja málin með lauknum og hafði hann einfaldan, það er hins vegar hægt að gera hann á annan hátt með fleira hráefni og ég á eina slíka uppskrift sem er geggjuð og ég hef borið fram með kjöti og maður bara slefar yfir henni. Það er nú líka þannig með álegg á pizzur, maður sleppur með lítið hráefni.

Pizza með eggaldini og karamelliseruðum lauk
f/eina pizzu
3 sneiðar af eggaldini, skorið í 1 sm sneiðar
1 rauðlaukur(má líka vera venjulegur)
1 tsk smjör
1 msk ólífuolía
1 msk hlynsýróp, hægt að skipta út fyrir púðursykur og setja þá smá vatn með
1 msk balsamik edik
salt og pipar

Aðferð:
1. Hitið olíu á pönnu, þegar hún er heit er eggaldininu velt uppúr olíunni á annarri hliðinni og snúið við og steikt við meðal hita þar til það er brúnt og svo snúið við og steikt þar til það er brúnt og mjúkt. Tekið af og skorið í fjórðunga og dreift yfir pizzuna.
2. Skerið laukinn í 1/2 sm sneiðar og hitið olíu og smjör á pönnu. Bætið lauknum útá þegar hún er heit og hann er mýktur aðeins þá er sýrópinu og edikinu bætt saman við og látið malla á meðallágum hita með lok hálft á í ca 10 mínútur eða þar til hann hefur skroppið vel saman og er mjög mjúkur. Saltið og piprið. og dreifið yfir pizzuna.

Kjúklingasúpa með ferskum engifer

2009-11-06T14:16:00.002+01:00

Eiginmanninum leist svo vel á súpuna mína sem ég fékk mér í hádeginu að hann bað um þannig í kvöldmat og til að hafa hana aðeins matarmeiri bætti ég kjúklingi í uppskriftina og stækkaði hana aðeins. Útkoman var ljúffeng og ódýr kjúklingasúpa sem er nú ekki slæmt að gúffa í sig þessa dagana með allt þetta kvef í kringum mann. Ég fór nefnilega á netið til að athuga hvort eitthvað væri til í þessari þráhyggju í amerískum sjónvarpsþáttum og bíómyndum með kjúklingasúpu og kvef og hvort þetta gæti í raun og veru virkað. Viti menn það er búið að rannsaka þetta og þetta virkar að einhverju leyti, að sjálfsögðu er mikið af virkninni í hitanum og sálfræðinni en að sama skapi, virkar. Nú er stelpan mín með kvef, ég að fá það og litli guttinn orðinn stútfullur(hann fær nú reyndar bara að gæða sér á brjóstamjólkinni, en kannski síast eitthvað í gegn, aldrei að vita).
Ég set því hér inn uppskriftina eins og hún er fyrir fjóra.

Kjúklingasúpa með ferskum engifer
f/4
1,5 gulrót(stór)
1 steinseljurót
2 cm fersk engiferrót
1 laukur
2 sellerístilkar
2 hvítlauksrif
1 bakki kjúklingabitar(með beini)
1,5 teningur kraftur, grænmetis eða kjúklinga
1 msk edik, hvítt(mangóbalsamik t.d)
150 ml hvítvín
1-2 tsk smjör(hvort sem ykkur þykir betra)
1 msk olía
1 ltr vatn

Aðferð:
1. Allt grænmetið er skorið í litla bita(ferninga 1x1 cm)
2. Smjörið og olían er hitað í djúpum potti. Þegar smjörið freyðir er grænmetinu bætt saman við og svitað örlítið.
3. Húðin er tekin af kjúklingnum.
4. Hvítvíni og ediki er bætt saman við grænmetið og soðið niður í ca.4 mín. Þá er kjúklingnum bætt saman við og vatni hellt yfir. Teningnum bætt saman við.
5. Sjóðið við meðalháan hita í ca. 20 mínútur eða þar til kjúklingurinn er tilbúinn(takið þykkasta bitann og skerið í hann ef vökvinn sem kemur úr sárinu er glær er hann tilbúinn).
6. Takið af hitanum og takið kjúklingabitana upp úr og skerið(takið)kjötið af beinunum og bætið aftur útí pottinn. Látið suðuna koma aftur upp og berið fram með brauði, jafnvel hvítlauksbrauði.

Þið ráðið svo sem hvort þið takið kötið af beinunum eða ekki mér finnst það þægilegra sérstaklega í sambandi við börnin. Beinin eru hins vegar nauðsynleg í súpuna en þaðan kemur krafturinn og góða kjúklingabragðið. Þessi súpa, öfugt við grænmetissúpuna, er tær með grænmetisbitum en í grænmetissúpunni er allt saman maukað, en eins og ég sagði með hana er einmitt líka hægt að hafa hana tæra með grænmetisbitum. Allt er það jafn unaðslega gott og huggandi svona þegar skammdegið hellist yfir okkur þessa dagana.
Ég hins vegar gleymdi að taka lambið út úr frystinum þannig að það verður bara pizza í matinn í kvöld og ætla ég að prófa nýtt álegg á hana. Set það inn vonandi á morgun

Gulrótar og steinseljurótarsúpa með engifer

2009-11-05T14:07:00.002+01:00

Það var hádegi og mig langaði ekki enn eina ferðina í brauðmeti í hádegismatinn og ég var farin að sakna súpunnar sem ég fékk alltaf í vinnunni. Ég ákvað því að búa mér til grænmetissúpu sem heppnaðist svona líka ljómandi vel og ekki er hægt að segja að hún hafi verið mjög dýr, sitt lítið af hverju er í henni og afgangana ætla ég svo að brassera á föstudaginn og þá ætla ég að prófa að brassera í bjór, mmm spennandi.
Uppskriftin er fyrir fáa þar sem ég var bara að búa til handa sjálfri mér í þetta skiptið. Ég get svarið það að það tók mig styttri tíma að búa þetta til heldur en það tók eiginmanninn að búa sér til samloku í ofni með steiktu eggi(hmmm hvor okkar ætli fengi kransæðastíflu á undan???)

Gulrótar-og steinseljurótarsúpa með engifer
f/2
1/2 stór gulrót
1 lítil steinseljurót
1/2 lítill laukur
1 stilkur af sellerí(fannst of dýrt að kaupa sellerírót)
1 hvítlauksrif
1 cm engifer
1/2 teningur grænmetiskraftur
50 ml hvítvín(má sleppa)
1 tsk mangóbalsamik edik(má vera hvaða ljósa edik sem er epla,hvítvíns, kampavíns hvað sem er)
útaf því hversu saltur krafturinn er þá saltaði ég ekki í þetta skiptið
1/2 tsk smjör
1 msk olía(má vera hvaða sem er, ég notaði Isio4)

Aðferð:
1. Bræðið smjörið og olíuna saman í litlum djúpum potti.
2. Þegar smjörið byrjar að freyta er grænmetið skorið útí í grófa bita. Aðeins hitað þar til laukurinn hefur mýkst aðeins þá er vatninu bætt saman við og suðan látin koma upp, teningnum bætt saman við og soðið við vægan hita í ca 10 mín(fer eftir stærð bitanna)eða þar til gulræturnar eru mjög meyrar.
3. Þá er allt maukað saman með töfrasprota eða í hakkavél, svo getið þið sigtað hana ef þið viljið(ég sleppti því í þetta skiptið og það kom ekki að sök). Ef þið eigið ekki hakkara af einhverju tagi er alveg hægt að skera grænmetið í litla bita og borða súpuna þegar grænmetið er meyrt án þess að mauka hana.

Kanilsnúðar með rjómaostsgljáa

2009-10-08T15:31:00.004+02:00

Ég rambaði inn á þessa uppskrift á uppáhaldsuppskriftavefnum mínum og breytti ekki neinu nema notaði gljáa sem er ekki með smjöri, er komin með nett nóg af smjörbragði enda fannst mér þessi gljái mun betri, ég hélt reyndar að hann yrði súrari þar sem í honum er rjómaostur og súrmjólk en hann var alls ekki súr heldur vóg sýran vel uppá móti flórsykrinum og myndaði frábæra contrasta sem pössuðu ótrúlega vel saman.
Ég hafði prófað aðra uppskrift á undan þessari sem bað um að hefast í endalausan tíma og setja inn í ísskáp í 16 tíma o.s.frv. og á endanum voru þeir alveg sérstaklega misheppnaðir, þannig að ég reyndi að finna uppskrift þar sem hefunin var í lágmarki, en að sjálfsögðu þegar maður er að vinna með ger er alltaf þörf á tíma í hefun. Þegar ég smakkaði þessa þá fann ég bragðið sem ég hef verið að leita að í mörg ár, fullkomið kanilpúðursykrursbragð með tvisti af sætum rjómaostskeim, hreinn unaður. Þeir eru líka alveg sérstaklega idiotproof þessir, þar sem ég er kanilsnúðabökunarvirgin og þessir komu fullkomlega út hjá mér.

Kanilsnúðar með rjómaostsgljáa
ca 18 snúðar
200 ml nýmjólk(ég notaði bara fjörmjólk, býst við að ef það er mjólk þá er það í lagi)
3 msk smjör
400 ml (gæti verið meira) hveiti
80 ml sykur, má minnka ef þið viljið
1 stórt egg
2 1/2 tsk þurrger
1 tsk salt
grænmetisolía til að smyrja

Fylling:
150 ml púðursykur
50 ml smjör, mjúkt
hrásykur(má sleppa)
2 msk kanill

Gljái:
3 msk rjómaostur
3 msk súrmjólk
300 ml flórsykur, má minnka ef vill tja eða setja meira, best að smakka til
1 tsk vanilludropar

Aðferð:
1. Hitið saman mjólkina og smjörið þannig að það sé volgt
2. Hrærið saman hveiti,sykur,egg,þurrger og salt og bætið svo mjólkurblöndunni saman við og bætið svo hveiti þangað til deigið er gljáandi og losnar auðveldlega frá hliðum skálarinnar.
3. Setjið deigið á hveitistráð borð og hnoðið í ca 5-8 mínútur og bætið hveiti eftir þörfum þar til deigið er hætt að vera klístrað og er fallega gljáandi og teygjanlegt
4. Smyrjið skál með olíunni og setjið deigkúluna í hana, setjið plastfilmu yfir og látið hefast á volgum stað í 2 klst. Ég kveiki á ofninum á lægstu stillingu og slekk svo á honum og læt skálina inn í ofninn og kveiki svo aftur þegar hann hefur kólnað alveg eftir ca.klst. Mér finnst þetta virka mun betur en að hafa skálina ofan á ofni.
5. Hrærið á meðan púðursykrinum saman við kanilinn og látið smjörið mýkjast við stofuhita.
6. Þegar deigið hefur tvöfaldast í stærð er það tekið úr skálinni og hnoðað létt aftur og svo flatt út í 30x40 cm ferhyrning og smurt vel með smjörinu og skiljið eftir 1 cm rönd við lengri endana. Þá er púðursykrinum dreift jafnt yfir allt saman og dempað létt með höndunum eða kökukeflinu þannig að sykurinn fari vel inn í deigið. Stráið svo hrásykrinum jafnt yfir ef þið notið hann og þrýstið honum létt niður í deigið einnig.
7. Rúllið svo deiginu upp eftir endilöngu og passið að rúlla þessu þétt upp og reynið svo að festa létt endann og svo slétta úr endunum á rúllunni. Skerið svo rúlluna í ca 18 bita.
8. Smyrjið 2 föt sem er annað hvort ferkantað og er um 23 cm eða eins og ég gerði þá var það eitt stórt eldfast egglaga fat 35 cm í hvorn endann(ég smurði með smjöri og dreifði hveiti yfir og dustaði úr allt auka hveiti)
9. Setjið snúðana í fatið og leggjið þá þannig að næstum ekkert pláss sé á milli þeirra. Setjið plastfilmu yfir og látið hefast í 40 mínútur og bakið svo við 190°C í 15 mín. Takið þá út úr ofninum og takið úr forminu og snúið við aftur í formið og bakið áfram í 4 mínútur eða þar til þeir eru gullinbrúnir að ofan. Takið þá úr forminu og látið kólna.
Aðferð fyrir gljáann:
1. Hrærið saman með písk eða handþeytara súrmjólkina og rjómaostinn og vanilludropana þar til engir kekkir eru og sigtið svo flórsykurinn saman við. Ég nennti reyndar ekki að sigta ekki frekar en fyrri daginn en þá þarf ég líka að hræra lengur til að losna við alla kekki. Dreifið svo yfir snúðana þegar þeir eru orðnir volgir og berið fram. Þeir eru bestir volgir en einnig svakalega góðir við stofuhita.

Gulrótarkaka

2009-09-24T16:12:00.006+02:00

Þetta er án efa besta gulrótarkaka sem ég hef smakkað, hún er svo safarík og mjúk og yndisleg eitthvað, enda er hún frá mömmu sem er að sjálfsögðu besti kokkur í heimi.
Ég helmingaði þessa uppskrift í þetta skiptið og setti í lítið hringform og svo afganginn í muffins form og það kom bara rosalega vel út.
Ég er þessa dagana meira fyrir að baka en að elda mat þannig að ég hendi í köku og eiginmaðurinn sér okkur fyrir næringu á kvöldin og er bara búinn að standa sig með prýði.
En hér er uppskriftin af bestu gulrótarköku í heimi

Gulrótarkaka

400 ml hveiti
2 tsk lyftiduft
1,5 tsk matarsódi
1,5 tsk salt
2.5 tsk kanill
400 ml sykur
300 ml matarolía
4 egg
600 ml rifnar gulrætur(ég ríf þær gróft)
1 stór appelsína skorin í litla bita
100 ml saxaðar valhnetur
200 ml kókosmjöl

Aðferð:
1. Hitið ofninn í 180°C. Smyrjið eitt hringsmelluform, gott að setja smjörpappír í botninn.
2. Hrærið saman sykri,eggjum,hveiti,lyftidufti,matarsóda,salti,kanil og matarolíu
3. Bætið svo við gulrótum,appelsínu,valhnetum og kókosmjöli
4. Hellið í formið og bakið í 1.5 klst. Látið kólna alveg áður en kremið er sett á.

Krem
100 ml smjör, mjúkt og við stofuhita (um 90 gr)
200 ml rjómaostur( um 190 gr)
4-5 msk flórsykur
smá vanilludropar

Aðferð:
1. Hrærið saman smjöri,rjómaosti,flórsykri og vanillu og smyrjið á kökuna.
Best finnst mér að hræra þetta með handþeytara og hræra fyrst smjörið til að ná kekkjum úr og bæta svo rjómaosti og síðast flórsykri og vanillu.
Aths. ef þið viljið hafa þetta í muffins formi þá er best að hafa það í sílíkonformum en þá karamellast kökurnar yst og verða mjög mjúkar og safaríkar. Ég hef ekki prófað í bréfformum þar sem mér finnast þau vera of lítil en núna síðast notaði ég álform úr IKEA sem virkuðu mjög vel en mér fannst kökurnar þurrkast örlítið að utan við það, sem kemur svo sem ekki að sök en bestar koma þær úr sílíkonformum. Tíminn sem kökurnar eru inni þegar þær eru í muffins formi er mjög stuttur og fer eftir formunum og myndi ég tékka á þeim eftir 10 mín með því að stinga prjóni í þær og fikra mig svo áfram eftir það. Ég hafði þessar í 15 mínútur og þær í sílíkonforminu(þau form eru minni) voru þær í 10 mínútur.

Aths.
Það hefur gerst núna nokkrum sinnum hjá mér að kremið skilur sig og hef ég reddað kökunni með því að smyrja skilda kreminu(bragðið er eins nefnilega)skera súkkulaði með ostaskerara yfir kökuna og setja kókosflögur á hliðarnar.

Bláberjapæ

2009-09-10T15:26:00.007+02:00

Ég eignaðist lítinn dreng í fyrradag hraustan og fallegan. Þar sem það er nú yfirstaðið get ég loksins farið að gera meira í eldhúsinu.
Nú eru allir í berjamó eða nýbúnir að fara í berjamó og eiga líklegast fulla ísskápa og frysta af bláberjum. Ég persónulega er algjör bláberjastelpa og fæ ekki nóg af þeim í hvernig formi sem þau birtast mér. Mig hefur þó lengi dreymt um bláberjapæ þar sem ég er líka algjör pæjustelpa, ég bara elska þessa hörðu, flögulaga en samt örlítið mjúku áferð deigsins og hið hálfsæta bragð þess sem er svo bætt upp með sætri og unaðslega mjúkri fyllingu og ekki skemmir fyrir að hafa ís með svona til að toppa unaðinn.
Ég henti í deig fyrir þónokkru og átti ansi mikinn afgang og ákvað að prófa að setja það í frysti og þar hefur það legið síðan og beðið eftir að vera bakað. Mamma kom svo með bláber handa mér daginn áður en ég átti en þá hafði ég einnig tekið út úr frystinum einn part af deiginu. Í gær voru svo hvoru tveggja á síðasta snúning og hvað var annað hægt að gera en að henda í eins og eina pæju? Ég bara gat ekki horft upp á þetta eyðileggjast í ísskápnum. Ég ákvað þó að þessi yrði prufukaka og ég reyndi að láta mér standa á sama um útkomuna en eins og vanalega þá var það ómögulegt og gat ég ekki staðist freistinguna og smakkaði í gær og var hún hreint unaðsleg og eiginlega enn betri því hún var svo einföld. Meira að segja eiginmaðurinn sem er enginn berjakall fannst hún mjög góð. þetta verður því syndin mín næstu daga, tja kannski maður bjóði einhverjum gestum uppá smá flís, það er aldrei að vita.
En með tilbúna deiginu tók þetta u.þ.b. 5 mínútur að henda saman og svo 40-45 mínútur í ofninum. Enda ekki annað hægt þar sem maður er varla genginn saman eftir barnsburðinn.

Bláberjapæ
1 hringlaga smelluform(úr IKEA)
500 gr smjördeig(hægt að nota tilbúið annars fylgir uppskrift hér að neðan)
600 gr(má vera rúmlega)Fersk bláber
150-200 ml sykur(má sleppa eða minnka ef þið viljið ekki mjög sæta pæju)
6 grahams hafrakex, mulin, ekki of fínt

Aðferð:
1. Fletjið deigið út þannig að þykktin sé tæplega sentimeter að þykkt, notið hveiti til að hjálpa til, þannig að það festist ekki við borðið og snúið deiginu oft við.
2. Smyrjið formið með smjöri og dreifið hveiti í þannig að hylji vel og dustið svo aukahveiti úr forminu. Hitið ofninn í 200°C.
3. Fellið deigið í formið, lagið göt ef einhver myndast. Dreifið kexmylsnunni í botninn og hellið svo bláberjunum yfir og síðast er sykrinum stráð yfir og blandað berjunum, svo er deigið sem liggur fyrir ofan berin fellt yfir þau og smurt með blöndu af eggi og vatni.
4. Bakað við 200°C í 40-45 mínútur, gott er að setja álpappír yfir eftir 25 mínútur og taka hann svo af þegar 5 mínútur eru eftir af bökunartíma.

Smjördeig eða mördeig(á dönsku)
Þessi uppskrift er í stærra lagi og gæti dugað í fleiri en eina pæju
250 gr flórsykur (1)
330 gr smjör(1)
660 gr hveiti(2)
3 egg(3)

Aðferð:
1. Hrærið öllu saman í hrærivél í númeraröðinni og passið að það verði ekki of heitt og takið svo úr hrærivélinni og hnoðið í höndunum til að koma því saman. Pakkið í plastfilmu og kælið í a.m.k.30 mínútur áður en það er rúllað út.

Ég persónulega bjó til miklu meira deig og mæli með því, því er svo skipt niður í 500 gr hvert og fryst, þá á maður alltaf til pæjudeig í frystinum, sem er afþýtt á einum degi inni í ísskáp.
Uppskriftin sem ég gerði er í þessum stærðum:

750 gr flórsykur
1000 gr smjör
2000 gr hveiti
10 egg
Sama aðferð og hér fyrir ofan.

Mjúkar súkkulaðibita-haframjölsklattar

2009-09-01T20:18:00.005+02:00

Okkur er boðið í mat í kvöld þannig að ekkert verður úr súpunni en ég ákvað að baka klatta.
Þeir eru himneskir og alls ekki svo dýrir, ég átti mest allt af hráefninu fyrir þannig að ég býst við að í flestum eldhúsum sé það sama til staðar.
En án efa þeir bestu sem ég hef smakkað í laaaangan tíma. Það hafa nokkrir komið með athugasemdir í sambandi við kanilinn og negulinn og ég ráðlegg því þeim sem eru ekki miklir aðdáendur þessara krydda að sleppa þeim, það gerir ekkert til. Ef þið viljið minna súkkulaðibragð er líka mjög gott að nota vanillubúðing í staðinn fyrir súkkulaðibúðing. Þessar kökur dreifa ekkert úr sér í ofninum því er best að forma þær eins og þið viljið hafa þær áður en þær eru settar í ofninn, hvort sem þið viljið hafa þær stórar og þykkar eða stórar og þunnar. Ef þið hafið þær þykkar þá er best að lengja tímann um 2 mínútur þ.e. 12 mínútur en 10 ef þær eru þunnar.

16 klattar

200 ml smjör
150 ml sykur
150 ml púðursykur
2 egg
100 gr súkkulaðibúðingur, Royal
1 msk vanilludropar
1 tsk matarsódi
1 tsk vatn
örlítill kanill
örlítill negull
200 ml haframjöl
450 ml hveiti
250 gr súkkulaðidropar
50 ml valhnetur, saxaðar

Aðferð:
1. Hitið ofninn í 190°C
2. Pískið smjörið þar til það er létt, bætið þá báðum tegundunum af sykrinum saman við þar til það er létt og ljóst, Bætið þá eggjunum saman við einu í einu og hrærið vel á milli.
3.Bætið þá búðingnum, vanilludropunum, matarsódanum, vatni og kryddinu saman við. Hrærið vel.
4. Bætið þá haframjölinu saman við og síðast hveitinu.
5.Blandið þá súkkulaðidropunum og valhnetunum saman við með sleif.
6.Setjið eins og 3 msk í eina köku og látið hana vera örlítið þykka og hafið eins og 5 sm á milli hverrar köku. Bakið í 11 mín. Eða þar til þær virðast þurrar að ofan, örlítið brotnar og mjúkar viðkomu. Takið út og kælið. Passið að ofbaka ekki.

Sinneps-og hunangsgljáður kjúklingur með ratatuille

2009-08-31T22:01:00.000+02:00

Ég var að nýta afgangana af grænmetinu frá grænmetislasagnainu sem ég gerði í síðustu viku. Þannig að uppskriftin er soldið lituð af því og gæti kannski verið betri en mér fannst þetta koma mjög vel út. Það gæti hins vegar verið betra að grilla grænmetið fyrst áður en maður steikir allt saman á pönnu og setur tómatsósuna saman við en ég hafði ekki tíma í það þannig að svona er uppskriftin að þessu sinni.

Sinneps-og hunangsgljáður kjúklingur
f/2
1 bakki af kjúklingabitum(blönduðum)
5 tsk Dijon sinnep
2 tsk hunang
salt og pipar

Aðferð:
1.Hrærið saman sinnepi og hunangi í skál. Saltið og piprið kjúklingabitana og spyrjið svo sinnepsblöndunni ofan á og bakið í ofni við 200°C í 30 mínútur eða þar til kjúklingurinn er tilbúinn og hefur fallega gullinbrúna húð.

Ratatuille
f/4
1/2 laukur, skorinn í sneiðar og svo helmingaðar
1/4 af púrrulauk, skorinn í sneiðar
1/2 eggaldin, skorið í 2 cm bita
1/2 zucchini, sorið í 2 cm bita
3/4 paprika, skorin í 2 cm bita
2 hvítlauksrif, skorin í sneiðar
4 greinar timían
1 msk rósmarín
basilíka eða 3 tsk pestó
2 greinar steinselja
1 dós niðursoðnir tómatar, hakkaðir eða heilir
1 tómatur, skorinn í 2 cm bita

Aðferð
1. Skerið allt grænmetið og hitið olíu á pönnu
2. Steikið við meðalháan hita allt grænmetið fyrir utan hvítlaukinn og tómatinn og gott er að byrja á lauknum og paprikunni og bæta svo restinni saman við. Steikið rólega og hrærið oft í þar til allt grænmetið er orðið vel meyrt(gæti tekið um 15 mínútur, þá er tómötunum og hvítlauknum bætt saman við og steikt í nokkrar mínútur til viðbótar.
3. Bætið þá tómötunum úr dósinni og hellið smá botnfylli af vatni í dósina til að hreinsa hana vel af tómatsafanum og hellið saman við. Bætið þá öllum kryddjurtunum saman við og sjóðið við lágan hita í ca 5-10 mínútur.

Þetta er gott með pasta, fiski og kjúklingi eða bara eitt og sér með grilluðu brauði. Það er hægt að bera þetta fram heitt, kalt eða við stofuhita(best þannig) og geymist í kæli í nokkra daga í lofttæmdum umbúðum

Gott er að setja kjúklinginn inn um leið og grænmetið fer á pönnuna, þannig er þetta tilbúið á nokkurn veginn sama tíma.

Matseðill fyrir vikuna 31.08- 04.09. 2009

2009-08-31T14:24:00.002+02:00

Þar sem litla krílið hefur enn ekki látið sjá sig og vill bara vera í rólegheitunum inni í bumbunni þá er ekkert annað að gera en að gera matseðil fyrir vikuna.
Við höfum tekið eftir því síðustu vikurnar að matvöruverð hefur hækkað töluvert þar sem matarkarfan okkar hefur hækkað en það er víst lítið við því að gera annað en að nýta allt sem maður kaupir eins vel og hægt er og að kaupa ódýrt hráefni og reyna að hafa fá hráefni í hverjum rétti. Við fórum upp í matjurtagarð í gær og tókum upp kartöflur, næpur, grænkál og salat en því miður þá fundum við aðeins eina gulrót, við vorum aðeins of áköf í arfareitingu í byrjun sumars þannig að fræin fóru, tja já þau bara fóru eitthvert annað. En maður lærir af reynslunni og þá er bara um að gera að gera betur næst. Þar sem ég er alin upp í húsi með stórum garði þar sem helmingur garðsins fór í kartöflugarð þá fannst okkur þetta heldur lítil kartöfluuppskera, en það er vonandi hægt að bæta úr því á næsta ári. Við vorum alltaf heilan dag að taka upp kartöflur en í gær tók þetta ekki nema rúman klukkutíma. Við erum því með kartöflur fyrir nokkra mánuði en ég efast um að þetta dugi út veturinn. Það er kannski ráð að geyma þær þar til eftir áramót þar sem kartöflubændur lentu í uppskerubresti og því munu kartöflur verða mun dýrari eftir áramótin þegar innflutningur hefst með krónuna eins og hún er.
Þar sem ég keypti fullt af grænmeti í grænmetislasagnaið í síðustu viku er um að gera að nýta það í þessari viku og ætla ég að byrja á ratatuille og vinna mig svo áfram eftir vikunni en vonandi mun ég fæða eins og eitt lítið kríli í þessari viku þannig að kannski verður einhver skortur á uppskriftum.

Matseðill fyrir vikuna 31.08.-04.09

Mánudagur
Ofngrillaður kjúklingur með ratatuille

Þriðjudagur
Blómkáls-og brokkólísúpa

Miðvikudagur
Ofnbökuð ýsa með pestó, tómötum og mangó/ananassalsa

Fimmtudagur
Einfalt pasta með steiktum strengjabaunum og kryddjurtaolíu

Föstudagur
Enn og aftur tapaði eiginmaðurinn sér á svínakjötsútsölu og verða því grilluð svínarif þennan föstudaginn

Matseðill fyrir vikuna 24.08-28.08 2009

2009-08-26T22:30:00.007+02:00

Nú fer að líða að komutíma barnsins þannig að ég ákvað í dag að búa til nokkra rétti sem ég get fryst og notað þegar barnið er komið og enginn hefur tíma né orku í að elda kvöldmatinn. Þannig að það var drifið í að búa til grænmetislasagn, venjulegt lasagn(extra stóran skammt) og svo notaði ég afganginn af kjötsósunni fyrir lasagnið til að nota sem bolognes sósu. Ég gerði í gær pestó sem ég skipti niður í skammta og setti í poka og inn í frysti. Ég er að spá í að búa til úr uxahölunum á föstudaginn þ.e. ef ég verð ekki farin á fæðingardeildina. Ég hef nú þegar sett inn uppskriftirnar af lasagnainu, báðum og er best að hafa uppi á þeim með því að fara á google leit og setja inn lasagn sigurrós og grænmetislasagn sigurrós. Ég tvöfaldaði uppskriftina af lasagnainu og þannig átti nóg fyrir risastórt lasagn og fyrir bolognes sósu.
Í gær var ég mjög sein fyrir og bjó því bara til eggjaköku og kartöflur, einfalt og tók 20 mínútur.

Mánudagur
pylsur, letidagur

Þriðjudagur
eggjakaka með salsa, skinku og parmesan og soðnar kartöflur italian style, þá skrælir maður þær, saltar, dreypir sítrónusafa og síðast ólífuolíu yfir og hristir.

Miðvikudagur

fimmtudagur

Föstudagur
vonandi brasseraður uxahali

Við skulum svo bara sjá til með helgina, erfitt að plana svo langt fram í tímann þegar maður er kominn á steypirinn ;)

Matseðill fyrir vikuna 17.08-21.08.2009

2009-08-20T21:55:00.002+02:00

Nú gengur þetta kæruleysi ekki lengur, það að hafa ekki haft tíma eða öll óvæntu grillin og þess háttar í júlí hefur gert okkur mikinn grikk í fjármálum. Eyðslan hefur farið úr öllu hófi og því þarf ég nú að taka verulegar í r...gatið á okkur hjónakornunum og byrja á ný með matseðlagerð. Ég vil enn ekki trúa því að fyrsta haustlægðin sé að gera okkur lífið leitt þessa dagana og held enn í vonina um að sumarið sé ekki enn á enda. Ég neita því að fara í vetrarfötin bæði bókstsaflega og í eldhúsinu og held mig við sumarlega rétti.
Ég reyndi þessa vikuna að gera eitthvað annað en þetta venjulega með kjúklinginn, þar sem enn er hann ódýrastur og skrapp því til Mexíkó og hafði kjúklingaburrito á ódýran máta og svo daginn eftir þá nýtti ég afgangana þannig að ég hafði restina af burrito kökunum(fylltum) og svo var ég með supernachos með, þá tók ég afgangana af kjúklingafyllingunni og setti yfir nachos svo fullt af gulum baunum og reif svo ost yfir allt saman og bræddi, og hafði svo ostasósu og salsa með. Þetta sló í gegn, sérstaklega fannst dótturinni skemmtilegt að hafa snakk í kvöldmatinn, mikið sport.
Þar sem ég var ekki búin að negla niður neinn matseðil í upphafi vikunnar þá átti ég ekkert í ísskápnum í dag en var þó búin að kaupa Klaustursbleikju, þannig að úr varð hvítvínsbleikja með smjörblancheruðum gulrótum og kartöflum, ólífum og kapers.
En hér kemur þá matseðillinn

Mánudagur
Villisveppavelouté með baguette

Þriðjudagur
Kjúklingaburrito

Miðvikudagur
kjúklingaburrito með supernachos

Fimmtudagur
Hvítvínsbleikja með ólífum og kapers borið fram með smjörblancheruðum gulrótum og kartöflum

Föstudagur
Grænmetislasagna

Blóðbergskjúklingur með nýpum og gulrótum

2009-08-07T21:55:00.002+02:00

Ég ákvað að skella mér í matjurtagarðinn minn í morgun og fór upp í Heiðmörk í leiðinni til að athuga með bláber. Ég fann 2 bláber en hins vegar fann ég tvo Kúalubba, sem er sveppur. Ég kom því heim með fulla fötu af grænmeti, kryddi og salati og svona til að toppa náttúrufríkina tvo nýtýnda sveppi. Ég hlakkaði alveg svakalega til eldamennskunnar. Eins og ég er þá vildi ég hafa þetta sem fljótlegast og einfaldast og henti öllu í braising pottinn minn og bakaði í 40 mínútur og hafði svo soðnar og svo léttsteiktar kartöflur með ásamt rjómalöguðum Kúalubbasveppum. Þetta sló alveg í gegn hjá eiginmanninum.
Ég hefði kannski frekar viljað hafa lambakjöt en kjúklingurinn var kominn úr frystinum svo að hann varð fyrir valinu.

Blóðbergskjúklingur með nýpum og gulrótum
f/4
2 bakkar af kjúklingabitum
nokkuð af blóðbergi, saxað
nokkuð af bláberjalyngi, saxað
2 greinar af steinselju, saxað
4 gulrætur, litlar, skornar í bita
3 nýpur, skornar í bita
1/2 laukur, skorinn í þunnar sneiðar
2 msk ólífuolía
smá kjúklingakraftur
100 ml hvítvín
2 stór hvítlauksrif

Aðferð:
1. olían, hvítvínið og krafturin sett í eldfast mót, kjúklingurinn ofan á og hann saltaður og pipraður og svo er blóðberginu, bláberjalynginu og steinseljunni dreift yfir ásamt restinni af hráefninu. Þessu er svo stungið í ofninn við 190°C í 40 mínútur.
Borið fram með kartöflum og rjómalöguðum sveppum

Kartöflurnar sauð ég og léttsteikti svo með grænkáli, salti og pipar

Sveppina steikti ég með 1 litlum skallottulauk, söxuðum og hellti svo eins og 2 msk af rjóma útá þegar þeir voru orðnir vel steiktir. Rjóminn er látinn sjóða þar til hann þykknar sem tekur u.þ.b. 1 mínútu á heitri pönnu.

Hvítvíns-sinnepskjúklingur með sítrónurisotto

2009-07-30T22:28:00.002+02:00

Eins og sést þá er greinilega mánaðarmót og fáir seðlar eftir í veskinu, þar sem kjúklingur er allsráðandi kvöldverður.
Ég hafði lítinn tíma í kvöld þar sem fólk var orðið svangt og horfði á mig með blóðhlaupin augun og froðu vellandi úr munnvikunum og spurði ,, hvað er langt í matinn...grrrrr..." eða var það bara ég, gæti verið, hef aldrei verið neitt sérstaklega þolinmóð þegar hungrið sverfur að.
Þannig að þessi fór í ofninn eftir 2 mínútur af sinneps- og hvítvínsnuddi og á meðan hann var að malla í ofninum þá henti ég í risottoið, svona til að dreifa huganum frá hungrinu.
En viti menn þetta var fáránlega gott og allir voru í gríðarlegu sumarstuði eftir matinn, saddir og sáttir.

Hvítvíns-og sinnepskjúklingur
f/4
2 bakkar af kjúklingabitum
2-3 msk dijon sinnep
3 hvítlauksrif, skorin gróft
2 msk ólífur
1 msk capers
100 ml hvítvín
25 gr smjör
salt og nýmalaður pipar
Smá sesamfræ

AÐferð:
1. Hellið hvítvíninu í eldfast mót sem rúmar alla kjúklingabitana.
2. Smyrjið kjúklinginn með sinnepi, skerið hvítlaukinn gróft yfir, dreifið ólífunum og capersinu yfir. Saltið og piprið kjúklinginn og svo stráið sesamfræjum síðast yfir kjúklinginn. Bakið í ofni við 200°C í 30 mínútur.

Sítrónurisotto
f/4
1,5 ltr kjúklingasoð, léttsjóðandi
80 gr smjör
1 saxaður lítill laukur, eða 2 litlir skallottulaukar
350 gr risottogrjón
1/2 sítróna, allur sítrónubörkurinn rifinn og smá af safanum
2 msk ólífuolía
100 ml hvítvín

Aðferð:
1. Látið soðið sjóða og haldið því rétt sjóðandi
2. Hitið ólífuolíuna og smá af smjörinu og þegar smjörið fer að bulla bætið söxuðum lauknum saman við og léttsteikið bætið þá grjónunum saman við og hitið í ca 4 mínútur. Hellið þá hvítvíninu saman við og látið sjóða niður. Byrjið þá að bæta soðinu saman við eina ausu í senn og látið grjónin taka upp vökvann eftir hverja ausu, þegar vökvinn hefur næstum verið drukkinn af grjónunum bætið þá annarri við þar til þið hafið notað næstum allt soðið þá er gott að byrja að smakka á þeim til að hafa þau alveg eins og þið viljið hafa þau. Þegar þau eru tilbúin og mjúk er sítrónuberkinum og safa bætt saman við ásamt salti og pipar og smjörklípu. Smakkið til með sítrónusafa og salti og pipar eftir smekk.

Gott að bera fram ferskst salat með.

Súper fljótlegur kryddjurtagrillkjúklingur

2009-07-23T22:39:00.003+02:00

Ég viðurkenni það ég nennti ekki að elda í kvöld þannig að ég henti í ótrúlega fljótlegan kjúkling og hann var svo góður að ég varð að setja hann hérna inn. Þessi er kannski meira fyrir þá sem eru að rækta kryddjurtir eða sem tíma að kaupa þær. Þær eru nefnilega notaðar í óhófi í þetta skiptið, sem er svo gaman svona annað slagið.

Kryddjurtakjúklingur með beikoni
f/4
2 bakkar kjúklingabitar, bara þeir ódýrustu
6 msk sítrónumelissa, söxuð
3 msk mynta, söxuð
4 msk timían, saxað
2 msk steinselja, söxuð
4 msk ólífuolía
2 msk edik af einhverju tagi, ég notaði mangó balsamik edik
2 msk sýróp, ég notaði maple
Flögusalt og pipar
1 pakki beikon

Aðferð:
1. Saxið allt kryddið og setjið í skál ásamtöllu hinu fyrir utan saltið og piparinn.
2. Saltið og piprið kjúklinginn vel.
3. veltið hverjum bita vel upp úr olíu og kryddjurtablöndunni og nuddið aðeins inn í kjúklinginn
4. Setjið í eldfast mót og leggjið svo beikonið yfir þannig að hylji. bakið í ofni við 210°C í 30 mínútur færið þá beikonið aðeins til hliðar og setjið svo á grillstillingu í ca 5 mínútur eða þar til beikonið er stökkt og hefur minnkað og kjúklingurinn gullinbrúnn.

Berið fram með steiktum kartöflum eða frönskum eða ofnbökuðum.

Ég sauð kartöflur og setti í eldfast mót og bakaði með kjúklingnum síðustu 10 mínúturnar af eldunartímanum með salti og pipar og ólífuolíu.

Grillaður rabbarbaralax með nýju smælki

2009-07-14T21:45:00.003+02:00

Þessa dagana er tilvalið að fara í sitt nánasta umhverfi og ræna arfa og rabbarbara sem vex villtur, enda er allt matarkyns að hækka í verði ekki satt, um að gera að spara sér aurinn.
Ég fór því upp á hæðina sem er hér við enda götunnar og þar sá ég breiðurnar af villtum rabbarbara og kerfli svo að ég týndi mér smávegis í matinn. Ég hafði freistast í Melabúðina og keypt mér villt laxaflök og týndi smælki úr kartöflustaflanum sem var nýkominn úr týnslu. Enda gat ég ekki beðið eftir kvöldmatnum.
Þess vegna verður smá rabbarbaraþema kvöldmatarins í kvöld og ég get sagt ykkur það að við vorum í sjöunda himni!
Með þessu hafði ég svo rabbarbarasósu bragðbætta með chilli og balsamik ediki

Grillaður Rabbarbaralax
f/4
200 gr á mann(flestir borða meira af laxi en öðrum fiski annars er venjulega 150 gr á mann af fiski)
400 gr rabbarbari
75 gr hrásykur
50 ml vatn
nokkur blöð af kerfli
1/2 sítróna, sneidd

Aðferð:
1. Skerið rabbarbarann í litla bita og setjið í djúpan pott ásamt sykrinum og látið sjóða við vægan hita í ca 30 mínútur eða þar til rabbarbarinn er meyr en nokkrir harðari en aðrir. Sigtið og kælið.
2. Þvoið vel kerfilinn og leggjið hann á álpappír nægilega stóran til að fara utan um laxaflökin. Leggjið laxinn á kerfilinn og saltið og piprið laxinn og makið svo rabbarbaranum yfir og síðast leggjið sítrónusneiðarnar yfir og pakkið svo öllu inn í álpappírinn þannig að kerfillinn farin einnig yfir laxinn. Grillið við meðal háan hita á roðhliðinni í 7 mínútur og svo á kjöthliðinni í 3 mínútur.

Rabbarbarasósa
f/4
sýrópið sem kom af rabbarbaranum
1/2 chillialdin, saxið smátt
1 skallottulaukur, saxið smátt
1 msk balsamik edik
salt og pipar
1/2 msk ólífuolía, eða hvaða olía sem er

Aðferð:
1.Hitið olíuna í litlum potti og léttsteikið laukinn og chillialdinið, þegar það hefur mýkst er edikinu bætt saman við og látið sjóða alveg niður þá er sýrópinu bætt saman við og suðan látin koma upp, tekið af hitanum og saltað og piprað.

Smælki
f/4
100 gr á mann
50 gr smjör
flögusalt

Sjóðið kartöflurnar og þegar þær eru soðnar er smjöri bætt saman við og þær saltaðar. Berið strax fram.

Ég setti laxinn á rétt eftir að ég byrjaði að sjóða kartöflurnar. Sósuna var ég búin að gera áður en ég setti nokkuð á grill eða heita hellu.

Gott er að hafa ferskt salat með þessu öllu saman.

Grillað lambaprime marinerað í blóðbergi

2009-07-13T22:12:00.003+02:00

Ég skellti mér upp á Valhúsahæð áðan en þar vex blóðberg eins og ég veit ekki hvað,út um allt þarna og bara bíður eftir að vera tínt, og ég tíndi heilmikið til að marinera lambaprime.
Lambaprime er eitt af því grillkjöti sem hefur verið hvað mest á tilboði í sumar og við höfum nýtt okkur það óspart því þetta er dýrindis kjöt, alltaf mjúkt, það eina sem þarf að passa er að skera af of mikla fitu sem getur verið á því, annars þarf ekker að gera við það.
Ég fór með svona í útilegu um daginn og setti í marineringu áður en lagt var af stað og það var svo mjúkt og bragðmikið eftir að hafa legið í marineringunni í 2 daga að ég er enn að láta mig dreyma um unaðslegt bragðið.
Í marineringuna í þetta skiptið notaði ég það sem hendi var næst og leyfði blóðberginu að njóta sín sem mest þannig að engar aðrar kryddjurtir voru notaðar og vökvi sem ýtir frekar undir bragðmikið blóðbergið frekar en að yfirgnæfa eða vera of bragðdauft. Með þessu bar ég fram nýjar kartöflur soðnar og svo velt upp úr smjöri og salti og nýtti svo afganginn af sósunni frá því í gær, grísku jógúrtinni með kryddjurtunum.

Marinering fyrir grillað lambaprime
f/4
200 gr á mann af kjöti
4 hvítlauksrif
2 tsk sinnep
2 góðar lúkur af blóbergi
salt og pipar
2 msk balsamik edik
4 msk ólífuolía(eða bara olía af einhverju tagi)
smá sletta af sherry, má sleppa
2 msk vodka(Reyka)

Aðferð:
1. Öllu hrært saman og kjötinu velt upp úr og látið liggja í leginum eins lengi og þið hafið tíma í en gott er að hafa það a.m.k. 30 mín til klukkutíma.
2. Grillið með öllu gúmmulaðinu á í ca 10 mínútur á meðalháum hita á hvorri hlið eða þar til vökvi sem rennur úr kjötinu er orðinn ljósrauður, fyrir medium steikt. Passið þá að stinga aðeins örlitla stungu í kjötið til þess að vökvinn fari ekki allur úr kjötinu og skilji eftir þurrt kjöt.
Berið fram með nýjum íslenskum kartöflum velt upp úr smjöri og salti
og góðri grillsósu

Grillaður þorskur með kryddjurtum,lime, grískri jógúrt og steiktum kartöflum

2009-07-12T23:18:00.003+02:00

Tölvan okkar er enn biluð þannig að ég er núna á lánstölvu og get því sett inn uppskriftir á ný.
Við höfum verið eitthvað löt við matseðlagerð síðustu vikur og hefur matarreikningurinn hækkar svo um munar, því verð ég að hætta þessu rugli og halda áfram með matseðlana.
Þar sem kryddjurtirnar mínar lifa dúndurgóðu lífi í glugganum hjá mér og úti í beði hef ég verið dugleg að nýta mér þær og ég mun örugglega setja inn nokkrar uppskriftir í sumar þar sem ég notast við þær, maður þarf nefnilega að grisja svona annað slagið.
Ég fór einnig í matjurtagarðinn minn í dag og þar náði ég mér í dýrindis grænkál og silfurblöðkur þar sem það þurfti líka að grisja af þeim. Þannig að kvöldmaturinn var uppfullur af vítamínum og fersku salati og kryddjurtum.
Ég fékk alveg frábæran þorsk hjá vinkonu minni en maðurinn hennar hafði farið í sjóstangaveiði og veitt hann, lítill og sætur en ofboðslega bragðgóður.
Með honum bar ég fram salat með strengjabaunum,avócadó og ristuðum söltuðum cashew hnetum, ásamt fersku grænkálssalati, steiktum kartöflum krydduðum með ferskum kryddjurtum og svo síðast en ekki síst kaldri sósu úr grískri jógúrt, hvítvíni og enn og aftur ferskum kryddjurtum.
Ykkur finnst þetta kannski einum of mikið en það tekur smá tíma fyrir þorskinn að grillast þegar hann er grillaður heill svo að ég var bara að nýta tímann í rauninni. Hann tók 40 mín á grillinu og það er tíminn sem ég tók í allt meðlætið, fyrir þá utan suðuna á kartöflunum því það gerði ég löngu áður og steikti svo alveg undir það síðasta.

Grillaður þorskur með ferskum kryddjurtum og lime
f/4
1 heill lítill þorskur, hreinsaður
1/2 lime
3 greinar timían
smá mynta
smá sítrónu melissa
smá basilíka
smá steinselja

Aðferð:
1. Þorskurinn er hreinsaður og skolaður vel og svo eru kryddjurtunum og limesneiðum komið fyrir í sárinu.
2. Pakkið svo inn í álpappír og setjið á meðalheitt grill og grillið í 20 mín á hvorri hlið.

Strengjabaunasalat með avócadó og ristuðum cashew hnetum
f/4
3 lúkur af frosnum baunum en mæli heldur með ferskum í þetta og þá ætti 2 bakkar að duga
1/2 avócadó
1 lúka af cashew hnetum, ég keypti hreinar en það er hægt að kaupa ristaðar og saltaðar
flögusalt og pipar
extra virgin ólífuolía
smá limesafi

Aðferð:
1. Baunirnar eru soðnar örstutt og skellt svo í ískalt vatn á eftir, þerraðar og sett á stóran disk
2. skerið avócadó í sneiðar og berið limesafa á til að hann brúnist ekki
3. Ristið hneturnar og saltið
4. Dreifið avócadóinu og hnetunum yfir baunirnar og hellið svo smávegis af ólífuolíu í mjórri bunu yfir allt saman og saltið og piprið.

Grænkálssalat
einfalt:
rífið niður grænkál og setjið í skál og hellið vinaigrette yfir, ég nota úr mangóbalsamik ediki og olíu

Kryddjurtasósa úr grískri jógúrt og hvítvíni
f/4
2 kúfaðar matskeiðar af grískri jógúrt
3 msk mable sýrópi
3 msk hvítvín
smá sítrónu melissa
smá mynta
smá basilíka
flögusalt og pipar

Aðferð:
1. Saxið kryddjurtirnar og blandið saman við jógúrtina, sýrópið og hvítvínið. Hrærið öllu vel saman og smakkið til. Ef ykkur finnst þurfa meira sætt endilega setjið meira af sýrópinu og ef ykkur þykir hún ekki nægilega bragðmikil er gott að bæta hvítvíni og salti útí og jafnvel smá sítrónu-eða limesafa.

Steiktar kartöflur með kryddjurtum
f/4
ca 400 gr kartöflur, soðnar
smá sítrónu melissa
smá mynta
smá basilíka
salt og pipar
3-4 msk extra virgin ólífuolía

Aðferð:
1. Sjóðið kartöflurnar, skrælið og þerrið
2. Saxið kryddjurtirnar
3. Hitið olíuna á stórri pönnu þar til hún er vel heit setjið þá kartöflurnar á pönnuna og steikið við meðal-háan hita þar til þær brúnast vel(hægt að bæta niðurskornu hvítlauksrifi saman við).
4. Þegar þær eru tilbúnar fallega brúnar þá eru þær settar í skál og kryddjurtunum dreift yfir ásamt salti og pipar.

Tölvubilanir

2009-06-28T20:22:00.002+02:00

Já tölvan okkar crashaði í vikunni og hef ég því ekkert getað komið inn uppskriftum eða öðru hér á síðuna.
Eiginmaðurinn sá um kjúklinginn í vikunni og vildi endilega grilla hann og hann bætti hnetusmjöri saman við BBQ uppskriftina mína og það kom svo fáránlega vel út að það verður pottþétt gert aftur. Hann er alveg svakalegur dashari að það er vonlaust að komast að því hversu mikið hann setti í uppskriftina.
Ég fékk ekki villtan lax í þessari viku en vona að hann komi í næstu svo að ég geti fullnægt þeirri þörf. Maður á víst að borða mikið af laxi og bleikju á meðgöngu, eða helst feitu fiskunum, sem eru svo sem fleiri en þessir fara best ofan í restina af fjölskyldunni.

Matseðill fyrir vikuna 24.06-27.06

2009-06-23T22:33:00.002+02:00

Ég frétti af villtum laxi í Melabúðinni í vikunni en það var víst lítið af honum því hann er búinn en ég bíð bara spennt eftir næstu sendingu og verð þá með eitthvað gómsætt með villtum laxi sem er algjört uppáhald hjá mér.
Ég er víst með mikið æði fyrir ávöxtum þessa dagana og hef borðað ógrynnin öll af þeim og það hefur ekki verið ódýrt, er gjörsamlega búin að sprengja vikueyðsluna með þessu. Á 5 dögum eru farin 4 epli,1,5 ananas(stór), 4 bananar, ´1/2 melóna, 2 appelsínur og ca 10 ferskjur, já ég get sagt ykkur að það kostar að vera ófrískur með æði. Þar að auki er ég með æði fyrir múslí sem er ekki heldur neitt sérstaklega ódýrt heldur og fer ég núna að búa til mína eigin blöndu þar sem ég er að fara með 1 kg á viku af þessu.

En að matnum, þar sem ég hef eytt vikupeningnum í þetta allt saman þá verð ég að vera extra sparsöm í kvöldmatnum. Ég væri alveg til í kjúklingasúpu á morgun með einhvers konar austurlenskum árhifum, kannski er það rigningin sem kemur þessari löngun í mig.
en best að koma inn matseðlinum:

Miðvikudagur
kjúklingasúpa með austurlenskum áhrifum

Fimmtudagur
ég ætla að reyna að ná í lax

Föstudagur
kallinn vill hafa grill ætli við sjáum ekki hvað verður á tilboði og ég ætla að hafa bakaðar kartöflur með og svokallaða piparsósu með en það er enginn rjómi og ekkert majónes, hmm spennandi.

Laugardagur
já við sjáum til hvar við verðum...

Grilluð klaustursbleikja vafin í kerfil með kryddjurtakartöflumús

2009-06-18T22:46:00.002+02:00

Ég fór í bakgarðinn hjá móður minni í dag og nældi mér í kerfil og svo í alveg hreint frábæra Klaustursbleikju á Freyjugötunni, ég þurfti svo að hreinsa af kryddjurtunum mínum úr glugganum, þar sem þær voru farnar að svigna undan þungum stórum blöðum, og úr varð ótrúlega gómsæt máltíð.
Þetta var allt svo sumarlegt og ferskt og létt í maga, ég mæli með þessum frábæra sumarrétti.
Ég var að frétta af villtum laxi í Melabúðinni í dag, þannig að ég fer hiklaust þangað í næstu viku og vonandi næ ég mér í einn slíkan, ég fæ ekki nóg af honum.
Ég bar þetta svo fram með ofnbökuðu brokkólí og strengjabaunum með parmesanosti, og Ab-mjólkursósunni sem ég var með síðast með bleikjunni(Ab-mjólk,maple sýróp og mynta)
En hér er uppskriftin sem er bæði einföld og fljótleg.

Grilluð Klaustursbleikja umvafin kerfli
f/4
2 heilar bleikjur
1 lime
fullt af kerfli
salt og pipar
annað hvort grillfiskigrind eða 2 grillbakkar

Aðferð:
1. Fyllið vaskinn af köldu vatni og dýfið kerflinum ofan í og hristið vel. Takið svo uppúr og annað hvort hristið vel eða setjið í salatvindu(ef þið eigið svoleiðis).
2. Þvoið fiskinn og þerrið með þurrku. Saltið og piprið að innan og utan. Skerið lime í sneiðar og leggjið innan í fiskinn.
3. Leggjið kerfil á bakkann og setjið fiskinn ofan á hreiðrið og setjið svo kerfil ofan á hann einnig.
4. Búið til kartöflumúsina og brokkólíið áður en fiskurinn er grillaður, þar sem það tekur svo stuttan tíma að grilla hann þá er best að hfa allt annað tilbúið og hita það svo bara upp rétt áður en fiskurinn er tilbúinn.

Kryddjurtakartöflumús
f/4
5-6 meðalstórar kartöflur, soðnar og maukaðar
4 msk fersk basilíka og sítrónumelissa, saxað
100-150 gr smjör
100 ml mjólk
salt og pipar

Aðferð:
1. Sjóðið kartöflurnar og maukið
2. stappið smjörið með kryddjurtunum og bætið svo út í heita músina og bætið mjólk smátt og smátt saman við þannig að hún verði léttari og vel hægt að hræra í henni, saltið eftir smekk og piprið, oft er smekksatriði með hversu mikið smjör og salt er notað því er best að smakka sig áfram og bæta alltaf smátt og smátt saman við og smakka. Best er að hræra í músinni yfir lágum hita og passa að leyfa henni ekki að sitja á hellunni þannig að hún brenni við.

Bakað brokkólí og strengjabaunir með parmesan
f/4
1/2 brokkólíhaus
2 lúkur af strengjabaunum
4 msk parmesan, rifinn gróft
1-2 msk extra virgin ólífuolía
salt og pipar

Aðferð:
1. Skerið brokkólíið í smá blóm og látið renna vatn á baunirnar ef þið eruð að nota frosnar.
2. Leggjð í eldfast mót og kveikið á ofninum á 180°C.
3. Hellið olíunni yfir og veltið upp úr henni, saltið og piprið og dreifið/rífið ostinn yfir
4. Bakið í 20-30 mínútur.

matseðill fyrir vikuna 16.06-19.06

2009-06-16T20:12:00.002+02:00

Nú er sumarið gengið í garð með sínum hefðbundnu skrítnu vikum. Það er óvíst hvar maður verður hvern dag og óvænt heimboð færast í aukana, hvílíkur unaður!
Ég hef nú samt sem áður sett saman smá matseðil fyrir vikuna og kannski verður úr þessu hjá mér og kannski ekki það kemur bara í ljós.
Ég er komin með kryddjurtir út í glugga og setti kaffikorg í moldina hjá þeim fyrir helgi og fór svo út úr bænum í 2 daga, þegar ég kom heim þá höfðu þær vaxið um a.m.k. 5 sentímetra! Ég trúði ekki mínum eigin augum. Ég hef heldur ekki séð neina lús á basilíkunni, vonandi virkar þetta á þær líka.
Ég fer svo á morgun upp í matjurtagarðinn minn og set kaffikorg á grænmetið þar, það á víst að halda kálflugunni frá og hraða á vexti, vonandi virkar það eins vel og á kryddjurtirnar mínar.
Ég fór um helgina í tjaldferðalag og skemmti mér konunglega, að sjálfsögðu, nema hvað að það var auðvitað grillað og grillað. Ég hafði því, ásamt eiginmanninum, sett lambaprime í marineringu, búið til marineringu fyrir svínarif, búið til túnfisksalat og miðjarðarhafssósuna og kartöflusalat, ásamt að sjálfsögðu samlokum og flatkökum með hangikjeti. Lambakjötið lá í marineringu í 2 daga og var svo ótrúlega mjúkt og unaðslega bragðgott að það er á hreinu að ég geri þetta aftur, en ég er hins vegar komin með nóg af majónes/sýrðum sósum og ætla því að einbeita mér að einhvers konar léttum grillsósum á næstu vikum án majónessins og sýrða rjómans.
Þegar ég fór í síðustu viku að kaupa bleikju hjá fisksalanum í Þingholtinu þá upplýsti hún mig um það að á miðvikudögum fengi hún Klaustursbleikju, en það er einmitt bleikjan sem við notum á Voxinu og er algjört dúndur, ég ætla því að fara á fimmtudaginn og kaupa mér hjá henni.
En hér er matseðill vikunnar:

Þriðjudagur
Bakað tómatpasta með osti og parmesan, borið fram með brauði

Miðvikudagur
Þjóðhátíðardagur, best að plana sem minnst...

Fimmtudagur
Grilluð bleikja í kerfli með blóðbergskartöflumús

Föstudagur
Bómkáls- og brokkólíeggjabaka með chillipiparsósu og gúrku-og myntusalati

Grilluð bleikja með steiktum ananas og myntujógúrtsósu

2009-06-09T22:58:00.002+02:00

Ég tók mig loksins til og eldaði fiskinn sem ég hef ætlað að gera í ansi langan tíma. Ég fór reyndar í Kolaportið um helgina og keypti mér Sílamávsegg og Svartfuglsegg, og ég sauð þau með matnum í kvöld. Þau voru mjög góð á bragðið en það var svo slepjulegt eitthvað að taka utan af þeim að ég missti eiginlega lystina á þeim en fjölskyldan var alveg rosalega sátt við þau, ég harðsauð þau og blandaði svo smá smjöri og salti saman við og hakkaði saman með töfrasprota og hitaði þangað til þau voru þurr.
Ananasinn í búðunum núna er alveg rosalega sætur og góður og ég mæli með því að nota hann í allt, hann er svo sumarlegur og ferskur og safaríkur.
Myntan er líka mjög sumarleg og fersk og kemur sterk inn. Mér finnst ekki passa við svona léttan og góðan mat eins og bleikju að vera með þykka majónessósu og langaði því í eitthvað annað en hafði samt ekki orku í að kokka upp eitthvað flókið og tímafrekt þannig að úr varð þessi dýrindissósa með AB-mjólk, maple sýrópi og myntu, þunn eins og mér fannst passa við og svo myntan sem lyfti henni á hærra plan.

Grilluð bleikja með steiktum ananas og myntujógúrtsósu
f/4
800-1 kg bleikja, beinhreinsið og skolið vel og þerrið svo með bréfi
1 lime, skorin í þunnar sneiðar
salt og pipar

Steiktur ananas með chilli og skallottulauk
2/3 ananas
2 litlir skallottulaukar, saxaðir eða sneiddir þunnt
1/2 chilli, grænn eða rauður, saxaður smátt
smá olía

Borið fram með kartöflumús

AB-mjólkursósa með mynta
200 ml ab-mjólk
2-3 msk mablesýróp
1 msk mynta, söxuð

Aðferð:
1. Sjóðið kartöflurnar
2. Skerið ananasinn, chillialdinið og skallottulaukinn og steikið í olíu í potti þar til laukurinn og chillialdinið er mjúkt, hægt er að hita þetta aftur upp þegar allt er tilbúið.
3. Hitið grillið og búið til sósuna
4. Þegar grillið er orðið heitt og kartöflurnar soðnar er bleikjan sett á grillið(á grillbakka með roðhliðina niður), hafið á meðal hita í ca. 5 mínútur á roðhliðinni eða þar til hann er tilbúinn(misjafnt eftir grillum).
5. Á meðan bleikjan er á grillinu er kartöflumúsin búin til, skrælið kartöflurnar og stappið, bætið smjöri, smá mjólk og saltið og piprið þar til hún smakkast guðdómlega(ég er algjör kartöflustöppuaðdáandi).
6. Gott er að hræra í músinni í potti yfir meðal-lágum hita og hita ananasinn upp á meðan á annarri hellu, þannig ætti allt að vera heitt þegar bleikjan er tilbúin.

Mjög gott er að bera þetta fram með ristuðu brauði smurðu með smjöri á meðan það er heitt til að smjörið bráðni og skerið í þríhyrninga

Sætur sítrónukjúklingur með stökkri húð og spaghetti með strengjabaunum

2009-06-06T12:22:00.004+02:00

Það er búið að vera svo brjálað að gera hjá okkur systrunum í undirbúningi fyrir sextugs afmæli móður minnar að það fór lítið fyrir fisknum á fimmtudaginn og svo í gær var svo farið á veitingastaðinn Dill, sem er þvílík snilld, mæli með honum.
Ég hins vegar eldaði dýrindisrétt á miðvikudaginn og ætla ég að setja hann hér inn, hann var hreint unaðslegur.
Ég hafði reyndar ekki tíma til að marinera þannig að þeir sem hafa tíma þá er það örugglega betra og þá er best að marinera hann í sólarhring.
Ég átti svo lítinn bakka af kjúkling og var því hrædd um að hann myndi ekki duga handa okkur og ákvað að hafa spaghetti með og það kom bara mjög vel út og það er alveg pottþétt að ég geri þennan rétt aftur. Þetta tók mig líka ca 15 mín fyrir utan tímann sem ég þurfti að bíða eftir kjúklingnum í ofninum og spaghetti-inu að sjóða, þannig að þennan rétt má alveg flokka undir fljótlegan rétt.

Sítrónukjúklingur með stökkri húð
f/4
1 kjúklingur eða 2 bakkar af kjúklingabitum
1-2 sítrónur(fer eftir stærð þeirra), bæði safinn og börkurinn(rifinn)
4 msk púðursykur
1 kjúklingakraftsteningur
vatn
salt og pipar
hveiti til að velta upp úr
2 hvítlauksrif

Spaghetti með strengjabaunum
f/4
80-100 gr af þurru spaghetti á mann
2 lúkur strengjabaunir(ég notaði bara frosnar)
1 stór skallottulaukur, saxaður
extra virgin ólífuolía

Aðferð-kjúklingur:
1. Skerið fitu og aukahúð af kjúklingnum og veltið upp úr hveiti og dustið aukahveiti af
2. Steikið kjúklinginn í olíu(má vera hvaða olía sem er) þar til hann verður gullinbrúnn,saltið hann og piprið.
3. Setjið kjúklingakraftinn í eldfast mót ásamt smá botnfylli af vatni, leggjið svo kjúklingabitana í mótið og rífið sítrónubörkinn yfir og kreistið svo sítrónurnar yfir og skerið hvítlaukinn gróft og dreifið í botninn á mótinu. Smyrjið svo púðursykri jafnt yfir húðina á kjúklingnum og bakið í ofninum við 200°C í 25-30 mínútur(fer eftir stærð bitanna, tékkið alltaf á stærsta bitanum hvort hann sé tilbúinn). Einnig er hægt að skera þunnar sítrónusneiðar og smyrja með smá púðursykri og stinga á milli kjúklingabitanna ef þið viljið.
4. Á meðan kjúklingurinn er í ofninum er spaghetti-ið soðið og strengjabaunirnar steiktar við meðalhita ásamt lauknum, það er í lagi að laukurinn verði stökkur og brúnn en passið að hann brenni ekki. Gott er að vera óspar á olíuna og nota extra virgin og steikja þetta vel og lengi. Saltið og piprið, best að nota flögusaltið hér.
5. Þegar spaghetti-ið er soðið er það sigtað og svo hellt á pönnuna með baununum og blandað vel saman og borið fram með kjúklingnum.
6. Þegar kjúklingurinn er borinn fram er gott að ausa vökvanum í mótinu rétt aðeins yfir húðina á kjúklingnum til að hafa þetta aðeins safaríkara.

Aths. ef þið ætlið að marinera kjúklinginn er best að setja bitana í skál og kreista sítrónurnar yfir þannig að vökvinn hylji(það gæti þurft fleiri sítrónur í þetta)og sleppið þá sítrónusafanum þegar hann er eldaður í ofninum og hafði aðeins kjúklingasoðið.
Þetta er fljótleg útgáfa af kjúklingnum sem var í brúðkaupinu mínu og við höfum notað þennan rétt í ansi margar veislur, hann slær alltaf í gegn!

matseðill fyrir vikuna 02.06.-07.06

2009-06-02T21:30:00.002+02:00

Það verður smá sumarblær á matseðlinum þessa vikuna enda kominn júní. Ég tók mig og fjölskylduna til í dag og í gær og plantaði alls konar góðgæti í matjurtagarðinn sem ég hef tekið á leigu og hlakka mikið til í haust þegar ég má taka upp og sjá árangur erfiðisins.
Þar sem við vorum að vinna í garðinum fram að kvöldmatarleyti og allir glorhungraðir þegar heim var komið þá tók eiginmaðurinn sig til og bjó til dýrindis samlokur, fullar af mat, tóamtar,ostur,skinka, harðsoðin egg, agúrka og salat og bragðbætt með Dijon sinnepi og majónesi(brauðsneiðarnar eru ristaðar fyrst), bara mjög góður skyndibiti.
Á morgun byrjar svo vikan fyrir alvöru í matardagskránni.
Ég ákvað að hafa grillaðar pizzur í gær og fann það út að það er best að taka botninn og grilla hann á annarri hliðinni fyrst og svo snúa við og setja fyllinguna og ostinn og grilla þá hina hliðina og loka grillinu. Þetta er nú örugglega misjafnt eftir grillum en svona virkar þetta best hjá okkur.
Ég gerði spaghetti carbonara(uppskrift komin inn, bara googla) og grillaði grófar margaritupizzur með, þá bjó ég til margar litlar pizzur, það kom mjög vel út og Heklu fannst það algjört æði að hafa litlar barnapizzur eins og hún kallaði þær.

Þriðjudagur
Samlokur

Miðvikudagur
Sítrónumarineruð kjúklingalæri með stökkri húð borið fram með hrísgrjónum og salati

Fimmtudagur
Grilluð bleikja í kerfli með steiktum chilli ananas, ofnsteiktum myntukartöflum og fersku salati

Föstudagur
Á þessum degi verður farið út að borða á Dill og hlakka ég svakalega til!

Laugardagur
eins og fyrr vil ég ekkert ákveða með þennan dag, það getur ýmislegt skemmtilegt gerst á laugardögum

Sunnudagur
Lauflétt pasta með strengjabaunum og myntu borið fram með fersku salati og brauði

Grillaður kjúklingur með indverskri kryddblöndu

2009-05-28T21:59:00.001+02:00

Ég hef mikið lesið af amerískum matartímaritum og þar hefur hefur mikið verið talað um ,,spice rub" sem er blanda af kryddum og engu öðru, ég hef oft velt því fyrir mér hvort það gæti verið of þurrt en kryddblöndurnar eru alltaf svo girnilegar að ég hef ekki getið hætt að hugsa um þetta fyrirbæri.
Ég ákvað því í kvöld að láta verða af þessu og bjó til mína eigin blöndu og ég varð svo sannarlega ekki svikin! Ég geri þetta aftur það er á hreinu. Ég hafði kjúklinginn í þetta skiptið á beinunum á grillbakka í ca 40 mínútur á grillinu við meðal hita og svo síðustu 10 mínúturnar setti ég hann á húðhliðina til að fá hann örlítið brenndan, eins og grillmatur á að vera.
Kjúklingurinn er skorinn eftir endilöngu á undirhliðinni og svo þvingaður út þannig að hann sé tiltölulega flatur.

Grillaður kjúklingur nuddaður með indverskri kryddblöndu
F/4-5
1 kjúklingur
1 msk sinnepsfræ(ég notaði dökk þar sem ég átti þau til)
1/2 msk mulin kóríanderfræ(ég nota kaffikvörn)
1/2 msk múlin kardimomma
1/2 msk anísstjörnur(muldar)
salt og nýmulinn pipar(ég er nú svo heppin að luma á sýrlenskum pipar)
3 msk púðursykur

Aðferð:
1.Skerið kjúklinginn og hitið grillið
2.Setjið þurrkryddið á litla pönnu og hitið þar til það byrjar að lykta unaðslega
3.Blandið því svo saman við púðursykurinn og nuddið vel skinnið á kjúklingnum og saltið og piprið yfir hann allan.
4.Setjið hann með beinahliðina á grillbakkann og grillið við meðalhita í 40 mín(athugið kjúklinginn á 20 mín. fresti, grill eru mjög misheit og ef hann byrjar að brenna er um að gera að lækka hitann örlítið). Snúið kjúklingnum svo við síðustu 10 mínúturnar til að fá fallega rétt brennda húð á hann. Athugið hvort hann er tilbúinn með að stinga með beittum hníf í þykkasta hlutann(bringuna) og athugið hvort vökvinn sem kemur úr er á litinn, ef hann er glær er hann tilbúinn(allt sem hefur smá roða í vökvanum þýðir að hann er ekki tilbúinn).

Mjög gott er að bera fram með tatziki sósu eða hvers kyns jógúrtsósu og ofnbökuðum kartöflubátum krydduðum með hvítlauk og engifer, salti og pipar.

Gulrótarsúpa og steiktar strengjabaunir

2009-05-27T21:44:00.002+02:00

Kannski soldið skrítin samsetning en hún virkaði fyrir okkur stúlkurnar. Ég gerði strengjabaunirnar oft á þennan hátt þegar ég var au pair á Ítalíu fyrir óhemju mörgum árum síðan og gríp í þetta ennþá svona endrum og sinnum, þetta er eins og snakk svo gott er það. Það er svo sem engin uppskrift heldur set ég fullt af extra virgin ólífuolíu í stóra pönnu og svo hendi ég baununum á(ég nota hér á Íslandi frosnar og þær virka bara ágætlega) og salta vel og svo bara steiki ég þær í hel, þar til þær eru vel brúnar og steiktar og þá ríf ég parmesan yfir og steiki hann aðeins með og smakka svo til með enn meira flögusalti, þetta er æði ég lofa!
Gulrótarsúpan er líka mjög góð ég nota lítinn grænmetiskraf en fæ mér frekar kraft úr alls konar grænmeti sem ég finn í skápnum hjá mér og bæti svo einhverju bragðsterku eins og chilli, engifer og hvítlauk og nota það sem kryddið. Þetta er mjög næringarríkt og fyllandi.

Gulrótarsúpa
f/4
1/4 chilli
1 tsk engifer
2 lítil hvítlauksrif
1 msk rauð paprika
1 msk græn paprika
2 skallottulaukar
1 lítil kartafla
4 stórar gulrætur + 1 til viðbótar skorin sem skraut ofan í súpuna seinna
100 ml gulrótardjús, má vera hvað sem er ég notaði heilsudjús sem er blandaður og það virkaði bara mjög vel
vatn
grænmetiskraftur ef vill
1/2 msk smjör(ég notaði smjörva sem var í góðu lagi)

Aðferð:
1. Skerið allt grænmetið(skiptir ekki máli hvernig, það verður annað hvort hakkað eða sigtað frá)
2. Skerið gulræturnar fjórar frekar þunnt, til þess að þurfa ekki að sjóða súpuna mjög lengi, þar sem þynnri bitar eru tilbúnir fyrr heldur en þykkir bitar
3. Setjið smjörið í pott yfir meðal hita og hitið smjörið þar til það fer að freyða, bætið þá öllu grænmeti saman við fyrir utan gulræturnar. Létt steikið í ca 4 mínútur bætið þá gulrótunum saman við og léttsteikið áfram í 4 mínútur.
4. Hellið þá vatninu og djúsnum saman við þannig að fljóti yfir allt grænmetið og 2 cm til.
5. Sjóðið vel yfir meðal hita í ca 20-25 mínútur eða þar til gulræturnar eru meyrar, nú getið þið gert tvennt annað hvort hakkað þetta með töfrasprota og þá fáið þið kremaða mauksúpu eða þá sigtað súpuna og þá eruð þið með þunna grænmetissúpu, mér finnst hvoru tveggja alveg jafn gott, það fer eftir smekk hvers og eins.
6. Þegar búið er að hakka/sigta súpuna er hún bragðbætt með krafti/salti/pipar/djús eftir hvaða bragði þið leytið eftir, ég persónulega bragðbætti með þessu öllu saman. Þá er síðasta gulrótin sneidd mjög þunnt og sett útí og þetta látið sjóða þar til þær eru næstum meyrar en aðeins stökkar undir tönn.
7. Ég hafði þetta sem mauksúpu í þetta skiptið og bar fram með sýrðum rjóma og það var mjög gott og flott

Matseðill fyrir vikuna 25.05-31.05

2009-05-25T19:53:00.004+02:00

Það verður sparað þessa vikuna en þó er ég í svo miklu stuði eitthvað að ég verð að improvisera rosalega þessa vikuna! Það verður eitthvað tekið úr frystinum og þess háttar en í kvöld verður spennandi að sjá hvort það heppnast sem ég ætla að búa til, hmmm....

Mánudagur
afgangar af grillspjótum sett í pomodorospaghetti sósu með spaghettíi

Þriðjudagur
lasagna tekið úr frystinum borið fram með salati og brauði

Miðvikudagur(heyrði af úrslitaleik í einhverju, verð því bara að elda fyrir mig og litlu mýslu)
Gulrótarsúpa með brauði og steiktar strengjabaunir, við þurfum ekki meira stúlkurnar enda er þetta hvoru tveggja uppáhaldið okkar

Fimmtudagur
steiktur eða grilluð bleikja( ef ég næ mér í góða í fiskbúðinni) með steiktum ananas og austurlenskri sósu

Föstudagur
kjúklingurinn verður líklegast tekinn úr frystinum og ætla ég að hafa hann nokkurs konar grillaðan Diavolo kjúkling borið fram með bökuðum kartöflum

Laugardagur
hér er nú venjulega allt óvíst en best að gera ráð fyrir einhverju sem hægt er að frysta ef manni væri boðið í mat eða eitthvað kæmi uppá þannig að ég ætla að hafa afganga af kjúklingnum með afganga af kartöflusalati, það gæti líka verið að ég kíki aftur í Kolaportið og kaupi einhver spennandi egg eins og Langvíu og hafi með einhverjum fisk. Eins og ég segi allt kemur til greina!!

Sunnudagur
eigum við ekki bara að segja PIZZA og í þetta skiptið ætla ég að grilla hana/þær mmm nammi namm...

Marinerað lamb og svín á teinum

2009-05-25T19:35:00.002+02:00

Já við ákváðum að vígja nýja grillið okkar á laugardaginn og ákváðum við að gera grillspjót eins og Ítalirnir gera, ekki bara ein tegund af kjöti á hverjum teini, það gefur mjög sérstakt og gott bragð og þá er gott að hafa saman eitthvað feitt kjöt og svo magurt þannig fær maður safaríkt og gott kjöt á alla vegu. Ég fór líka niður í Kolaport og fékk nýuppteknar paprikur og agúrku og notaði paprikurnar í teinana, þær voru hreint unaðslegar, ég tók líka úr frystinum hörpudisk sem ég hafði lumað á í nokkurn tíma og úr varð heljarinnar veisla. Marineringin var líka algjört dúndur en mjög einföld og búin til úr því sem ég á alltaf í skápunum hjá mér.
Þessi vika hins vegar verður sparnaðarvika enda síðasta vika mánaðarins og þá er ekkert múður og naglasúpan verður að aðalmáltíð en maður verður nú að reyna að hafa hana kannski smá áhugaverða.

Spjót:
lambainnralæri
paprika(græn og rauð)
rauðlaukur
sveppir
svínarifjur(gott að fá fituna þaðan til að hafa þetta aðeins safaríkara, spjót geta oft þornað um of)

hörpudiskspjót:
hörpudiskur
lime(límóna)
tómatar
paprika(helst rauð)

Marinering fyrir kjötið:
f/2 innralæri(1 pakka)og ca 4-5 rifjur(1 pakka)
4-5 manns

3 msk balsamic edik
3 msk sojasósa
3 msk maple sýróp
1,5 msk púðursykur
2 tsk Dijon sinnep
50-100 ml olía(má vera hvaða sem er til á heimilinu)
salt og pipar(nýmalaður)

Aðferð:
1. allt fyrir utan olíuna sett í djúpa skál helst skál sem fylgir töfrasprotanum og þeytið með töfrasprotanum þar til vel blandað og hellið þá olíunni í mjórri bunu saman við þar til blandan þykknar.
2. Skerið kjötið í bita(ca 2x2 cm bita) og leggjið í marineringuna eins lengi og þið getið eða viljið. Ég hafði það í í ca 2 klst, og það kom mjög vel út.

Fyrir hörpudiskinn þá þræddi ég sitt á hvað á teina, hörpu-tómat-hörpu-papriku-hörpu og endaði á einum lime bát og setti í eldfast mót og dreypti smá sérrí yfir ásamt olíu til að það festist ekki eins við grillið. Ég hellti líka olíu á allt grænmetið áður en ég grillaði það.
Þetta varð allt svo safaríkt að ég þurfti enga grillsósu með en ég hafði þó kartöflusalatið hennar mömmu með og það passaði mjög vel við grillmatinn.

Sól og sumar

2009-05-21T20:18:00.003+02:00

Það er búin að vera svo mikil veðurblíða síðustu daga þannig að eldhúsverkin hafa setið á hakanum þessa vikuna og svo hefur okkur líka verið boðið í mat, sem er jú alltaf ótrúlega skemmtilegt. Ég ætla á morgun að grilla kjúkling að ítölskum hætti, þeir nefnilega skera heilan kjúkling eftir endilöngum kjúklingnum að neðan og svo er hann flattur út og grillaður. Ég á eftir að ákveða með hverju ég ætla að nudda hann upp úr en það verður eitthvað ótrúlega girnilegt, ég er í mjög svo girnilegu stuði þessa dagana. Ég er að fara um helgina að ná mér í sumarblóm, eiginmaðurinn bjó til beð handa mér í garðinum sem við höfum til umráða og svo verð ég með einhverjar kryddjurtir í glugganum. Ég reyndi fyrir 8 árum síðan(já mjög langt síðan) að hafa kryddjurtir í glugganum en þær fylltust af lús og ég réð ekki við neitt og þurfti að henda á endanum, mjög svo endasleppt það. En ég á vin sem hefur eina mest grænu fingur sem ég hef séð í langan tíma og hann sagði mér frá sérstöku eitri sem hægt væri að kaupa í dag í búðum og þess vegna hef ég ákveðið að prófa aftur. Nú er bara spurning um hvar ódýrustu blómapottana sé að finna.....
Til Hveragerðis fer ég með móður minni og sýstur til að kaupa sumarblómin og kryddjurtirnar, ég man eftir því að hafa farið með mömmu fyrir einhverjum árum að kaupa það sama og þeir voru með mjög áhugaverðar kryddjurtir þar, ekki bara það venjulega og ég vona að þeir séu með eitthvað spennandi í ár.
Ég mæli einnig með nýjum hóp á Fésbókinni(það kom einnig grein um það í Fréttablaðinu í dag) Kaupa beint frá býli. Þetta er hin mesta snilld! Ég hef nú lengi vitað til þess að frændfólk mitt sem eiga bústað rétt hjá Flúðum og hafa þau keypt beint frá gróðurhúsi þar rétt hjá og það jafnast ekkert á við þetta, hreint unaðslegt á bragðið, svo ferskt og gott, og mun bragðmeira en það sem maður hefur fengið í stórmörkuðunum hingað til.
En sem sagt fer lítið fyrir matseðli þessa vikuna en ég mun vonandi setja inn uppskriftina af grilluðum kjúkling á morgun.

Kjúklingamistök og skinkurúllur

2009-05-15T12:43:00.003+02:00

já kokkum tekst það líka, eða þannig. Ég fann uppskrift sem mér leist svo vel á, hún átti að vera frá Chile og í huganum var það voða sumarlegt og ég þuldi upp fyrir eiginmanninn hvað hann átti að gera, ég reyndar viðurkenni að ég átti ekki alveg allt í uppskriftina en hvað um það, og útkoman var bara la la þannig að hún mun ekki rata hingað inn. Ég hef þó ekki sagt skilið við uppskriftir frá Suður-Ameríku með þessu, ég hef aldrei komið þangað en hef heyrt að þar sé góðan mat að fá, þannig að ætli maður prófi ekki eitthvað annað í næstu viku frá Chile eða öðru landi þarna frá þessu gríðarflæmi.
Mig langaði samt til að segja ykkur frá snilldarhugmynd eiginmannsins. Með kartöflusalatinu sem ég vildi bara hafa eitt og sér eins og hjá mömmu(að viðbættum túnfisknum) þá tók hann á það ráð að leggja nokkrar ostsneiðar á skinkusneið og svo dósaaspas þar ofan á og rúlla svo upp og þar voru komnar dýrindis skinku-og aspasrúllur með kartöflusalatinu! Þetta var æðislegt! Mjög einfalt og sumarlegt.

Misomarinering með sojasósu og sesamolíu

2009-05-13T16:50:00.002+02:00

Ég prófaði þessa marineringu í fyrsta skipti í gær og kom hún mjög vel út. Ég var reyndar eitthvað gráðug og tvöfaldaði uppskriftina sem var algjör óþarfi þar sem marineringin er mjög bragðmikil, hún virðist vera fremur fátækleg við fyrstu sýn en örvæntið eigi því hún kemur á óvart(skemmtilega).

Misomarinering með sojasósu og sesamolíu
f/4(miðað við 200 gr af kjöti á mann, ath. ef kjötið er með mikilli fitu eða beini er best að miða við 250 gr á mann)
800 gr kjöt, ég notaði lambaprime en hægt er að notast við hvaða kjöt sem er
2 msk rautt miso
1 tsk sojasósa
1/2 tsk sesamolía
1 1/2 msk mirin, japanskt

Aðferð:
1. Mjög einfalt, hrærið öllu saman og makið yfir kjötið og látið liggja eins lengi og þið viljið/getið.
Ath. bæði miso og mirin brennur auðveldlega en kosturinn er að það bragðast bara betur aðeins brennt, á ekki líka grillmatur að brenna aðeins???

Miðjarðarhafssósa

2009-05-13T16:39:00.002+02:00

Þessa sósu er hægt að nota með hverju sem er, ég hef mest notað hana sem ídýfu fyrir crudité(hrátt grænmeti)og hef haft í veislum sem og heima fyrir, ég hef einnig notað hana jafn mikið sem grillsósu með kjöti en hana er einnig hægt að nota með pastasalati, fiski og öllu kjöti sem auka sósa, ég get lofað ykkur að hún slær alltaf í gegn! Ég var meira að segja farin að selja hana úti á Ítalíu! Ég fékk hana fyrst úr bók Isabelle Allende,Afródítu en hef breytt henni aðeins eftir mínum smekk.

Miðjarðarhafsósa
f/5
1 lítil dolla majónes
1 lítil dolla sýrður rjómi(10%), hef einnig notað gríska jógúrt ef þið búið erlendis
salt og pipar
1 tómatur, fræhreinsaður, innihaldi hent og laufin söxuð
2-3 msk saxaðar ólífur(smakkið til-fyrst með 2 msk og bætið svo meira við ef ykkur þykir þörf á)
1/2 hvítlauksrif, kramið
1 msk balsamik edik
1/2 skallottulaukur, rifinn með fínu rifjárni eða saxaður mjög fínt
1 kúfuð msk af rifsberjahlaupi

Aðferð:
1. Pískið saman majónesi og sýrðum rjóma, saltið og piprið að smekk
2. Bætið ediki, lauk og hvítlauk saman við
3. Saxið ólífur og tómata og bætið saman við
4. Bætið síðast við rifsberjahlaupinu og best væri að gera það ca. klukkutíma áður en hún er borðuð ef það er hægt annars hef ég líka sleppt því ef ég er í tímaþröng og hún er samt góð.

Matseðill fyrir vikuna 10.05-16.05

2009-05-13T16:08:00.003+02:00

Enn lætur sumarið ekkert á sér kræla og sumarstemningin á enn erfitt uppdráttar en þetta hlýtur að fara að koma. Ég er reyndar komin í smá grillfíling og langar að prófa eitthvað nýtt, sem ég og gerði í gær fyrir Eurovision grillpartýið sem ég fór í og heppnaðist bara ágætlega. Ég ætla líka að prófa nýjan kjúkling á morgun og hef því tekið úr frystinum. Á mánudaginn tók eiginmaðurinn yfir eldhúsið og bjó til dýrindis skyndibitasamlokur sem voru með majó, dijon sinnepi, aspas úr dós(sem reyndist merkilega dýr), osti og steiktri skinku(steikt saman þannig að osturinn bráðni), salati, tómötum og ef ég man rétt þá held ég að hann hafi troðið beikoni þarna inní líka, dúndur góð samloka! Í gær var ég í vinnunni allan daginn og kom þreytt heim og langaði því að gera eitthvað auðvelt og einfalt þannig að fyrir valinu varð misomarinerað lambakjöt(uppskrift fylgir) með kartöflusalati(uppskrift er þegar komin inn á síðuna) og Miðjarðarhafssósunni minni. Ég hef reyndar gert Miðjarðarhafssósuna í mörg ár og býst við að flestir sem hafa verið með mér í grillveislu hafi smakkað á henni og lumi á uppskriftinni einhvers staðar en fyrir hina þá læt ég hana einnig fylgja hér á eftir. Ég fékk þessa uppskrift úr frábærri bók eftir uppáhaldshöfundinn minn hana Isabelle Allende og heitir bókin Afródíta, ég hef reyndar breytt aðeins uppskriftinni eftir mínu höfði og eftir staðarháttum. Hver ein og einasta uppskrift sem ég hef gert upp úr þeirri bók hefur slegið í gegn, reyndar er ansi langt síðan ég gerði upp úr henni síðast en þegar ég hugsa um það þá er bara ansi langt síðan ég hef gert nokkuð eftir uppskrift, nema þá kökur, ég ætti kannski að fara að bæta einhverju í safnið.
Síðustu árin hef ég beðið spennt eftir aspastímabilinu sem er einmitt núna þessa dagana og hef alltaf kokkað mikið með aspasinn enda verið búsett erlendis en nú er tíðin önnur jeminn eini ég fór í lágvöruverslanirnar okkar hér og fékk vægt sjokk! Meira að segja dósaaspas er fokdýr! 300 kr, dósin og ég er nú ekki að fara að nota einungis eina í súpu handa okkur! Þannig að þetta árið verður lítið um eldamennsku úr aspas og græt ég það sárt enda aspas svo undursamlega góður. Ég á reyndar eftir að athuga hversu dýr ferskur aspas er en ég er ekki vongóð, varla getur hann verið ódýrari en dósaaspas.

Matseðill fyrir vikuna 10.05-16.05

Mánudagur
dýrindis samloka eiginmannsins

Þriðjudagur
grill-Misomarinerað lambaprime(á tilboði í Krónunni) með Miðjarðarhafssósu og kartöflusalati

Miðvikudagur
Afgangar af kartöflusalatinu bæti það með túnfisk til að hafa það matarmeira, þetta er það sem ég er alin upp við og finnst bara fínt að hafa bara þetta en eiginmaðurinn er ekki alveg sáttur við að hafa ekkert með... kannski maður finni þá eitthvað til að hafa með

Fimmtudagur
Kjúklingur í sósu frá Chile með hrísgrjónum, ætti að hafa linsur með en sleppi þeim þar sem eiginmaðurinn er ekki mikill aðdáandi þeirra

Föstudagur
Nú langar mig í súpu, þarf að skipta mygluðum gulrótum aftur í Bónus og kaupi þá kannski nýjar og bý til gulrótarsúpu, eða jafnvel enn betra lauksúpuna hennar mömmu(klikkar aldrei). Hefði viljað hafa þetta aspassúpu svona í tileftni tímabilsins, aldrei að vita nema maður lendi á ódýrum aspas einhvers staðar...

Laugardagur
nú er það Eurovision!!!! Býst ekki við neinum gloríum í eldhúsinu þennan daginn, látum það ráðast

Sunnudagur
pizzadagur, mig er farið að langa í Pizzu með steiktu eggaldini og parmesan eða Pizza Parmigiana

Steikt ýsa með strengjabaunum bragðbættum með chilli og engifer og kotasælusósa með ólífum og graslauk

2009-05-07T22:37:00.002+02:00

Þessi réttur sló alveg í gegn hér á heimilinu, dóttirin var engan veginn að trúa því að fiskurinn væri góður en mér tókst að vinna hana á mitt band með kotasælusósunni sem innihélt uppáhaldið hennar ólífur og graslaukinn úr garðinum(sem hún stelst í annað slagið). Strengjabaunirnar eru líka í miklu uppáhaldi á þessu heimili. Í þetta skiptið ákvað ég að nota frosnar baunir þar sem hinar eru rándýrar en að sjálfsögðu bragðmeiri, ég náði þó nokkru bragði í frosnu baunirnar með chilli og engifer og svo finnst mér þær extra góðar ef ég steiki þær mjög mikið, þannig að þær litist örlítið og salta vel með flögusalti, mmm algjört dúndur. Ýsunni er einfaldlega velt létt upp úr hveiti og steikt í örlitlu smjöri og olíu(það má sleppa smjörinu ef þið eruð að passa línurnar).

Steiktar strengjabaunir með chilli og engifer
f/4
1/4 af pokanum af frosnum baunum eða 2 litlir pakkar af ferskum
1/2 chillialdin, saxaður
1 msk engifer, saxað
1 hvítlauksrif, kramið eða saxað
olía til steikingar

Aðferð:
Hitið pönnuna vel og saxið chilli-ið og engiferið. Steikið baunirnar þar til þær mýkjast bætið þá afganginum saman við og steikið á meðalháum hita þar til þær rétt brúnast og saltið þá vel og piprið.

Kotasælusósa með ólífum og graslauk
f/4
2 dollur af kotasælu
4 msk ólífur, saxaðar
3 msk graslauk, saxaður

Aðferð:
1. Saxið ólífurnar og graslaukinn og blandið saman við kotasæluna, saltið og piprið að smekk

Gæti ekki verið einfaldara, enda tók það mig 20 mínútur að gera kvöldmatinn þetta kvöldið.

Matseðill fyrir vikuna 4.05.-10.05.

2009-05-07T22:29:00.002+02:00

Ég hef nýtt mér þessa vikuna dálítið af því sem ég átti í ísskápnum og í skápunum hjá mér en mig grunar að það eigi eftir að duga skammt, sjáum til.

Mánudagur
Fljótlegar kjötbollur

Þriðjudagur
Pizza (letidagur) heimatilbúin að sjálfsögðu

Miðvikudagur
Steikt ýsa með steiktum strengjabaunum bragðbættum með chilli og engifer borið fram með kotasælusósu með ólífum og graslauk og ofnsteiktum kartöflum

Fimmtudagur
Marbella kjúklingur

Föstudagur
afmæli, býst við að fá að borða þar

Laugardagur
matarboð

Sunnudagur
Býst við þynnku hjá eiginmanninum, kannski maður hafi bara steiktar samlokur

Fáránlega fljótlegar kjötbollur í brúnni sósu

2009-05-04T22:24:00.002+02:00

Ég var alveg sérstaklega löt í kvöld og þurfti að draga sjálfa mig inn í eldhúsið en ég varð að nota afgangana af hamborgarakjöthakkinu frá því í gær þannig að það var að duga eða drepast. Ég ákvað að gera kjötbollur úr hakkinu sem var búið að blanda með gráðosti, léttsteiktu beikoni, smá sinnepi, eggi, hveiti, salti og pipar og bjó til brúna sósu með sem tók nákvæmlega 15 mínútur að búa til frá grunni. Ég nennti ekki að bíða eftir kartöflum þannig að ég henti frönskum í ofninn og bar þetta svo fram með rabbarbarasultu, mér finnst það bara algerlega nauðsynlegt að hafa rabbarbarasultu með brúnni sósu.

Fljótlegar kjötbollur með brúnni sósu
f/4
4-500 gr kjöthakk
1/2 bakki gráðostur
1/2 pakki beikon
1 tsk sinnep
1 egg
2 msk hveiti
salt og pipar

sósa:
1/2 laukur, saxaður gróft
300 ml vatn
1 msk rjómi(má sleppa eða nota mjólk í staðinn)
1 msk kjúklingasoð(eða 1 nautakraftsteningur)
1 tsk tómatpúrra
1 grein timían(má sleppa)
1 tsk sulta(skiptir ekki máli hvernig en best er rifsberja)
1 msk balsamico edik
50 ml hvítvín eða rauðvín
smjörbolla eða maizena til að þykkja

Aðferð:
1. Hakkið og allt í það er hrært saman í skál.
2. laukurinn er saxaður
3. Smá olía er sett í pönnu og bollur myndaðar og settar á pönnuna ásamt lauknum. Þetta er steikt þar til bollurnar fá á sig fallega brúna steikarhúð. Oft er laukurinn fljótur að steikjast þá set ég hann yst á pönnuna til að hægja á steikingunni á honum. Þegar bollurnar eru fallega steiktar er edikinu og víninu hellt yfir og látið sjóða niður, þegar það hefur soðið niður um helming en ekki horfið(2-3 mín) er vatninu hellt yfir og restinni af hráefninu bætt saman við og látið sjóða í 10 mínútur.
4. Smakkið til með salti og pipar og jafnvel sojasósu ef vill og takið þá bollurnar upp úr sósunni(gangið úr skugga um að þær séu tilbúnar) og hellið sósunni í pott og þykkið annað hvort með smjörbollu eða maizena(einnig er hægt að þykkja með því að hrista saman hveiti og vatn en ég hef aldrei gert það, mamma og pabbi gerðu það alltaf hér í denn og það gekk alltaf upp þá)
5. Þegar sósan hefur náð réttri þykkt er rjómanum bætt saman við ef hann er notaður og bollunum er bætt út í sósuna og borið fram með frönskum og sultu en best væri að hafa kartöflumús ef maður hefur tíma.

Afganga Borwnies

2009-05-04T19:08:00.003+02:00

Ég fékk að ræna þessum hamborgurum frá vinum mínum henni Sigrúnu og Árna og þeir voru æðislega góðir. Þá gerði ég venjulega hamborgara nema bætti 1 pakka af gráðosti á móti 1 kg af hakki saman við ásamt einum pakka af léttsteiktu beikoni. Slóu í gegn hjá fjölskyldunni!
Ég bauð þeim svo upp á afgangabrownies köku í eftirrétt með ís sem ég fann innst í frystinum og var búin að gleyma að ég ætti. Það getur verið hentugt að nota ekki allt súkkulaði sem maður kaupir í uppskriftir, eins og ég komst að í gær. Ég var orðin nokkuð örvæntingarfull eftir súkkulaðiköku og var að fá gesti í mat og sá mér þá leik á borði og ákvað að henda í eina gómsæta. Ég fann súkkulaðiafganga hér og þar í skápunum hjá mér og endaði með smá af Konsúm súkkulaði, smá af suðusúkkulaði og smá af 70% súkkulaði(ætlaði að nota líka hvíta súkkulaðið sem ég fann en þurfti ekki á því að halda) þess vegna kalla ég þessa "afganga brownies" kökuna mína.
Uppskriftin er svohljóðandi:

Afgangabrownies
f/2 hringlaga IKEA smelluform(eiga ekki allir svoleiðis?!)
250 gr smjör
224 gr súkkulaði, ca 50 gr suðu,60 gr 70%,114 gr Konsúm súkkulaði
200 ml sykur
1,5 tsk vanilludropar, eða 1 tsk vanilla extract(sterkara en droparnir)
5 stór egg
130 ml hveiti
70 ml ósætt kakóduft
1/2 tsk salt
Hálf dolla af súkkulaði frosting frá Betty Crocker og 2 msk hnetusmjör

Aðferð:
1. Hita ofninn í 175-180°C
2. Smyrjið formin og setjið bökunarpappír í botninn(einnig hægt að nota eitt 33 sm x 22,9 sm form)
3. Bræðið smjörið og súkkulaði saman, kælið svo niður þar til volgt. Pískið sykri og vanilludropum saman við og því næst eggjunum einu í einu og pískið vel á milli þar til silkimjúkt og fallegt.
4. Sigtið þá hveiti og kakó saman við ásamt salti og pískið þar til vel blandað saman.
5. Hellið í formin/ið og bakið í 25-27 mín. Ef þið notið tvö hringlaga form er best að tékka á kökunni eftir 20 mínútur því þá er hún þunn og bakast hraðar. Prjónn sem stungið er í miðju kökunnar á að koma út með rakri mylsnu fastri á þá er hún tilbúin.
Kælið örlítið og setjið svo á aðra þeirra fyrst hnetusmjörið og svo súkkulaðikremið ofan á það og svo á hina setjið aðeins súkkulaðikremið, þannig er eitthvað fyrir alla!
Enn betra væri að hafa hnetusmjör með heilum hnetum í en ég átti það ekki til í þetta skiptið.

Matseðill fyrir vikuna 28.04-02.05.

2009-04-29T20:03:00.002+02:00

Ja hérna hér ég hef ekki enn sett inn matseðilinn fyrir vikuna, bölvað framtaksleysi er þetta í manni.
Á mánudaginn var ég með Pizzu og svo í gær hafði ég afgangana af henni og í kvöld verður afgangur af lasagna-inu sem ég gerði í síðustu viku. Ég geri alltaf svolítið ríflega af því til að geta sett afganginn í frystinn í nokkrum skömmtum, mjög þægilegt.
En á morgun verð ég að fara í búðina, ég tók nefnilega eftir því að það er lambaprime á tilboði og ég er í algjöru lambastuði núna þegar sumarið er á næsta leiti. Mér finnst einhvern veginn alltaf fylgja sumrinu að borða ógrynnin öll af lambi, kannski er það allt grillið sem maður fer í á sumrin ég býst við því. Ég væri samt alveg til í að fara að fá lambalærissneiðar, þær eru reyndar rándýrar en kannski maður splæsi á sig eitthvert kvöldið.

Þriðjudagur
afgangar af heimatilbúinni pizzu

Miðvikudagur
afgangar af lasagna

Fimmtudagur
lambaprime með grillsósu og ofnristuðum kartöflum, einfaldara gæti það ekki verið

Föstudagur
Krakkahamborgarar, s.s. venjulegir hamborgarar og krakkarnir ánægðir....

Laugardagur
Fiskur með léttsteiktu spínati, grænum baunum og kotasælu með ólífum og graslauk

Sunnudagur
Fullorðins hamborgarar, s.s það verður improviserað eitthvað þetta kvöldið!

góð ráð fyrir pizzadeig

2009-04-27T22:55:00.002+02:00

Ég ætlaði að gera pizzur í gær og henti því í deig áður en við skelltum okkur í sund og leyfði því að hefast á meðan við svömluðum. Hins vegar þegar við komum heim var okkur boðið í mat til tengdó, naut og Bernaise og ekki segir maður nei við því að sjálfsögðu. Þá setti ég pizzadeigið inn í ísskáp vafið í plastfilmu til að fá ekki leiðindaskán sem gerir manni erftitt fyrir þegar maður rúllar því út. Í kvöld kom svo lítil vinkona Heklu í heimsókn og þá alveg tilvalið að skella pizzu í ofninn. Þá var deigið tilbúið og þurfti aðeins að fletja það út og setja á hana og baka, pissbangbúið!
Pizzasósuna má finna hér á blogginu, ef þið farið í google search og setjið inn pizzasósa Sigurrós og þá farið þið beint inná uppskriftina.

Köld gráðostasósa

2009-04-26T13:03:00.002+02:00

Ég ákvað að hafa kalda gráðostasósu með svínahnökkunum í þetta skiptið, og breyta henni þannig í kalda grillsósu. Þetta heppnaðist ágætlega þó svo að þannig sósa muni aldrei líta lystilega vel út, þær verða alltaf hálf grænar og ógirnilegar en þegar þær lenda á tungunni þá er ekki aftur snúið, hreinn unaður.
Ég notaði 2 bláa gráðosta á móti einum pela af rjóma, sem sagt helmingi meira af osti en venjulega og sauð þetta saman þannig að þykknaði og þá kældi ég hana aftur niður. Ef maður kælir hana of lengi þá verður hún alveg hörð þannig að maður þarf að finna meðalveg þarna. Ég reyndar kældi hana of lengi en bara hitaði rólega upp aftur þannig að hún varð mjúk en ekki alveg heit og setti í frystinn í 10 mínútur og þá var þetta tilbúið. Ég gerði, eins og venjulega, allt of mikið af henni og frysti afganginn og þá var tilvalið að hafa hana sem ídýfu á kosningakvöldinu með gulrótarstöngum eða smá crudité eins og það heitir. Þá gerði ég aftur það sama hitaði upp og setti inn í frysti í 10 mínútur og sósan klár.

Matseðill fyrir vikuna 22.04-26.04

2009-04-22T19:32:00.002+02:00

Það er einhver lágdeyða yfir mannskapnum þessa vikuna. Er komið vor? er ekki komið vor? hvar er sólin? Þetta eru spurningar sem gera manni erfitt fyrir að komast í létta sumargírinn, en þetta er allt að koma, kemur bara hægar en oft áður ætli það helgist ekki af því að ég hef ekki verið á Íslandi síðustu 5 vor, þannig að úti var þetta leikur einn en hér þarf maður að vinna í vorfílingnum. Við vorum með pasta pomodoro á mánudaginn og í gær var dáldill vorfílingur, við hittum óvænt vini niðri í miðbæ og fórum saman að borða á nokkurs konar skyndibitastað. Þetta var hið skemmtilegasta kvöld, óvænt gleði og veðrið gott, jú það var ekki laust við smá vorglætu í sálinni eftir þetta.
Í kvöld verður svo antipasti, klára það sem til var og svo pulsur, letilíf á þessum bæ.
Ég býst nú þó við því að fara í eldhúsið á morgun og næstu daga þannig að hér kemur vikuseðillinn.

Fimmtudagur
BBQ svínahnakkar með kaldri gráðostasósu og bökuðum kartöflum

Föstudagur
Lasagna, að ósk Heklu litlu

Laugardagur-Kosningadagur
Allt of erfitt að ákveða, hvort maður verði heima eða að heiman

Sunnudagur
Þetta verður líklegast þynnka hjá eiginmanninum og fleiri býst ég við því ætla ég að hafa pizzu

Roasted kjúklingur(vantar góða þýðingu) með eggaldini og zucchini og epla-og vínberjasalati

2009-04-18T20:31:00.004+02:00

Þetta var kannski helst til of vetrarlegur réttur en passar þó ágætlega við veðrið sem hefur verið í dag og í gær, hlýjar manni ágætlega. Ég þarf að fara að koma mér í sumargírinn og hafa sumarlegri rétti. Þessi kjúklingur var bara helvíti góður ég prófaði í fyrsta skipti að kaupa bouillon eða nokkurs konar soð í pakka, eitthvað sem ég fann í Krónunni og hann lofar bara góðu. Ég hef nefnilega lengi pirrast yfir því að fá ekki að kaupa soð úti í búð en það er víst bara til í Bandaríkjunum, hér er nú bara góð hugmynd fyrir nýsköpun, ha hmm...
Ég keypti eins og ég sagði um daginn svokallaða roasting pan (á ensku) fékk mér það í afmælisgjöf, (langaði bara ekkert í föt) og hún stóð sig bara helvíti vel, mæli með henni og hún var ekkert svo dýr heldur, ég fékk hana í Bræðurnir Ormson í Smáralindinni og hún er svört og þykk. Ég hef einhvern veginn ekki mikla trú á þessum úr þunna málminum sem ég er nú bara ekki viss um hvað er, ætli það sé ekki ál en það er einnig sagt stórhættulegt og auka líkur á alzheimer að elda í álpottum. Hér kemur þó uppskriftin að kjúklingaréttinum:

Roasted kjúklingur
1 kjúklingur
1 zucchini
1 eggaldin(lítið)
4 stórar kartöflur
2 msk kjúklinga boullion
70 ml vatn
2 stönglar steinselja
5 blöð salvía
1/4 laukur, saxaður
1/2 fennel
30 gr smjör
4 hvítlauksrif
2 lúkur vínber
2 msk ólífuolía

Aðferð:
1. Skerið eggaldinið, zucchini-ið og kartöflurnar í 1 cm þykkar sneiðar.Skerið fennelinn í þunnar seniðar.
2. Setjið kjúklingasoðið ásamt vatni í botninnn á roasting pönnunni og blandið vel saman þannig að þekji botninn. Leggjið þá kjúklinginn ofan í og troðið svo salvíublöðum og smjörklípum innan undir húðina á kjúklingnum. saltið hann svo að utan og piprið með nýmöluðum pipar.
3. Raðið eggaldini, zucchini, kartöflum og fennelinu sitt á hvað í kringum kjúklinginn í röð og dreifið svo hvítlauk, vínberjum og söxuðum lauk yfir allt saman, og klippið steinseljuna yfir.
4. Síðast er svo olíunni dreypt yfir allt saman til að bleyta upp í öllu saman.
5.Setjið inn í 180°C heitan ofn og bakið í 1 klst. eða þar til hann er tilbúinn.
6.Berið einnig fram með soðinu sem safnast hefur saman í botninn á pönnunni. Ef þið viljið hafa bragðmikla sósu og hafið tíma þá er gott að taka það og sjóða niður í potti og jafnvel þykkja. Ég nennti því ekki og kom það bara ágætlega út að hafa bara soðið eins og það var.

Aths. Ef þið eigið afgang af grænmetinu og kartöflunum, ef það kemst ekki allt saman fyrir þá steikti ég zucchini-ið og forsauð kartöflurnar og steikti til að hafa með.

Berið fram með epla-og vínberjasalati

Epla-og vínberjasalat
f/4
2 epli, skræld og skorin í bita
1 lúka vínber, steinlaus og skorin í tvennt
2 msk majónes
2 msk sýrður rjómi
3 döðlur, saxaðar
1 tsk Dijon sinnep
salt og nýmalaður pipar

Aðferð:
1. Sýrður rjómi og majónes er hrært saman þar til það er kekkjalaust og sinnepi þá bætt saman við og saltað og piprað.
2. Skerið eplin, vínberin og döðlurnar og setjið í skál, blandið þá majónesblöndunni saman við. Smakkið til með salti og pipar.

Marinering fyrir svínakjöt

2009-04-17T19:35:00.003+02:00

Var að kyngja síðasta bitanum og þetta heppnaðist bara ágætlega þetta mætti kalla einhvers konar smoky grillmarinering

1 dl sojasósa
1 dl olía
1 dl gin
1 dl rauðlaukssulta, fann hana lengst inní ísskáp hjá mér, eitthvað sem ég gerði fyrir mörgum mánuðum og auðvitað þar sem þetta er sulta er hún enn í lagi
2 msk púðursykur
1 msk sýróp
1/2 msk nýmalaður pipar
1/2 tsk poultry seasoning

Allt er sett í lítinn pott og soðið hratt niður á hæsta hita í ca 5 mín. eða þar til marineringin þykknar. Raðið svínahnökkum eða kótilettum í grunnt fat og hellið yfir og látið marinerast í 1-2 klst við stofuhita eða í ísskáp í lengri tíma allt upp í sólarhring. Passið að smyrja með marineringunni á meðan þið grillið.

Beikon timían kartöflur
f/4
100 kartöflur á mann
4 beikonsneiðar
smjörklípa
2 msk ferskt timían
salt og nýmalaður pipar

Aðferð:
1. Kartöflurnar soðnar þar til þær eru tilbúnar
2. Beikonið steikt í smjörinu þar til stökknar
3. Þegar kjötið er alveg að verða tilbúið er beikonið steikt og þegar það er stökkt er það tekið af og látið dreypa af því á pappírsþurrku og smjörið og fitan í pönnunni er geymt á meðan það er enn heitt er timíanið sett í pönnuna, hitið aðeins þá eru kartöflunum bætt saman við og þetta steikt saman í nokkrar mínútur eða þar til kjötið er tilbúið. Þá er beikonið skorið í litlar bita og bætt saman við kartöflurnar.
4. Gott er að bera fram með fersku salati og góðri grillsósu

Antipasti fyrir þá sem týma

2009-04-17T18:50:00.002+02:00

Við vorum svo heppin að geta keypt okkur fullt af ostum og góðgæti á Ítalíu en fyrir þá sem týma þá er hér uppástunga á hinu fullkomna antipasti, sem hægt er að bjóða upp á í forrétt eða í rómantískan aðalrétt með elskunni og passa þá að hafa rauðvínið tilbúið.
Þegar við gerum þetta setjum við eins og 4 tegundir af ostum að þessu sinni voru það Taleggio, Gorgonzola, Sardo dolce og Pecorino Romano einnig vorum við með Prociutto cotto, sem er í rauninni venjuleg skinka skorin þynnra en okkar, Prociutto crudo, sem er þekkt undir heitinu Prociutto hér á landi og svo salami, við vorum með tvær tegundir af salami eina sem var þunnt skorin og svo eina pulsu sem við skárum sjálf. Með þessu er svo ómissandi að hafa stórar ólífur, grænar og svartar best væri að vera með Kalamati ólífurnar og svo Tuc kex og nýbakað baguette. Þetta getum við borðað endalaust og ég lofa að ef þið hafið ráð á að prófa einhvern tímann þá getið þið það líka.
Þegar þið bjóðið upp á osta þarf að athuga að láta fólk ekki byrja á þeim bragðsterkasta því eftir hann er ekki séns að finna nokkurt bragð af hinum ostunum. Þess vegna þarf maður alltaf að byrja á þeim bragðminnsta og svo koll af kolli. Þegar ég býð gestum upp á osta(sem gerist örsjaldan á þessum síðustu og verstu)þá smakka ég þá fyrst og læt svo gestina vita hver er sterkastur og hver er bragðminnstur.
Nú ef einhver af ykkur er svo heppin að vera á leið til Ítalíu þá eru ostunum skipt í dolce og ekki dolce, jafnvel stundum forte ef þeir eru mjög sterkir, dolce þýðir í raun sætur og eru þeir bragðminnstir. T.d. fyrir þá sem vilja smakka Gorgonzola en þykir gráðostur of sterkur þá eru til 100 styrkleikar á þeim osti allt frá næstum brie til svo sterks að hann án gríns brenndi á mér tunguna! Fyrir þá er best að byrja á Gorgonzola Dolce.
En í kvöld verður svínahnakki og kartöflusalat, best að byrja á marineringunni.

BBQ Kjúklingur og franskar, spaghetti Carbonara

2009-04-15T19:14:00.002+02:00

Það er víst óþarft að setja inn þessar uppskriftir þar sem ég hef nú þegar sett þær inn hér á bloggið mitt og til að finna þær er best að setja inn í Google Search BBQ sósa Sigurrós og þá fáið þið uppskriftina strax og þurfið ekkert að leita endalaust í blogginu eða reyna að muna hvenær ég setti það inn síðast eins og systir mín lenti í um daginn. Ég mun þó reyna í þessum mánuði að byrja að setja upp heimasíðu þar sem verður hægt að prenta út hverja uppskrift, eitthvað sem margir hafa beðið mig um og svo auðveldari leit og margt fleira skemmtilegt.

Matseðill fyrir vikuna 14.04-18.04

2009-04-14T18:35:00.002+02:00

Það er ítölsk stemining í heimilisfólkinu þessa vikuna, eins og gefur að skilja, það verður pasta og antipasto og kannski maður lummi inn einhverju svíni, það er víst það ódýrasta og eiginmaðurinn kaupir varla annað. Þar sem ég fæ ansi fljótt leið á hlutunum þá er stutt í það hjá mér með svínið þannig að ætli maður þurfi ekki að fara að stoppa manninn af í þessum innkaupum.

Þriðjudagur
BBQ kjúklingabitar og franskar og með því höfum við waldorfsalats afganga frá tengdó

Miðvikudagur
Spaghetti Carbonara, kannski maður laumist til að setja eitthvað nýtt í það, aldrei að vita nema eiginmaðurinn samþykki það

Fimmtudagur
Antipasti, við keyptum að sjálfsögðu alls konar osta og skinkur og ólífur á Ítalíu og það þarf víst að borða það áður en það skemmist

Föstudagur
Svínahnakkar var það heillin, marineraðir og bornir fram með timían og beikonkartöflusalati og fersku salati

Laugardagur
Roast kjúklingur eða eitthvað ódýrt úr búðinni, var að kaupa nýja roasting pan og bara verð að prófa, með rótargrænmeti og eplasalati með vínberjum

Formaggi, salumi, prociutto cotto e crudo! Che vita meravigliosa!

2009-04-11T13:52:00.008+02:00

Þá er maður komin heim úr mikilli matarferð til Ítalíu. Við vorum á stað sem heitir Fisciano og er pínulítill bær rétt hjá Salerno á suður-Ítalíu. Við vorum þar í brúðkaupi ítalskrar vinkonu minnar og borðuðum svo mikið að ég er alveg með það á hreinu að við höfum bætt á okkur nokkrum kílóum. Við fórum alltaf svo södd í rúmið og alltaf var maður að malda í móinn og reyna að borða minna en það var bara ekki tekið neitt mark á því. Við fórum í pastabúð til að kaupa pasta og spaghetti fyrir brúðkaupið, við fórum með bróður brúðgumans og hann fór svo allt í einu eitthvað að hvísla að afgreiðslustúlkunni sem kinkaði svo kolli, svo kallaði hann á okkur og sagði okkur frá því að þetta væri í rauninni lítil pastaverksmiðja sem framleiddi pasta fyrir frægustu og bestu veitingastaðina á Ítalíu, þ.á.m. staði sem hampa michelin stjörnu, ekki nóg með það sagði hann að nú fengjum við sýnistúr um verksmiðjuna með eigandanum. Ég fékk að sjá hvernig þetta er gert frá grunni í 300 ára gamalli verksmiðju í pínulitlum bæ á suður-Ítalíu, mér fannst ég vera heppnasta manneskja í öllum heiminum! Þetta var svo áhugavert að ég missti næstum vatnið. Vélin sem þeir nota er eldgömul en pínulítil í rauninni, svo sáum við hvaðan vatnið kemur og hversu mikilvægt það er í framleiðslunni, en þeir halda því fram að vatnið þarna suðurfrá sé það besta á Ítalíu og því nær sem maður fer Napólí því betra er það í pizzur, pasta og kaffi, og að það sé einmitt þess vegna sem þessir hlutir eru bestir í Napólí. Næst var okkur sýnt hvernig það er þurrkað og hvernig þeir gera einungis eina tegund í 1-3 daga og svo taka þeir til við annað form á pasta. Einu sinni í viku gera þeir svo litað pasta eins og svart með kolkrabbableki, en þeir nota ekta blek sem er geymt í kæli hjá þeim og svo ýmis önnur bragðefni, spínat og fleira. Ég set hér inn nokkrar myndir af þessu, vonandi þykir ykkur þetta eins áhugavert og mér. Við keyptum nokkra pakka og gerðum sl pomodoro í gærkvöldi og það hefur aldrei smakkast eins vel!
Við gæddum okkur einnig á heimagerðu rauðvíni og ég hef nú þegar sett inn beiðni til vinkonu minnar um uppskriftina að því, en þau gera það úr ferskum vínberjum og það var rosalega gott, svona heimilisvín að sjálfsögðu.
Brúðkaupið var svo kapítuli útaf fyrir sig, þvílíkt og annað eins hef ég aldrei séð eða heyrt af! Þegar við komum úr kirkjunni þá keyrðum við í klukkutíma að hótelinu þar sem veislan fór fram og var okkur beint inn í einn sal og þar beið okkar forréttarhlaðborð, reyndar héldum við að þetta væri aðalmaturinn þar sem það var svo glæsilegt og mikið af réttum á því en þ.á.m. voru ostrur, kræklingur, túnfiskur, reyktur lax, alls konar fritto misto sem er djúpsteikt grænmeti eða fiskmeti svo voru þarna frittatas, mozzarella og pomodoro, snittur og margt margt fleira. Ítalirnir ruddust að borðinu og því miður fékk ég aðeins að smakka á helmingnum af góðgætinu því þeir kláruðu allt saman á 3-5 mínútum, ótrúlegt! En við þurftum nú ekki að örvænta því næst beið okkar sitjandi hádegisverður í ca.6 klukkutíma eða 6 réttir svo eftir það var boðið uppá 2 tegundir af tertu, brúðkaups-og skýrnarterta og svo eftir það var súkkulaðigosbrunnur með litlum smjördeigshjartalaga tertum og eftir það súkkulaði og koníak eða limoncello og vindlar til að toppa þetta allt saman. Vínið var ekki sparað allan tíman en það einhvern veginn þannig með Ítalina að þeir verða ekki drukknir þó svo að þeir séu að drekka í 6 klukkutíma. Það var náttúrulega borðað ótæpilega á þeim tíma sem auðvita skiptir máli. Ef þið einhvern tímann fáið tækifæri til að fara í Ítalskt brúðkaup mæli ég eindregið með því.
Hér læt ég fylgja með nokkrar myndir. Á myndunum má sjá pastavélina, þar sem pastað kemur út og er sett á viðargrindur, Viðargrindunum er svo staflað upp í litlu herbergi með gríðarstórri viftu þar sem það er þurrkað í ca.3 daga það fer þó eftir raka utandyra þar sem pínulítill gluggi er á þurrkherberginu og þetta fer allt saman eftir því hvort verkstjóranum þyki pastað vera tilbúið eða ekki. Þarna er einnig hægt að sjá tilbúið pasta í heljarinnar stórum pokum sem eru fluttir út á land á hina ýmsa veitingastaði og sérverslanir.

Sníkja, sníkja, sníkja

2009-03-31T16:12:00.002+02:00

Ég ætla mér að vera sníkjudýr á morgun og sníkja mat hjá tengdó eða foreldrum mínum fer eftir hvor býður betur(eða kannski hvor býður) en í kvöld verða pulsur. Þið eruð ef til vill að velta því fyrir ykkur hvers vegna ég læt svona illa í eldhúsinu en ástæðan er að við erum að fara til lands matarástríðunnar, eða Ítalíu á fimmtudaginn og þar förum við í ekta suður-Ítalskt, mjög kaþólskt brúðkaup innilegrar vinkonu minnar en það vill svo til að hún er snilldar Michelin matreiðslumaður. Hún hefur unnið á einum frægasta veitingastað Ítalíu en hann státar hvorki meira né minna en 3 stjörnum(ekki hægt að fá meira) og hefur haldið þeim lengi, hann er staðsettur í hlíðunum fyrir ofan Napólí, hún sýndi mér hann einhvern tímann á netinu en ég bara man því miður ekki hvað hann heitir. Ég mun spyrja hana og setja inn slóðina hér síðar. Ég hlakka alveg rosalega til að fara til hennar og gæða mér á matnum hennar og það sem verður boðið upp á í brúðkaupinu. Ég er búin að geyma eins og 3-4 kíló til góða fyrir þessa ferð og mun því ekki hafa neitt samviskubit yfir þeim þegar ég kem heim, því ég veit að þau verða komin. Síðast þegar við vorum hjá henni þá var svoleiðis troðið ofan í okkur góðgætinu að við máttum hafa okkur öll við og greyið hann Sverrir minn fékk alltaf auka skamt án þess að biðja um hann og tja fyrir þá sem ekki þekkja manninn minn þá er hann mjög matgrannur og borðum við oftast jafnmikið þannig að hann þurfti að pína ofan í sig gúmmulaðið með tárin í augunum horfandi á mig með ,,þarf ég að borða meira?" spurninguna í augunum og ég með böðulsaugnaráði horfði til baka, vildi ekki móðga þessa góðu konu, skipandi honum að troða þessu ofan í sig.
Buxurnar okkar virtust hafa hlaupið eitthvað í þvottinum þarna hjá henni, skildi ekkert í því sérstaklega þar sem ég setti þær alls ekkert í þvott, en hvað um það.
Ég ætla að reyna að taka eitthvað upp á vídeó eins og ég gerði þegar ég fór upp að Gardavatni og tók upp þegar gamla konan var að elda Spiedini og setja hér inn á síðuna, vonandi næ ég einhverju skemmtilegu og áhugaverðu fyrir mataráhugafólk. Ég ætla líka að reyna að ná einhverjum uppskriftum upp úr vinkonu minni. Það getur verið flókið mál að fá góðar og gamlar uppskriftir upp úr þeim en mér hefur tekist að ná nokkrum en þarf og vil fleiri.
Þannig að ég mun hvíla þessa síðu þar til á föstudaginn í næstu viku og vonandi kíkið þið inn hjá mér þá.
Góðar stundi á meðan og Gleðilega páska!

Ennþá ,,skyndibita"vika

2009-03-30T20:22:00.002+02:00

Þetta hefur gengið vonum framar að finna eitthvað í skápunum hjá mér, nema á laugardaginn eldaði maðurinn minn fyrir mig og þá var spreðað 3000 kall í kvöldmatinn. Það voru lambafille með ekta Bernaise sósu, bökuðum kartöflum, léttsteiktum sykurbaunum og smjörsteiktum gulrótum. Hann stóð sig alveg rosalega vel. Ég held reyndar að við munum grilla lambafille-ið næst, íbúðin lyktar enn eins og lambafita. Í gærkvöldi var okkur svo boðið í mat, mjög hentugt, og í kvöld verða samlokur og ég býst við að það verði eitthvað mjög beisik en aldrei að vita hvort maður finni eitthvað innst í ísskápnum sem gæti verið lostæti á ósköp venjulega samloku.

Kótelettur Milanese

2009-03-27T18:54:00.003+01:00

Ég stóðs það! Búin heil vika og ég hef einungis eldað úr því sem til var í skápunum og heldur það áfram í kvöld.
Í gærkvöldi hafði Sverrir tekið út úr frystinum svínahnakka en við áttum ekki kartöflur þannig að ekki kom til greina að búa til BBQ eins og vanalega þannig að þá var bara að taka það sem til var í skápnum og endaði ég með Svínahnakka Milanese og risotto Milanese.
Kótelettur Milanese þýðir í rauninni bara að það er sett í brauðrasp, ekki Paxo, það er einkennilegasti raspur sem ég hef séð, ég nota Panko sem er kannski meira fyrir djúpsteiktar rækjur en það var það sem var til. Það er líka hægt að rista brauð og hakka í múlínex, þá er kominn hinn fínasti raspur.
Svínahnökkunum eða kótilettunum er svo velt upp úr eggi sem hefur verið pískað með smá vatni og svo í raspinn og steikt upp úr örlítilli smjörklípu og olíu(eða sleppa smjörinu, kannski hollara). Ég kryddaði aðeins raspinn með fersku timíani(best að nota það áður en það eyðileggst), salti, nýmöluðum pipar og poultry seasoning. Svín og kjúklingur eiga það sameiginlegt að passa mjög vel við Salvíu og tja flest krydd sem passa með kjúkling passa með svíni(ljóst kjöt).
Risotto Milanese er risotto kryddað með saffrani. Þá er gert venjulegt risotto og svo er klípu af saffrani bætt saman við í endann.
Ég setti 1 kubb af kjúklingakrafti og 1/2 af grænmetiskrafti í 1 ltr af vatni og fannst mér það koma miklu betur út en bara kjúklingakrafturinn, gæðin í þessu eru ekkert til að hrópa húrra fyrir en þetta er það ódýrasta og því er það keypt, ótækt að vera alltaf að henda í kjúklingasoð!
Ég bragðbætti einnig með afganginum af Stroganoff sósunni og það gerði sko gæfumuninn!
Lostæti!
Í kvöld verður það svo steikt eggjahrísgrjón með svínakjöti. Þá tek ég afganginn af risottoinu hendi því á pönnu, sker kjötið í bita og hendi saman við og svo eins og einu, tveimur eggjum og steiki, ekki slæmir afgangar það!

Skyndibitavika

2009-03-25T18:24:00.002+01:00

Þessi vika verður mjög sérstök, því peningurinn er að verða uppurinn svo að við gátum aðeins keypt nauðsynjar í búðinni og þá var lítið eftir fyrir kvöldmat. Í gær vorum við því með spaghetti pomodoro sem ég hef sett uppskriftina að hér á síðuna. Ég reyndar bragðbætti með soðsósunni af Stroganoffinu og varð sósan algjört æði!!!
Ég held ég verði að taka þessa viku dag fyrir dag og sjá hvað er til í skápunum hjá mér, en ég fer ekki út í búð sama hvað á gengur, það er á hreinu!
Hausinn er núna búinn að liggja í bleyti alllengi og ég á sem sagt kartöflur,brauð, fullt af eggjum og eitthvað fleira. Ég stakk upp á kartöflusalati með túnfisk en eiginmanninum langaði ekki í það, þá kom hann með eggjaköku en okkur stelpunum langaði ekki í það, en við gátum öll sæst á samlokur með skinku, osti, gráðosti, sinnepi(dijon) jafnvel steiktar upp úr smjöri og steiktar kartöflur með saffran og steinselju.
Samlokurnar útskýra sig sjálfar en kartöflurnar eru svona:

Steiktar kartöflur með saffran og steinselju
f/4
400 gr kartöflur, soðnar
saffran á hnífsoddi
1 msk steinselja, söxuð
Smjörklípa

Aðferð:
1. Kartöflurnar eru soðnar
2. Saffran er sett með smjörinu á pönnu ásamt steinseljunni og síðan kartöflurnar og þetta steikt þar til kartöflurnar verða fallega fullinbrúnar.

Nokkurs konar Stroganoff

2009-03-21T12:07:00.002+01:00

Ég var búin að setja hér inn heillanga lýsingu á Stroganoffi sem svo datt öll út þar sem tölvan varð batteríslaus, en þá er ekkert annað að gera en að setja þetta aftur inn.
Ég var búin að ákveða að fara eftir uppsrift að þessum fræga rétti en svo kom í ljós að ég átti ansi lítið til af hráefninu í skápnum, þannig að úr varð nokkurs konar stroganoff.
Strangt tiltekið er stroganoff búið til úr kjötstrimlum/teningum, sveppum, sýrðum rjóma, tómötum og niðursoðnu kjötsoði, en ég átti ansi lítið til af þessu og þurfti ég að nota það sem var til þannig að mín útgáfa varð eftirfarandi:

Nokkurs konar Stroganoff
f/4
2 bakkar svínagúllas eða nautagúllas
3 gulrætur, skornar í bita
3 sellerístönglar, skornir í jafnstóra bita
1 laukur, sneiddur
3 skallottulaukar, sneiddir
10 timíangreinar
steinseljustilkar ef þeir eru til
3 tómatar skornir í báta
2 tsk tómatpúrra
2 kjötkraftsteningar
2 msk balsamic edik
150 ml hvítvín, rauðvín væri betra en ég átti það ekki til
vatn
2 tsk dijon sinnep
Smjörklípur
Hveiti til að velta uppúr
salt og pipar

Aðferð:
1. Skerið græmetið fyrir utan tómatana og steikið þar til brúnast.
2. Hellið hveiti í poka ásamt salti og pipar(paprikudufti ef vill) og hristið allt til og frá og hyljið kjötið alveg, takið það svo upp úr og hristið aukahveiti af. Steikið þar til brúnast.
3. Setjið svo allt í djúpan pott saman og hellið ediki og víni yfir og sjóðið aðeins niður. Hellið þá vatni yfir þannig að hylji kjötið og bætið restinni af hráefninu saman við og sjóðið í ca klukkutíma. Þegar þið hafið soðið þetta í klukkutíma þarf að taka einn bita og athuga hvort hann sé meyr, ef hann er það má sigta soðið frá og sjóða niður á meðan kartöflur eru soðnar og búin er til kartöflumús. Ef kjötið er ekki tilbúið þarf að sjóða enn lengur.
4. Þegar músin er tilbúin ætti sósan að vera búin að þykkjast örlítið og vera orðin bragðmikil og góð, þá er kjötinu bætt útí sósuna(eða öfugt) og kjötið hitað upp aftur í nokkrar mínútur.

Ath. það er mjög mikilvægt þegar keypt er svína-eða nautagúllas tilbúið í bökkum þarf að hafa í huga að þetta er skorið af seigum vöðva dýrsins og þarf að elda það hægt og í langan tíma, annars verður það alltaf seigt.

Salade Nicoise

2009-03-18T20:18:00.002+01:00

Eiginmaðurinn var eitthvað pirraður yfir að þurfa að fara í búðina og vita ekkert hvað Salade Nicoise er, en hér kemur uppskriftin og hann var hæstánægður með útkomuna í kvöld.
Þetta er klassískt salat sem hefur farið sigurför um heiminn, það er þó nokkuð misjafnt hvernig það er gert og hvað er nákvæmlega í því en samkvæmt hefðinni á það að vera aðeins öðruvísi en ég hafði það í kvöld, en aðaluppistaðan eru tómatar, ansjósur eða túnfiskur, grænar baunir(strengja,sykur eða þvíumlíkar), laukur, harðsoðin egg, svartar ólífur og ólífuolía. Samkvæmt reglunum má ekki setja eldað grænmeti eða kartöflur í þetta salat en eru reglur ekki til að brjóta þær?
Þetta er franskt salat nánar tiltekið frá Nice. Við stoppuðum einmitt í Nice síðasta sumar og mikið óskaplega er þetta falleg borg! Við kolféllum fyrir henni og hlakka ég mikið til að komast þangað aftur.
Salatið er létt og ferskt eins og Miðjarðarhafsbúum er einum lagið.

Salade Niciose
f/4
8 kartöflur, soðnar og skornar í fernt
6 harðsoðin egg, skorin í fernt
4 tómatar, vel þroskaðir og skornir í 6 báta
200 ml svartar steinlausar ólífur, ef þið eigið Kalamata væri það náttúrulega best
50 ml söxuð steinselja
300 ml túnfiskur í dós, í olíu, olíunni hellt af
4 ansjósur, má sleppa(sem ég gerði)
1/2 skallottulaukur eða 1/4 rauðlaukur, sneiddur mjög fínt
ef þið viljið er mjög gott að hafa léttsoðnar strengja-eða sykurbaunir en ég var búin með budgetið þessa vikuna þannig að það fékk ekki að rata í innkaupakörfuna

Dressing
1 1/2 tsk dijonsinnep
2 msk rauðvínsedik
4 msk olífuolía
1/2 tsk sykur
smá salt
vel af nýmöluðum pipar

Aðferð:
1. Sjóðið kartöflurnar og eggin
2. Á meðan blandið þið saman í skál tómötunum, ólífum,lauk og steinselju
3. Þegar kartöflurnar eru tilbúnar eru þær kældar þar til þær eru volgar, þá eru þær skrældar og skornar og settar á fat, tómata og ólífublöndunni er hellt jafnt yfir þær og eggjunum raðað í kringum salatið. Næstsíðast er túnfisknum dreift yfir og hann hafður í grófum bitum, síðast er dressingunni hellt jafnt yfir allt saman, e vuola'!

Dressing
Aðferð:
1. Sinnepi, ediki, salti og sykri er blandað saman og svo er olíunni hellt varlega saman við þar til hún þykknar örlítið.

Gott er að bera salatið fram með bökuðu baguette brauði. Einnig er mjög gott að hafa þetta ofan á baguette brauði og láta það liggja aðeins á brauðinu þannig að það sameinist í eitt(eða þannig)

Matseðill fyrir vikuna 16.03-20.03.

2009-03-16T20:25:00.003+01:00

Þá er mars hálfnaður og það styttist óðum í utanlandsferð til matarlandsins mikla og ég get ekki beðið eftir því að sitja í leti með fullan munninn af unaðslegum osti!
Ég er þó enn hér á fróni með hugan í bleyti yfir matseðli vikunnar. Kvöldið verður lítilfjörlegt þar sem Hekla fékk grjónagraut og lifrarpylsu hjá ömmu sinni og situr nú sæl og södd og leikur sér og eiginmaðurinn er í fótbolta, þá er það bara samloka handa mér, engar gloríur þar. Vikan er þó framundan og ekki er hægt að bjóða heimilisfólkinu upp á samlokur endalaust, við þurfum næringu. Ég var að blaða í gegnum uppáhaldsuppskriftabókina mína þessa dagana og er núna með svo yfirfullan heilan af hugmyndum að það er frekar erfitt að beisla þetta og komast að niðurstöðu með einn rétt í einu, mig langar í allt! Græðgin er alveg að taka yfirhöndina en ég mun berjast og sigra á endanum að vanda. Ég er eiginlega alveg viss um að gúllaskjöt sé mjög ódýrt og tel það ágætan kost að búa til stroganoff úr því, en athugið að sjóða vel kjötið og ekki bjóða upp á hann án þess að hafa smakkað einn bitann og ef hann er ekki seigur er rétturinn tilbúinn. Það hefur viðgengst hér á Íslandi allt of lengi að fólk er að flýta sér of mikið og lætur kjötið ekki sjóða nægilega lengi og þá er allt saman svo ólseigt að varla er hægt að borða það, ekki er það mjög spennandi fyrir litlar, nýjar tennur. Matarmikil salöt koma sterk inn þessa vikuna og ætla ég að prófa eitthvað nýtt á þeim vettvangi, svo er spurning um fiskrétt.
Best að ljúka þessu með matseðlinum sjálfum.

Þriðjudagur
Ballettsýning hjá Heklu, þannig að það verður lítið um eldamennsku

Miðvikudagur
Salade Nicoise

Fimmtudagur
Svínahnakkar með frönsku kartöflusalati með beikoni

Föstudagur
Nautakjöts eða svínakjötsstroganoff(fer eftir hvort ég finn í búðinni og hvort er ódýrara)

Pulsur og svínalundir með gráðostasósu

2009-03-13T21:05:00.002+01:00

Það var svo mikið stress á mér í vinnunni síðustu daga að ég gat bara ekki hreyft mig þegar heim var komið svo að í gær voru pulsur og svo í kvöld verðum við með svínalundir með gráðostasósu og franskar kartöflur, klassi. Sverrir hefur séð um eldamennskuna síðustu tvo daga og stendur sig með prýði að vanda. Hann reyndar sauð kartöflurnar fyrst og steikti svo upp úr mikilli olíu og smá smjöri, við týmdum ekki að kaupa franskar kartöflur, þær voru eitthvað svo dýrar allt í einu, svo erum við í massívum sparnaðaraðgerðum og þá er bara að nýta það sem er til í skápunum.
En nú ætla ég að fara og gæða mér á góðgætinu....

Linsubaunaborgarar með tzaziki sósu

2009-03-12T16:29:00.002+01:00

Ég verð nú að segja að uppskriftina að þessu er frekar erfitt að finna út, þar sem ég notaði afgangana frá hinu nokkurs konar ratatuille sem ég gerði um daginn, þannig að kryddið í borgarana kom þaðan. En þeir voru bara helvíti góðir, það hefði kannski mátt krydda þá aðeins betur eða meira, en tzaziki sósan smellpassaði með, mæli sérstaklega með henni. Þetta tók líka enga stund að búa til, ætli ég hafi ekki verið um það bil 30 mínútur að búa allt saman til, en það þarf að taka til greina að linsubaunirnar voru þegar soðnar, venjulega tekur um 30 mínútur að sjóða þær.
Þar sem þetta var mjög svo óljós uppskrift þá ætla ég að slumpa á magnið í borgurunum í þetta skiptið þannig að ekki skammast ef borgararnir eru ekki alveg eins og þið hefðuð ímyndað ykkur, ja eða smakkað áður. Ég hef nefnilega aldrei smakkað linsubaunabuff eða neitt í líkingu við þetta áður og hafði því ekki hugmynd um hvernig þetta átti allt saman að líta út en maður bara klórar sig fram úr hlutunum eins og venjulega.

Linsubaunaborgarar
f/4
ca 200 gr soðnar grænarlinsur(ath þær eru léttari fyrir suðu)
2 kartöflur, soðnar
salt og pipar
krydd eftir smekk
1 egg
3 msk raspur, ég notaði japanska raspið sem maður notar í djúpsteiktar rækjur
meiri raspur til að velta upp úr og eitt egg til að velta upp úr
hveiti til að velta upp úr
Franskar kartöflur
4 hamborgarabrauð
2 tómatar, sneiddir
Icebergsalatblöð
gúrkusneiðar ef vill
Ostsneiðar ef vill
tzaziki sósa-sjá uppskrift neðar

Aðferð:
1. Sjóðið kartöflurnar og linsubaunirnar. Þegar þær eru tilbúnar er þetta stappað saman ásamt kryddi, eggi og raspi.
2. Mótið borgara með höndunum og leggjið á disk og búið til sósuna, setjið frönsku kartöflurnar í ofninn og skerið tómata og salat til að setja á borgarana.
3. Þegar allt er tilbúið og kartöflurnar malla í ofninum er eggið léttþeytt í eina grunna skál, hveiti sett í aðra og raspur í þá þriðju. Hitið stóra pönnu með olíu.
4. Þá er einum borgara í einu velt fyrst upp úr hveiti þá upp úr egginu og síðast raspinu og borgarinn settur á pönnuna, þetta er gert við alla og steiktir við meðal hita á hvorri hlið og osturinn settur á seinni hliðina. Þegar fallega gullinbrún húð hefur myndast á hvorri hlið eru borgararnir settir inn í ofn á meðan hamborgarabrauðin eru hituð og kartöflurnar klárast.
Þegar brauðin eru orðin heit ætti allt að vera tilbúið fyrir alla að setja á sinn hamborgara.

Tzaziki sósa
gerir u.þ.b. 300 ml af sósu

150 ml sýrður rjómi
150 ml majónes
salt og pipar
ca 10 sm biti af gúrku, rifinn með rifjárni
1/4 hvítlauksrif, kramið eða rifið með rifjárni

Aðferð:
1. Hrærið vel saman sýrðum rjóma, majónesi, salti og pipar þar til allir kekkir hafa horfið.
2. Bætið hinu saman við og smakkið til.

Einnig er gott að nota sósuna sem ídýfu með hvers kyns snakki og þá sérstaklega mæli ég með Bugles.

Bjórbrasseraður kjúklingur

2009-03-10T19:28:00.002+01:00

Mamma hefur notað bjór ansi mikið síðustu misseri í að grilla kjúkling, hún á til þess gerðar græjur en ég á það hins vegar ekki og ákvað ég því að gera mína útgáfu af þessu. Ég nota leirpottinn minn en ef ég ætti svokallaða(á ensku)roasting pan þá myndi ég frekar vilja nota hana, en maður bara notar það sem maður á.

Bjórbrasseraður kjúklingur með maple-sinnepsgljáa
f/4
1 kjúklingur
3 litlar gulrætur, skornar í bita
2 sellerístönglar, skrældir og skornir í bita
1/2 laukur, sneiddur
1 lítill skallottulaukur, sneiddur
1 tómatur, skorinn í bita
4 -5 kartöflur, skornar í stóra bita
200 ml bjór, tegundin skiptir ekki miklu máli en því meiri bitter bjór því meira bitter verður sósan, ég notaði í þetta skipti Tuborg þar sem það var til í ísskápnum
1 grein rósmarín, bara nálarnar
smá klípa Poultry seasoning
salt og pipar
1 teningur kjúklingakraftur+

Gljái
1 msk Dijon sinnep
1 msk maple sýróp

Aðferð:
1. Skerið grænmetið ásamt kartöflunum og steikið í pottinum sem þið ætlið að nota fyrir kjúklinginn í ofninn. Látið það fá smá lit.
2. Troðið smjöri innundir húð kjúklingsins
3. Færið grænmetið til hliðanna í pottinum og steikið kjúklinginn létt á hvorri hlið og látið svo liggja með bringuna upp. Hellið þá bjórnum yfir og látið sjóða niður í 4 mínútur. Hellið þá 100 ml af vatni yfir ásamt kryddi. Berið helming gljáans yfir kjúklinginn og setjið inn í ofn við 200°C í ca klukkutíma. Takið kjúklinginginn út úr ofninum ca 10 mínútum fyrir áætlaðan eldunartíma og berið afganginn af gljáanum á kjúklinginn og takið lokið af og hafið loklaust afganginn af tímanum.

Matseðill fyrir vikuna 09.03-13.03

2009-03-09T18:47:00.004+01:00

Þessa vikuna verður sparað allverulega, því í næsta mánuði er stefnan tekin á Salerno í brúðkaup og svo þar á eftir til Rómar, þannig að það þarf að eiga smá gjaldeyri.
Ég verð því með risotto í kvöld og svo hafragraut það sem eftir er vikunnar, ójá hafragraut í fullt af nýjum útgáfum, með rúsínum, með kanilsykri, með kakó og já bara alls konar. Nei það er ekki alveg hægt. En réttirnir verða einfaldir og góðir að vanda. Ég verð að draga allt úr frystinum sem ég get og nýta, nýta, nýta út í hið óendanlega.
Ég er að spá í linsubaunabuffi úr afgöngunum frá síðustu viku, þó ég viti að eiginmaðurinn verði ekki ánægður með það hann er ekki mikill aðdáandi linsubauna, því miður.
Ég tók út kjúkling áðan þannig að það verður kjúklingur á morgun en ætli sé ekki best að ég setji hér inn matseðilinn.

Mánudagur
Risotto bianco með ofnbökuðu baguette brauði

Þriðjudagur
Brasseraður kjúklingur
Ég á svo mikið af grænmetisafgöngum og þetta er besta leiðin til að nýta þá

Miðvikudagur
Linsubauna hamborgarar með tzaziki, beikoni og grænmeti

Fimmtudagur
Fiskur dagsins, er að spá í einhvers konar ofnrétt

Föstudagur
Svínalundir

Amerískar pönnukökur með unaðslegri eggjahræru og beikoni

2009-03-08T18:55:00.002+01:00

Ég vaknaði í morgun með óstjórnlega mikla löngun í amerískar pönnukökur og einfaldlega varð að láta verða af því. Ég gerði líka eggjahræru með sem heppnaðist svo vel að ég ætla að skrifa hér niður uppskriftina, líka svo ég muni hana næst þegar ég geri þetta. Ég fjárfesti í gær í maple sýrópi sem er gjörsamlega ómótstæðilegt, það heitir Spring Tree pure maple syrup, það kostar sitt og passar kannski ekki alveg við tilgang þessarar síðu, þ.e. að vera með ódýra og góða rétti en ég bara varð að fá þetta, það er unaðslegt!
Pönnukökuuppskrift frá Vox mun fylgja aukablaði Fréttablaðsins næsta laugardag og mæli ég með henni en hér er uppskriftin af eggjahrærunni.

Unaðsleg eggjahræra
f/2
4 egg
50 ml mjólk(ég notaði léttmjólk)
1 tsk sojasósa
1 tsk óregano
1/2 tsk poultry seasoning
5 ostsneiðar
salt og pipar
smá smjörklípa til að steikja upp úr

Aðferð:
1. Hrærið öllu vel saman og steikið við meðalhita í smá smjöri og enn minni olíu, hrærið vel í en varlega þar til eggin eru örlítið þurr á að líta og ekki slepjuleg.

Berið fram með stökksteiktu beikoni(sem ég grilla alltaf í ofninum) og amerískum pönnukökum smurðum með smjöri og hellið nóg af sýrópi yfir. Mmmm.... mig langar í svona aftur í kvöld!

Spaghetti með kjötbollum

2009-03-07T16:27:00.002+01:00

Ég var frekar súr í gærkvöldi þannig að eiginmaðurinn var svo indæll að taka að sér eldamennskuna. Við vorum búin að taka út kjöthakkið fyrir réttinn svo að það var ekki hægt að snúa frá settum plönum, þó hann hefði feginn viljað panta eldsmiðjupizzu sérstaklega þar sem við vorum ekki komin heim fyrr en um klukkan 19:00 um kvöldið. En hann tók sig saman og eldaði beint upp úr Silfurskeiðinni dýrindis spaghetti með kjötbollum(reyndar í bókinni er það Rigatoni með kjötbollum). Ég var svo stolt af honum og bókinni að sjálfsögðu!
En þar sem uppskriftin er úr bók, væri ekki gott af mér að setja hana hér inn, þannig að endilega kaupið bókina og eldið upp úr henni, ég mæli eindregið með henni!

Steikt ýsa með nokkurs konar Ratatuille og linsubaunum

2009-03-07T16:09:00.003+01:00

Við áttum afganga af zucchini og eggaldini og urðum að nýta það þar sem það er hluti af dýra grænmetinu og kemst ekki oft inná innkaupalistann af þeim sökum, en er svo rosalega gott steikt, grillað eða marinerað. Þannig að mér datt í hug að nota þetta í einhvers konar ratatuille og þetta passaði alveg rosalega vel við fiskinn. Ég steikti hann á einfaldan hátt eins og ég gerði um daginn og var þetta dýrindis máltíð.

Steikt ýsa með ratatuille og linsubaunum
F/4
1 kg ýsa
smá hveiti
2 msk ólífur, saxaðar gróft
1 msk capers
150 ml hvítvín

Ratatuille
1/2 eggaldin, skorið í teninga
1/2 zucchini, skorið í teninga
2 gulrætur, skorið í teninga og forsoðið
1/2 laukur, saxaður gróft
1 dós af niðursoðnum tómötum, saxaðir eða heilir og svo saxaðir
1 tsk tómatpúrra
1 hvítlauksrif, kramið
salt og pipar eftir smekk

Aðferð:
1. Skerið grænmetið og hitið olíu á pönnu(helst extra virgin). Fosjóðið gulræturnar þar til þær eru næstum meyrar.
2. Steikið allt grænmetið saman á pönnunni þar til það er meyrt og hellið þá tómötunum ásamt vökvanum yfir og bætið tómatpúrrunni saman við. Saltið og piprið.
3. Roðflettið ýsuna og veltið upp úr hveiti og dustið allt aukahveiti af. Hitið olíu og smjörklípu(má sleppa) á pönnu og steikið við meðalháan hita þegar gullinbrún húð hefur myndast er fisknum snúið við og ólífunum og capers bætt saman við. Þegar gullinbrún húð hefur einnig myndast á seinni hliðina á fisknum er hvítvíninu hellt yfir og látið sjóða vel niður.
4. Ég hafði linsubaunir einnig með þessu og blandaði þeim saman við ratatuille eftir að hafa sett klassískt vinaigrette á það og það passaði svakalega vel og þannig gat ég drýgt matinn út í hið óendanlega. Þannig hefði ég getað sett kannski smá kjötbita, kjúkling eða bara mótað bollur og steikt fyrir afganga daginn eftir.

Berið fram með ratatuille og heitu brauði.

Matseðill fyrir vikuna 02.-6.mars

2009-03-03T17:57:00.002+01:00

Maður verður víst að borða. Ég hef svona að mestu leyti losnað við flökurleikann en þarf þó að borða annað hvort léttan eða hollan mat þannig að matseðlarnir munu bera smá keim af því. Ég er þó búin að hanga á uppskriftasíðum síðustu daga og er mikið að fletta í gegnum uppskriftabækur, þannig að ég finn að ég þarf að fara að gera eitthvað skemmtilegt í sköpuninni, mig langar að gera eitthvað nýtt, eitthvað sem ég hef ekki gert áður. Það virðist þó þurfa að bíða þar til í næstu viku þar sem peningarnir eru næstum uppurir fyrir þessa vikuna. Þessi vika verður frekar beisik í matargerð, mér svona sýnist að flestar uppskriftirnar hafi ég þegar sett inn á síðuna nema kannski fiskirétturinn. Eiginmaðurinn minn var að gera grænmetislasagna á fimmtudaginn var og keypti í það zucchini og eggaldin þannig að til að það eyðileggist ekki í ísskápnum er um að gera og nýta það í fiskiréttinn, hvernig á eftir að koma í ljós hins vegar. Við vorum ansi heppin þessa vikuna því okkur er boðið í mat í kvöld, alltaf skemmtilegt.

Mánudagur
Afgangar af grænmetislasagna voru teknir úr frystinum og borðaðir með bestu lyst borið fram með salati og brauði

Þriðjudagur
Matarboð

Miðvikudagur
Fiskréttur með zucchini og eggaldin

Fimmtudagur
Ítalskar kjötbollur með spaghetti

Föstudagur
Býst við að það verði afgangar af spaghetti-inu

Laugardagur og sunnudagur
tja maður kannski lummar sér til mömmu og pabba já eða tengdó og sníkir kvöldmat hjá þeim, það er aldrei að vita með helgarnar, svo skemmtilegar alltaf.

Bolla Bolla Bolla

2009-02-23T17:45:00.005+01:00

Ég er búin að borða svo mikið af bollum í dag að ég þarf verulega á góðu skokki að halda!
Ég bakaði þær í gær til þess að dóttirin gæti tekið með sér í skólan og eiginmaðurinn í vinnuna og ég fann uppskrift í uppskriftabók hjá tengdó og þær heppnuðust alveg prýðilega. Það hafa borist til mín kvartanir um að þær falli alltaf eða komi út með gati undir, ég verð bara að segja að þá getur ekki verið að það sé farið eftir uppskriftinni frá A til Ö því þetta hefur bara aldrei gerst hjá mér, kannski er þessi uppskrift svona góð, aldrei að vita.

Vatnsdeigsbollur
ca 20 bollur í minni kantinum
250 ml hveiti
100 gr smjör
300 ml vatn
2 egg
lyftiduft á hnífsoddi
salt á hnífsoddi

Aðferð:
Hitið ofninn í 220°C
1. Bræðið smjörið og vatnið saman í þykkbotna potti
2. Takið af hitanum þegar það er bráðið og pískið hveitinu, saltinu og lyftiduftinu saman við þar til deigið glansar.
3. Setjið aftur á helluna yfir lágan hita og hrærið saman þar til deigið sleppir potti.
4. Takið af hitanum og hrærið eggin saman við eitt í einu og hrærið þannig að blandist vel eftir hvort egg. Setjið bökunarpappír á ofngrind og mótið bollur með tveimur matskeiðum og best er að hafa þær frekar litlar,jafnstórar og þannig að þær séu mótaðar meira upp heldur en flatar.
5. Bakið í ofninum við 220°C í 10 mín lækkið þá hitann í 180°C og bakið áfram í 10 mínútur og passið að opna alls ekki ofninn fyrr en eftir 20 mín, því annars falla þær. Þær eiga að vera gullinbrúnar að lit. Best er að skera þær rétt eftir að þær eru teknar úr ofninum.

Glassúr:
ég verð að segja að ég er frekar dýr í rekstri hér, en ég má það stundum
50 gr 70% súkkulaði eða konsúmsúkkulaði með appelsínubragði
2 tsk smjör

Brætt saman og sett ofan á bollurnar með skeið.

Svo set ég bara rifsberjasultu(ja eða þá sultu sem ég á í ísskápnum) og þeyttan rjóma á milli.

Grísahnakkar í BBQ sósu pabba

2009-02-21T12:58:00.004+01:00

Þessi sósa er einfaldlega besta BBQ sósa sem ég hef smakkað og þær hef ég smakkað ansi margar. Ég hef smakkað þær hjá meistarakokkum en engin jafnast á við þessa, enda er hún einföld og ef það var eitthvað sem ég lærði á þessum þremur árum á Ítalíu þá var það að einfalt er einfaldlega betra.
Ég verð að hafa bakaðar kartöflur með þessum rétti ég er bara svo íhaldssöm með þetta, ég var alin upp við þær, pabbi nefnilega sá um föstudagsmatinn á mínum uppvaxtarárum og þá var haldið í hefðir í þónokkur ár en svo þegar allir fóru að kvarta eftir kannski 4-8 ár þá var skipt um hefð og ný var mótuð. Hann sá einnig um dýrindis brunch á laugardögum og sunnudögum og það var mjög erfitt að kveðja það þegar maður flutti að heiman enda var manni iðulega boðið, nema þegar við bjuggum erlendis, þá var kannski hringt og við fengum að heyra hvað var mikið stuð á liðinu í gegnum tólið. Ein af þessum hefðum föður míns var grill á föstudögum, hvað sem á gekk þá var grillað, ekki einu sinni stormur eða snjóbyljir gátu haldið honum frá grillinu, þá klæddi hann sig bara betur og grillaði eins og hann ætti lífið að leysa, og ég get sagt ykkur það í fullkominni hreinskilni að við vorum alltaf guðs lifandi fegnar, við systurnar, því þetta var svo rosalega skemmtileg hefð. En nú er langt síðan grillið var tekið fram á Laufásveginum og var ég því komin með fráhvarfseinkenni og skipaði eiginmanninum út að grilla á meðan kartöflurnar mjökuðust að fullkomnun í ofninum. Hvað er betra en bökuð kartafla með fullt af smjöri og salti? Hið fullkomna samband kartöflunnar við smjörið og saltið hefur svo sannarlega ekki farið framhjá mér og er ég svo gersamlega kolfallin fyrir því, ef ég kemst nálægt fullkominni Duchesse(mjúk kartöflumús) þá get ég einfaldlega ekki hætt, þá fjúka allar reglur um kolvetnishöft út í veður og vind!

Hér kemur hin snilldar uppskrift föður míns með smá tvisti frá mér

BBQ sósa pabba
þessi uppskrift er frekar stór og getur dugað fyrir allt upp í kjöt fyrir 10 manns
ég helminga hana þegar við erum bara þrjú

200 ml tómatsósa(ketchup Heinz eða þvíumlíkt)
100 ml ólífuolía
1 msk sesamfræ(enn betra ef þau eru ristuð)
1 hvítlauksrif, kramið
1 msk rósmarín
50 ml púðursykur

Aðferð:
1. Öllu blandað saman í stóra skál og kjötið sett í til marineringar, gott er að láta það í þegar kartöflurnar fara inn í ofninn en þær taka yfirleitt um klukkutíma að bakast og þegar þær eru næstum tilbúnar er kjötið sett á grillið og munið að þessi sósa er bara betri ef hún fær að brenna aðeins. Á meðan kjötið er á grillinu er gott að salta og pipra á hvorri hlið.

Kartöflurnar eru bestar þegar maður þvær þær að utan og saltar á hvorri hlið setur svo á ofngrindina og bakar við 200°C í klukkutíma. Til að athuga hvort þær eru tilbúnar er best að stinga hnífsoddi í þá stærstu og ef það er engin fyrirstaða er hún tilbúin ef ekki má hún dúlla sér aðeins lengur. Ef kartöflurnar eru stórar og mjög kringlóttar er best að gera ráð fyrir einum og hálfum klukkutíma í bökun, þess vegna vel ég alltaf þær flötu þegar ég vel bökunarkartöflur.

Það er líka mjög gott að hafa ferkst salat með. Ég hef icebergsalat með parmesanosti(hann var keyptur í eyðslukasti eiginmannsins þegar hann langaði í spaghetti carbonara) og ristuðum sesamfræum, mangóbalsamico edik og ólífuolíudressingu. Mangóbalsamico er handa Heklu litlu þar sem bragðið er sætara og mildara en á venjulegu ediki og gerir salat ómótstæðilegt fyrir krakka.

Brettum upp ermarnar og hefjumst handa

2009-02-18T20:32:00.002+01:00

já nú er ég til í slaginn, komin í venjulegan vinnutíma og þá er ekkert annað að gera en að halda áfram með vikumatseðlana. Ég tók eftir því að þegar þeir voru ekki til staðar þá fór verðið á matarkörfunni upp um 2000 kr á viku sem er enginn smá peningur!
Nú er ég líka orðin ófrísk þannig að síðustu 3 mánuðir hafa einnig einkennst af mikilli ,,morgun" ógleði sem teygði sig yfir allan daginn og var því ómögulegt fyrir mig að borða mat sem var mikið brasaður eða steiktur eða eitthvað í þeim dúr, það er líka kannski ástæðan fyrir því að réttirnir sem ég hef sett inn síðustu mánuði hafa verið mjög léttir. Það var t.d. ekki séns fyrir mig að borða uppáhaldið mitt, brasseraða rétti. Mig hefur nú í langan tíma langað til að elda uxahala handa honum Sverri mínum(hmm eða mér), því hann trúir mér ekki að það sé svona fáránlega gott eins og ég held fram. Þar sem hægt er að kaupa uxahala á 10 kr kílóið væri hægt að segja að það sé mjög ódýr matur. Ég ætla að gera þann rétt einhvern tímann á næstu vikum. Ég hef líka ákveðið og verið dugleg við að setja inn fiskrétt í hverri viku, nauðsynlegt fyrir heila litla krílisins, eða svo segir mamma.
Nóg er komið af blaðri í þetta skiptið og hér kemur matseðill vikunnar.

Matseðill vikunnar 19.feb-22.feb.

Fimmtudagur
Grísahnakkar(fékk þá á tilboði um daginn og henti í frystinn)
BBQ sósan hans pabba og bakaðar kartöflur(var að lesa að kartöfluhýði getur innihaldið eiturefni, en mér er sama, hýðið á bakaðri kartöflu er best!)

Föstudagur
Risotto, ég verð að sjá hvernig flökurleikinn verður, hvort ég geti fengið sveppa eða tómat eða hvað það nú verður...

Laugardagur
Grilluð lúða í paprikuþema, grillaðar paprikusósa, kartöflumús með paprikum og fetaosti og kannski maður hendi í paprikusalat með grilluðum paprikum, jú ég er með smá æði fyrir rauðum paprikum.

Sunnudagur
Pizza eða grillaður kjúklingur fer eftir leti dagsins.

Enn um brauðið góða

2009-02-08T22:35:00.002+01:00

Ég fékk þá flugu í höfuðið um daginn að gera eplapie. Ég fór því í búðina til að kaupa epli og hveiti í kökuna, mig vantaði sæt epli og vissi nafnið á nokkrum þannig en snillingarnir í búðunum hér setja aldrei nafnið á eplunum í kassan, en samt getur verið 300 kr verðmunur og í verð merkingunni uppi á vegg stendur ,, gul epli x kr/kg" ,,græn epli x kr/kg" og svo lítur maður á úrvalið og viti menn, það er enginn litarmunur á 3 tegundum af eplum, þau eru öll græn!!! Ég varð að sjálfsögðu alveg brjáluð og endaði með að kaupa Fugi eplin ásamt ,,grænum eplum" sem ég að sjálfsögðu hef ekki hugmynd um nafnið. Vissuð þið að það eru til yfir hundrað eplategundir og bragðið er alls ekki eins á þeim, reyndar mjög mismunandi? En jæja ég komst yfir pirringinn af þessu um leið og ég smakkaði á guðdómlegu pæjunni, uppskriftina fann ég á netsíðu sem ég leita mikið í þegar ég vil baka eða bara smjatta í hausnum á einhverjum réttum sem ég nenni ekki að elda sjálf, kemur fyrir alla... Hins vegar misskildi ég eitthvað magnið á eplunum eða var með of lítið kökuform þar sem ég á ekki ekta pie-form, þannig að ég var með allt of mikið af eplum sem ég hafði þegar skorið í bita og sett kanilsykur á, hvað var þá til ráða? jú Brauðið góða... Ég henti í brauðið og setti eplin í staðinn fyrir hnetu- og rúsínublönduna og setti smá haframjöl með, kannski meira fyrir samviskuna en nokkuð annað, og út kom dýrindis eplabrauð. Algjört sælgæti!
Annars hefur þessi vika verið full af matarboðum þannig að það tók því ekki að búa til matseðil fyrir vikuna. Nú styttist í að ég verði aftur að hinni venjulegu húsmóður í 8 tíma starfi á dag sem þarf svo að finna út hvað á að hafa í matinn eftir vinnu á hverjum degi, þá verður líklega meira um fulla matseðla fyrir alla vikuna. Ég hlakka mikið til.

Gómsætt kornabrauð

2009-02-02T18:45:00.003+01:00

Ég var í tímaþröng um daginn og var að fara að hitta vinkonu mína og systur í kaffi heima hjá systur minni og langaði alveg rosalega að koma með eitthvað með kaffinu. Ég tímdi hins vegar ekki að kaupa handa okkur brauð og bakkelsi þar sem verð á því er komið upp úr öllu valdi, ég bara neita að kaupa brauð fyrir 400 kr þegar ég get vel bakað það sjálf! En ég hafði aðeins 2 klukkutíma og var þar að auki með 2 aukagrislinga í heimsókn(sem reyndar auðveldar stundum hlutina fyrir manni), hvað var til ráða? Ég fór í búðina og keypti þurrger og eina súkkulaðiplötu og treysti svo á það að eiga restina í skápnum heima, já það er eins gott að vera með gott ,,búr". Ég er ekki það reyndur bakari að ég geti bara skáldað eitthvað deig og vuola´ ooonei, matur er mitt thing ekki bakstur þar er ég frekar óörugg en einhvern veginn heppnast alltaf hjá mér, aldrei að vita nema amma sé eitthvað með puttana í þessu hjá manni svona bakvið tjöldin. En jæja áfram með söguna, ég fór sem sagt í uppáhalds uppskriftabók mömmu og okkar systranna en hún heitir Silver Palate(eftir 20 ár og fullt af uppskriftum hefur þessi bók ekki enn klikkað, ekki á einni uppskrift, snilld) en alltaf vantaði mig eitthvað í brauðin, þannig að ég tók til minna ráða tók eina uppskrift og bara fyllti í eyðurnar með einhvers konar hnetu-rúsínu-og fræjablöndu sem ég hef átt í skápnum hjá mér síðan ég var í nartstuði og vildi ekki fitna.... Þetta brauð varð algjört dúndur og það tók mig ca. 10 mín að blanda og svo var það klukkutíma í ofninum. Það sló í gegn í kaffiboðinu! Mér fannst hins vegar ekki nóg að vera bara með eitt brauð þannig að ég ákvað að henda í súkkulaði muffins, þá tók ég devils food cake uppskriftina mína sem ég setti hér inn um daginn og í staðinn fyrir nutellasúkkulaðiáleggið notaði ég 1 plötu(100 gr) af 70% súkkulaði og þar sem ég var í tímaþröng þá setti ég bara Betty Crocker súkkulaðikrem ofan á þær. Viti menn ég mætti í kaffiboðið ákkúrat á réttum tíma!!! Ég verð að segja að ég var asskoti hreykin af sjálfri mér. Ég ætla því að setja inn uppskriftina að brauðinu góða, athugið að snilldin við þetta brauð er að það er ekkert ger og það þarf engan tíma til að hefast.

Kornabrauð með rúsínum
1 brauð

400 ml blönduð korn með rúsínum, þessu er hægt að skipta út fyrir apríkósur og rúsínur og haframjöl eða alls konar fræ og hnetur
3 msk auk 100 ml sykur
65 ml grænmetisolía, hana á ég aldrei þannig að ég nota alltaf ólífuolíu
2 egg
450 ml hveiti
1 msk lyftiduft
135 ml mjólk
1/2 tsk salt

Aðferð:
1. Hitið ofninn í 175°C. Smyrjið brauðform og dustið með hveiti
2. Setjið hnetublönduna í mortel og berjið létt, ég hafði ekki mikinn tíma þannig að þetta var barið mjög gróft hjá mér, og bætið 3 msk af sykri saman við. Ef þið notið bara apríkósur og rúsínur er gott að láta þær liggja í bleyti í sjóðandi heitu vatni í 10 mín og láta svo leka vel af þeim.
3.Setjið afganginn af sykrinum(100 ml) saman við olíuna og pískið vel. Bætið eggjunum saman við(ég gerði þetta í hrærivélinni), eitt í einu og hrærið þar til þetta hefur blandast vel saman.
4. Blandið þurrefnunum saman, hveitinu, lyftidufti og salti og bætið ásamt mjólkinni smátt og smátt saman við olíublönduna og blandið síðast hnetu og rúsínublöndunni saman við.
5. Setjið í bökunarformið og bakið í miðjum ofni þar til prjónn sem settur er í miðju brauðsins kemur út hreinn, ca 1 klst. Takið þá út úr ofninum og látið kólna örlítið í forminu á grind og takið svo úr forminu. Þetta er alveg ótrúlega gott að bera fram ennþá volgt með smjöri og osti.

Steiktar svínalundir með léttri hvítvíns-og gráðostasósu

2009-01-26T21:16:00.002+01:00

Ég var eitthvað illa fyrirkölluð á sunnudaginn og þess vegna tók eiginmaðurinn að sér eldamennskuna það kvöldið og stóð sig með stakri prýði að vanda. Ég verð nú reyndar að viðurkenna að þessi uppskrift kemur beint upp úr uppskriftabók sem heitir Silfurskeiðin og er jú hin mesta snilld! Þar er hægt að finna fullt af léttum uppskriftum ásamt þungum og þá í báðum skilningi þessara orða. Enda var þessi svo einföld að hún tók ekki nema 5 cm pláss á blaðsíðunni, lítið af hráefnum og einföld matreiðsla, gerist ekki betra. Ég hef nú fjárfest í nýrri hvítvínsbelju þannig að þið megið búast við uppskriftum sem eru með því í, það er svo gott að nota vín í mat.

Svínakótilettur með léttri hvítvíns-og gráðostasósu
f/3-4
4 svínakótilettur
25 gr smjör
5 msk hvítvín
100 gr gorgonzola/íslenskur gráðostur
salt
Franskar kartöflur

Aðferð:
1. Hitið ofninn og bakið frönsku kartöflurnar
2. Hitið pönnu og bræðið smjörið og steikið því næst kótiletturnar
3. þegar þær eru steiktar eru þær teknar af pönnunni og í eldfast mót, álpappír settur yfir og haldið á þeim hita. Hellið hvítvíninu á pönnuna og látið sjóða örlítið niður og bætið þá ostinum saman við. Saltið og rétturinn er tilbúinn.
Berið fram með frönskum kartöflum.

Léttur og ódýr ýsuréttur

2009-01-23T19:22:00.002+01:00

Ég er rosalega stolt af þessum rétti, hann var svo góður og svo einfaldur að það tók manninn minn(undir minni handleiðslu)10 mínútur að gera hann, þess vegna er gott að byrja á kartöflunum þar sem þær taka mestan tíma, ég sýð líka alltaf aðeins of mikið af þeim til þess að geta búið til kartöflusalat handa eiginmanninum í nesti. Ég fór í Kópavoginn á extra sparneytna bílnum mínum og keypti svo ferska ýsu í fiskibúðinni Freyju, að við bara slefuðum yfir henni, hún var algert æði og svo ódýr!

Léttur og ódýr ýsuréttur
f/4
800 gr ýsa
1/2 krukka ólífur
1 tsk capers
150 ml hvítvín
1 skallottulaukur
400-500 gr kartöflur, soðnar
ólífuolía,sítrónusafi,salt

Aðferð:
1. Sjóðið kartöflurnar í söltu vatni, afhýðið þegar þær eru tilbúnar og setjið í skál saltið, dreypið smá sítrónusafa yfir og síðast ólífuolíu og blandið vel saman.
2. Roðflettið ýsuna og passið að engin bein séu í henni, skerið í stóra skammta bita eins og t.d. 10 cm bita. Saxið laukinn og skerið ólífurnar í tvennt, ef vill.
3. Hitið olíu á pönnu á meðal hita, léttsteikið laukinn og setjið svo fiskinn á pönnuna, steikið í 3 mín og snúið varlega við, hún á það til að detta í sundur. Þegar hún hefur verið steikt í ca 2 mínútur er hvítvíninu hellt út í pönnuna og soðið aðeins niður, í 4 mínútur, þá er ólífunum og kapers bætt saman við og rétturinn er tilbúinn.
Sósan sem er í pönnunni er smökkuð til með salti og pipar.

Borið fram með kartöflunum.

Matseðill fyrir vikuna 19.01-26.01

2009-01-19T12:56:00.003+01:00

Já og jæja nú er ég í stuði. Ég ætla mér að vera rosalega skipulögð þessa vikuna og vera með mat í dag og á morgun og svo er ég að vinna en um helgina er ég í fríi þannig að þá þarf líka að vera með eitthvað gúmmulaði handa fjölskyldunni. Í kvöld verður fiskur og hvernig hann verður ákveð ég bara þegar ég er búin að kaupa fiskinn til að sjá hvað passar við hann og svona, meðæti með fisk getur líka verið svo einfalt eitthvað þannig að ég stressa mig nú yfirleitt ekkert á því. Þá er bara að finna fyrir hina dagana. Ég er í rosalega miklu stuði fyrir léttan mat þessa dagana, það passar reyndar ekkert við veðráttuna, þar sem kuldinn nístir mann inn að beini, ég býst nú reyndar við að ástæða þess sé sú að ég er bara ennþá að jafna mig eftir jólin, sem voru svo uppfull af kjöti og þá sérstaklega í vinnunni hjá mér, ég er bara hrædd um að ég hafi fengið svo mikið ógeð á því að ég geti bara ekki borðað það næstu mánuðina, nei annars, það getur varla verið...
Það eina sem poppar upp í hugann þegar ég fer að hugsa um rétti og uppskriftir eru sumarréttir. Á ég að þora að setja svoleiðis inn strax? Æjá ég elda bara það sem ég vil og hana nú!

Matseðill fyrir vikuna 19.01-26.01

Mánudagur
matur hjá mömmu. Spaghetti með pestó. Mamma er svo sniðug, hún á nefnilega alltaf heimatilbúið pestó inni í frysti, svona fyrir óvænta gesti.

Þriðjudagur
Hérna var æðislegur ýsuréttur

mið-fimm vinna

Föstudagur
Þorrinn er mættur og þá er ekkert annað hægt að gera en hlýða kalli húsbóndans og hafa þorramat.

Laugardagur
Matarboð

Sunnudagur
Svínakótelettur á ítalska vísu

Steikt smálúða með smjörsoðnum gulrótum, steinseljurótarmauki, kartöflumús með grilluðum paprikum og fetaosti og salsa verde

2009-01-08T22:41:00.002+01:00

Þessi réttur var algjört æði, við borðuðum á okkur gat! Ég var með ferskt salat með sem var svona til að létta réttinn og það kom mjög vel út.
Þetta er miðað við rétt fyrir 4

Steinseljurótarmauk

2 meðalstórar steinseljurætur
20 gr smjör
smá skvetta af mjólk(skiptir ekki máli hvernig mjólk)ég setti hrísgrjónamjólk
salt og pipar

Aðferð:
1. Rótin er soðin þar til hún er vel meyr, þá er hún maukuð með töfrasprota eða í hakkara og öllu blandað saman, smakkað til.

Kartöflumús með grillaðri papriku og fetaosti

5-6 meðalstórar kartöflur
70 gr smjör
50-70 ml mjólk
3 paprikur, grillaðar, afhýddar og skornar í meðalstóra bita
hálf fetaostsdós, hreinn feta ekki í olíu(fæst í Hagkaup eða Nóatúni)
salt og pipar

Aðferð:
1.Grillið paprikurnar og sjóðið kartöflurnar þar til þær eru alveg meyrar.
2. Takið hýðið af paprikunum og maukið kartöflurnar með kartöflumaukara og bætið smjöri, mjólk, salti og pipar saman við og smakkið til. Þegar músin er orðin góð er paprikunum og fetaosti bætt saman við.

Smjörsoðnar gulrætur

4-5 gulrætur, skornar langsum í fernt
20 gr smjör
salt og pipar

Aðferð:
1. Gulræturnar er u soðnar í saltvatni þar til næstum meyrar, þá er mestu af vatninu hellt af og smjörinu bætt saman við og soðið áfram í nokkrar mínútur til viðbótar.

Salsa verde
1 búnt steinselja
100 ml ólífuolía
1 msk edik(ég notaði rauðvíns en það má nota, hvítvíns eða borðedik)
1/4 hvítlaukur
salt og pipar

Aðferð:
1. Maukið steinseljuna með töfrasprota, bætið hvítlauk og ediki saman við og olíunni hægt saman við.
Smakkið til.

Veltið fisknum upp úr hveiti og extra hveiti dustað létt af áður en hann er steiktur á heitri pönnu.

Það er hægt að hita allt saman upp rétt áður en fiskurinn er steiktur þannig að allt sé heitt þegar það er lagt á borðið.

Ég bar þetta fram með fersku Icebergsalati,mangó, tómötum og vinaigrette úr mangóediki og olíu.

Besta kjúklingasalat í heimi

2009-01-08T22:19:00.002+01:00

Ég er eiginlega alveg örugg á því að ég hafi sett uppskriftina af þessu salati í eitthvað af blöðunum sem ég var að skrifa fyrir eitt sumarið. Ég ætla þó að reyna að setja saman aftur þessa uppskrift, málið er nefnilega að við sem höfum gert þetta oftar en einu sinni förum eftir auganu og bragðskyni ekki uppskrift og ég veit að það sama mun eiga við um ykkur.

Besta kjúklingasalat í heimi
f/5-6
1-2 kjúklingar
1 beikonbréf
1/4 rauðlaukur, sneiddur mjög þunnt
1/2 fetaostsdós, hreinn feta ekki í olíu
1/2 ólífukrukka
1/2 mangó(má sleppa)
það má einnig setja karamelliseraðar pecanhnetur ef þið viljið
100 ml majónes
100 ml sýrður rjómi
50 ml balsamico edik
25 ml sykur
1 poki af blönduðu salati eða 1 iceberghaus og lambhagasalat

Aðferð:
1. Eldið kjúklinginn eftir smekk, ég skar hann í bita(læri,bringu o.s.frv.) og henti honum í ofninn í 200°C í 25 mínútur.
2. steikið beikonið þar til það er stökkt.
3. skerið laukinn
4. Blandið saman sýrðum og majónesi, saltið og piprið
5. setjið edikið og sykurinn í lítinn pott og látið sjóða þar til þykknar örlítið, ca.3 mínútur. Kælið og blandið síðan smátt og smátt saman við majónesið þar til liturinn er ljósbrúnn og bragðið rosalega gott;) þetta bragð er erfitt að útskýra.
6. Salatið er sett saman, þá er það sett á næstum flatan disk eða fat og sett í lög og fyrsta lagið byrjar á salati þá kjúkling, lauk, ólífur, ostur , niðurskorið beikonið og sósu dreift yfir, svo er þetta gert koll af kolli þar til diskurinn þolir ekki meir. Ef afgangar verða(sem er sjaldgæft) þá má borða þá daginn eftir með bestu lyst.